1. Mang fan nib t’uf ni ngad guyed rogon ni nge m’agan’ Jehovah ko liyor ni gad be tay ngak, ma mang fan?

 I GAAR Jesus: “Piin nriyul’ ni yad be meybil e bay ra meybilgad ngak e en ni Chitamangiy u daken e ayuw ko Kan ni Thothup [“gelngin Got nib thothup,” NW] ngu fithik’ e yul’yul’. Ereray e piin ni yad ma meybil ni ba adag e Chitamangiy ni ngar meybilgad ngak.” (John 4:23; 6:44) Gad gubin nra bagadad ma thingari ‘guy rogon nge nang e n’en ni ir e mm’agan’ Somol ngay.’ (Efesus 5:10) Re n’ey e gathi gubin ngiyal’ nib mom, ya ma guy Satan rogon ni nge bannagdad ya ngad rin’ed boch ban’en nde m’agan’ Jehovah ngay.​—Revelation 12:9.

2. Mu weliy e n’en ni buch u tooben e Burey ni Sinai.

² Uw rogon ni ma guy Satan rogon ni nge bannagdad? Reb e kanawo’ ni ma rin’ e re n’ey riy e aram e ma guy rogon ni nge athukuy lanin’dad ya nge dab kud nanged e tin nib fel’ ko tin nib kireb. Mu tay fanam i yan ko n’en ni buch ko fare nam nu Israel u nap’an ni yad bay u tooben e Burey ni Sinai. Ke yan Moses nga daken e burey, ma yibe sonnag ni nge sul. Munmun me chalban fapi girdi’ ko son, ma aram ma rogned ngak Aron ni nge ngongliy reb e got ngorad. Ere ngongliy Aron ba liyos ni yaan ba pi fak e garbaw ni pumoon ko gol. Ma aram me tabab e girdi’ ko madnom. Ur churu’gad u tooben fare liyos ma yad be  siro’ ngay. Ra lemnaged ni faan yad ra siro’ ko re liyos nem ni yaan ba pi fak e garbaw ni pumoon, ma aram e yad be liyor ngak Jehovah. Bochan ni i lemnag e pi girdi’ ney nre n’ey e ba mur ni ngar “tiyed fan Somol” riy, ma aram fan de mat’aw e n’en nrin’ed. Rogon u wan’ Jehovah e yad be un ko meybil ko liyos, ma boor i yad e yim’ ni bochan e re n’ey. (Exodus 32:1-6, 10, 28) Mang e gad be fil ko re n’ey? Dab mu pagem ngan bannagem. ‘Dab mmath nga ban’en ni ke yog e motochiyel ndab mmath ngay,’ mag pag Jehovah ni nge ayuwegem ngam nang e tin nib fel’ ko tin nib kireb.​—Isaiah 52:11; Ezekiel 44:23; Galatia 5:9.

3, 4. Mang fan nib fel’ ni ngad fal’eged i yaliy e gin ke sum boch e madnom riy nib ga’ ni ma tay e girdi’?

³ Nap’an ni immoy Jesus u fayleng, me fil ngak e pi apostal rok rogon ni ngar daged e kanawo’ ni ngan folwok riy u rogon ni nge par e liyor rorad nib beech. Tomuren ni yim’ Jesus, me ulul e pi apostal ni ngaur filed ngak e tin nib beech i gachalpen Jesus murung’agen e pi kenggin e motochiyel rok Jehovah. Machane tomuren ni yim’ e pi apostal, me tabab boch e tamachib ni googsur i fek boch e machib nde riyul’, nge yalen, nge madnom ni ke sum rok e piin yad ma meybil nga boch e got ni googsur nga lan e ulung ni Kristiano. Ku bay boch e madnom ni ma tay e piin yad ma liyor nga boch e got ni googsur ni kur thilyeged fithingan ya nge m’ug ni gowa bang ko machib ko piin Kristiano. (2 Thessalonika 2:7, 10; 2 John 6, 7) Boor e pi madnom nem e ba ga’ ni ka yima tay e ngiyal’ ney, ma be mon’ognag e machib ni googsur ni kub muun ngay ngongolen e moonyan’. *​—Revelation 18:2-4, 23.

 ⁴ Pi madnom ni yima tay e ngiyal’ ney e ke mang bang ko pi n’en ma rin’ e girdi’ u ga’ngin yang e fayleng ni yima tay nib ga’ fan. Machane nap’an ni ga ra ulul ni ngam fil rogon ni ma lemnag Jehovah e pi madnom ney, ma sana ga ra guy nib t’uf ni ngam thilyeg rogon ni ga ma lemnag murung’agen e pi madnom ney. Sana de mom e re n’ey, machane rayog ni nge pagan’um ngay nra ayuwegem Jehovah. Chiney e ngad weliyed e gin ke sum boch e madnom riy nib ga’ ni yima tay e ngiyal’ ney ya nge yag nda nanged rogon laniyan’ Jehovah riy.

5. Mang e be micheg ndan gargeleg Jesus ko December 25?

⁵ Boor yang u fayleng ni yima madnomnag e Christmas riy ko December 25, ya ma lemnag yooren e girdi’ ni aram e rofen nni gargeleg Jesus riy. Der yog e Bible ko kun rran ara pul e ni gargeleg Jesus riy, machane bay ban’en ni be yog u murung’agen e ngiyal’ nni gargeleg riy. I yoloy Luke nnap’an nni gargeleg Jesus u Bethlehem, ma “immoy bogi girdi’ ni yad ma gafaliy e gamanman” u wen ni yad be matanagiy e gamanman rorad. (Luke 2:8-11) Ra taw ko pul ni December ma rib gel e garbeb u Bethlehem, ma yug be aw e n’uw nge ayis. Ere dabiyog ni nge par e piin ma gafaliy e gamanman u wen nnep’ ngaur matanagiyed e gamanman rorad. Mang e gad be fil ko re n’ey? Ni gargeleg Jesus ko ngiyal’ nib war e garbeb, ere gathi ni gargeleg ko December. Be tamilangnag e Bible nge boch ban’en ni yima weliy ko chep ni ngiyal’ nni gargeleg Jesus riy e ra yan i aw ko pul ni September ara October ko calendar e ngiyal’ ney.

6, 7. (a) Uw rogon ni tabab boor e yalen ni yima rin’ ko Christmas? (b) Susun ni mang fan ni ngaud pied e tow’ath?

⁶ Ere uw rogon ni tabab e Christmas? I sum e re madnom  ney u boch e madnom ni ma tay e piin yad ma liyor nga boch e got ni googsur ni bod rogon fare madnom ni ma tay piyu Roma ni ka nog e Saturnalia ngay. Re madnom ney e ba madnom ni yima tay ni fan ko fare got ni ka nog Saturn ngak ni got ko milay’. Be yog ba ken e babyor ni be gaar: “Pi yalen ni yima rin’ ko Christmas e ke yib ko fare madnom ni Saturnalia ni ma tay piyu Roma u lukngun e pul ni December. Bod nre madnom  ney e ir e ke sum riy boch ban’en ni yima rin’ ni bod rogon e pi mur ni yima tay nib ga’, nge pi tow’ath ni yima pi’, nge kindal ni yima k’eg.” (The Encyclopedia Americana) Maku reb e, fare got ko yal’ ni ma liyor piyu Persia ngay ni ka nog Mithra ngak e yima madnomnag e rofen nni gargeleg riy ko December 25.

⁷ Machane, yooren e girdi’ ni yad ma madnomnag e Christmas e ngiyal’ ney e darur lemnaged e gin ke sum e re madnom ney riy. Yad ma sap ngay ni Christmas e aram ba ngiyal’ ni nge rin’ chon e tabinaw boch ban’en u taabang, min kay boch e ggan nib fel’ lamen, min pi’ boch e tow’ath. Riyul’ nib t’uf rodad girdien e tabinaw rodad nge pi fager rodad, ma baadag Jehovah ni ngaud golgad ngodad. Be yog e 2 Korinth 9:7 ni “Got e ba t’uf rok e en ni ma pi’ ban’en u fithik’ e felfelan’.” Machane dabun Jehovah ni kemus ni ngiyal’ ni ngan tay reb e madnom e aram e ngiyal’ ni ngad pied ban’en ko girdi’. Girdi’ rok Jehovah e yad ma felfelan’ ni ngar pied e tow’ath mar bad e pi fager nge chon e tabinaw rorad nga taabang ni ngar felfelan’gad nde mudugil ngal’an, ma yad ra rin’ e re n’ey ma darur lemnaged ni bay ban’en ni ngki pi’ be’ ngorad. Yad ma pi’ ban’en ni bochan e ba t’uf e girdi’ rorad.​—Luke 14:12-14.

8. Fapi girdi’ ni yad ma fanay e pi t’uf nge boch ban’en u lan e lang ni nga rogned e n’en nra buch e ranod ra guyed Jesus u nap’an ni ka fin nni gargeleg, fa? Mu tamilangnag.

⁸ Boor e girdi’ ni yad ma yog ni bay dalip e pumoon nra feked boch e tow’ath i yan ngak Jesus u nap’an ni ka bay u tafen e gamanman ko ngiyal’ ni ka fin nni gargeleg ni bochan e nge puluw nga fan ni yima pi’ e tow’ath u nap’an e Christmas. Riyul’ ni yan boch e pumoon ra guyed Jesus ni kar feked boch e tow’ath. Kakrom e ba ga’ ni  yima yan nni pi’ e tow’ath ngak be’ nib ga’ fan. (1 Kings 10:1, 2, 10, 13) Machane ga manang ni be yog e Bible ni pi pumoon nem e yad e piin ma fanay e pi t’uf nge boch ban’en u lan e lang ni nga rogned e n’en nra buch, ara yad ma un ko pig ma darur liyorgad ngak Jehovah, fa? Maku reb e, da ranod ra guyed Jesus u nap’an ni ka bay u tafen e gamanman ko ngiyal’ ni ka fin nni gargeleg. Ya fin ranod ra guyed boch nga tomuren u nap’an ni bay u reb e naun ni kab ‘bitir.’​—Matthew 2:1, 2, 11.

9. Kun madnom ko rofen nni gargeleg be’ riy e be weliy e Bible murung’agen?

⁹ Ba gel e felfelan’ ni yima tay u nap’an ni yira gargeleg reb e bitir. (Psalm 127:3) Machane gathi be yip’ fan ni aram e ngaud madnomnaged e rofen nni gargeleg be’ riy. Am lemnag e re n’ey: Kemus ni l’agruw e madnom nni tay ko rofen nni gargeleg be’ riy ni be weliy e Bible murung’agen. Reb e aram e madnom ko rofen nni gargeleg Farao ni pilung nu Egypt, ma reb e madnom ko rofen nni gargeleg Herod Antipas ni Pilung. (Mu beeg e Genesis 40:20-22; Mark 6:21-29.) Dariy bagayow e gal pilung ney ni ma pigpig ngak Jehovah. Bin riyul’ riy e, dariy bang u Bible ni be yog ni un madnomnag e rofen ni kan gargeleg reb e tapigpig rok Jehovah riy.

10. Uw rogon u wan’ e piin Kristiano e madnom ko rofen nni gargeleg be’ riy?

¹⁰ Be yog ba ken e babyor ni tin som’on e Kristiano e “yad ma tay ni yigoo piin yad ma liyor nga boch e got ni googsur e yad ma madnomnag e rofen nni gargeleg be’ riy.” (The World Book Encyclopedia) Tiney e yalen e be tor nga daken boch e machib ni googsur. Bod ni, piyu  Greece kakrom e ba mich u wan’rad ni gubin e girdi’ ni yira gargeleg ma bay reb e kan ni ma yib ni nge ayuweg, me par rok u n’umngin nap’an e yafos rok. Ma yad ma madnomnag e rofen nni gargeleg be’ riy ni bochan e yad be lemnag nre n’ey e ra k’aring e pi got rorad ni nge ayuweg faen ni yibe madnomnag e rofen nni gargeleg riy. Maku reb e, re n’ey ni ngaun madnomnag e rofen nni gargeleg be’ riy e ku bay rogon nga reb e ngongol ni yima rin’ ni bay rogon ko moonyan’ ni aram e ngaun fanay e t’uf nge boch ban’en ni bay u lan e lang ni nga nog e n’en nra buch nga m’on.

11. Uw rogon u wan’ Jehovah ni faanra ud golgad?

¹¹ Boor e girdi’ ni yad ma lemnag ni rofen nni gargelegrad riy e aram reb e rran nib ga’ fan, ma ra taw ko rofen nem ma susun e ngan dag e tayfan nge t’ufeg ngorad. Machane rayog ni ngad daged e t’ufeg ko girdi’ u lan e tabinaw rodad nge pi fager rodad ndemtrug ngal’an u reb duw, ko bin ngad rin’ed u taa borran u reb e duw. Baadag Jehovah ni ngaud daged e sumunguy ko girdi’ mu ud golgad ni gubin ngiyal’. (Mu beeg e Acts 20:35.) Gubin e rran ni gad ma pining e magar ngak ko yafos rodad ni ke pi’ nib tow’ath. Gathi nga fini taw ko rofen nni gargelegdad riy ma gad pining e magar ngak.​—Psalm 8:3, 4; 36:9.

12. Uw rogon ni kab fel’ e rofen ni gad ra yim’ riy ko rofen nni gargelegdad?

¹² Be gaar e Eklesiastes 7:1, BT: “Bbuguwan nib fel’ e kab fel’ boch nga ba florida nib tolang puluwon; ma rofen ni ga ra yim’ e kab fel’ boch ko rofen nni gargelegem.” Uw rogon ni kab fel’ e rofen ni gad ra yim’ riy ko rofen nni gargelegdad? Nap’an ni yira gargelegdad ma dariy ban’en ni kad rin’ed u lan e yafos rodad, ndemtrug  ko ban’en nib fel’ ara ba kireb. Machane nap’an ni gad ra fanay e yafos rodad ni ngad pigpiggad ngak Jehovah ma gad rin’ boch ban’en nib fel’ ni fan ko girdi’, ma aram e gad be fal’eg thidad ara ‘buguwdad.’ Ere mus nga nap’an ni gad ra yim’ ma dabi pag Jehovah tildad. (Job 14:14, 15) Girdi’ rok Jehovah e darur madnomnaged e rofen nni gargelegrad riy ara rofen nni gargeleg Jesus riy. Bin riyul’ riy e, taare madnom ni tay Jesus chilen ni  ngaud ted e aram e Puguran ko yam’ ni tay.​—Luke 22:17-20; Hebrews 1:3, 4.

13, 14. Mang e ba l’ag rogon e madnom ni Easter ngay?

¹³ Boor e girdi’ e yad ma lemnag ni faan yad ra madnomnag e Easter, ma aram e yad be madnomnag e fos ko yam’ ni tay Jesus. Machane bin riyul’ riy e, fare madnom ni Easter e bay rogon ngak Eostre ara reb e got nib pin ni ma liyor ba ulung i girdi’ ngak ni ka nog e Anglo-Saxon ngorad. Yad ma yog nre got ney e got ko tabolngin ban’en nge got ko ngiyal’ ni baaray ni ke tal ndakir aw e ayis ma ke tabab e woldug ni ngki sul nga rogon bayay. Be weliy ba ken e babyor nre got ney e ku ir e got ko par ko pumoon nge ppin. (The Dictionary of Mythology) Bay boch ban’en ni yima rin’ u nap’an e Easter ni bay rogon ko re n’ey. Bod ni, be yog ba ken e babyor ni pi fak e nimen e “ban’en nib ga’ ni yima fanay ni nge yip’ fan reb e yafos nib beech nge ban’en ni ke sul nga rogon.” (Encyclopædia Britannica) Maku reb e, ke kakrom ni yima fanay e usangi u boch ban’en ni ma rin’ e piin yad ma liyor nga boch e got ni googsur ni nge sor fan ko par ko pumoon nge ppin. Ere ba tamilang ni Easter e dariy rogon ko fos ko yam’ ni tay Jesus.

¹⁴ Ere ba felfelan’ Jehovah ngay u nap’an nra guy e girdi’ ni yad be athukuy boch e yalen ni bay rogon ko teliw ni googsur ko fos ko yam’ ni tay Fak, fa? Danga’. (2 Korinth 6:17, 18) Bin riyul’ riy e, dawori yog Jehovah ni ngaud madnomnaged e fos ko yam’ ni tay Jesus.

15. Uw rogon ni tabab e Halloween?

¹⁵ Halloween e reb e madnom ni bay rogon ko girdi’  ni ma pig, nge kan, nge boch ban’en nib tatamdag yaan. Re madnom ney e gathi ba madnom ni ka fini sum. Ra taw ko bin baaram e ngoon nth’abi chugur ko November 1, ma bay ba ulung i girdi’ u Britain ngu Ireland kakrom ni ka nog e Celt ngorad ni yad ma tay reb e madnom ni ka nog e Samhain ngay. Yad ma lemnag nra taw ko re madnom nem, ma aram e ngiyal’ ni ma sul yaan e piin kar m’ad nga fayleng. Ere ma tay e girdi’ e ggan nge boch ban’en ni ngar garbodgad ngay ya nge dab ra gafgownaged e girdi’. Nap’an nra chuw e bitir nga boch e mad nib tatamdag yaan e ngiyal’ ney nga u ranod u mit e tabinaw ni yad be ning ban’en, ma darur nanged ni yad be folwok ko n’en ni un rin’ ko re madnom ney kakrom ni bay rogon nga ngongolen e moonyan’.

16, 17. Mang e susun ni ngad lemnaged u nap’an ni gad be lemnag rogon ni ngad ted e m’agpa’ rodad?

¹⁶ M’agpa’ rok l’agruw ni’ e aram reb e madnom ni yima felfelan’ riy. Ra bang u fayleng ma rogon ni yima madnomnag e m’agpa’ riy. Ba ga’ nder ma lemnag e girdi’ e gin ke sum boch ban’en riy ni yima rin’ u nap’an e re madnom ney. Ere sana dar nanged ni bay boch e yalen ko m’agpa’ ni bay rogon nga boch e machib ni ke sum rok e piin yad ma liyor nga boch e got ni googsur. Machane l’agruw e Kristiano ni yow be puruy’nag rogon ni ngar tew e m’agpa’ rorow e susun ni ngar guyew rogon ni ngar rin’ew u rogon nib m’agan’ Jehovah ngay. Ere faan yow ra fil murung’agen e gin ke sum e pi yalen riy ni yima rin’ u nap’an e m’agpa’, ma aram e rayog ni ngar dugliyew e n’en nib fel’ ni ngar rin’ew.​—Mark 10:6-9.

 ¹⁷ Bay boch ban’en ni yima rin’ u nap’an e m’agpa’ ni yima lemnag nra ‘fal’eg waathan’ fa wu’ i mabgol. (Isaiah 65:11) Bod ni, u boch e nam e ma yon’ e girdi’ riy e komey ara boch ban’en ni bod e komey nga daken fa gali cha’ ni kar mabgolgow. Yad ma lemnag nre n’ey e ra fal’eg waathan fa wu’ i mabgol ya nge yag nra fakayew e bitir, mar parew ni yow ba felfelan’, mab n’uw nap’an e yafos rorow, miki ayuwegrow ndabi buch ban’en nib kireb rorow. Machane piin Kristiano e yad ma kol ayuw ndab ra uned nga boch e yalen ni bay rogon ko teliw ni googsur.​—Mu beeg e 2 Korinth 6:14-18.

18. Ku mang boch i kenggin e motochiyel u Bible ni bay rogon ko m’agpa’ ni yima tay?

¹⁸ L’agruw e Kristiano ni kar dugliyew ni ngar mabgolgow e yow baadag ni nge par e madnom ko m’agpa’ rorow ni bay e felfelan’ riy mab yalen, maku ra felfelan’ e piin yad ra un ngay. Piin kar bad ko m’agpa’ rok l’agruw e Kristiano e susun e dab rogned boch e thin nib kireb, ara ba puwlag, ara boch e thin nra darifannag fa wu’ i mabgol ara yugu boch e girdi’. (Proverbs 26:18, 19; Luke 6:31; 10:27) Maku reb e, m’agpa’ ni ma tay e piin Kristiano e der gagiyelnag “urngin ban’en ni bay u roy u fayleng nri ma uf e girdi’ ngay.” (1 John 2:16) Ere faanra gimew be puruy’nag be’ rogon ni ngam tew e m’agpa’ romew, ma ngam guyew rogon ni ngam rin’ew u reb e kanawo’ ni gimew ra sul ngaum lemnagew ma gimew ra felfelan’ ngay.​—Mu guy Yugu Boch e Thin 28.

19, 20. Uw e ke sum e toasting riy?

¹⁹ Toasting ara ngan chafineg e kap nga taabang e ban’en ni yima rin’ u nap’an e madnom ko m’agpa’ nge ku  boch e madnom ni yima tay. Nap’an ni yira toast, ma aram e bay be’ ni be non ni be yog ni be athapeg boch ban’en nib fel’ ni fan ngak be’ ara boch e girdi’, ma tin ka bay e girdi’ e kar chibiyed e kap rorad nga lang. Susun ni nge uw rogon e toasting u wan’ e piin Kristiano?

²⁰ Be yog ba ken e babyor ni toasting e ban’en nsana ke yib u reb e yalen ni un rin’ kakrom ni bay rogon ko liyor ni yima tay nga boch e got ni googsur “ni aram e yima fek e racha’ ara wain ngan pi’ ni maligach ngak boch e got.” (International Handbook on Alcohol and Culture) Re n’ey ni yima rin’ e “nge yan nga lon ni kar motoyilgad ko meybil ni kan tay ni bay fapi thin riy ni ‘manga yugum par nib n’uw nap’an!’ ara ‘manga yugum par ndab mm’ar!’” Kakrom e ba ga’ ni ma chibiy e girdi’ e kap rorad nga lang ni nga rogned ko pi got ni nge tow’athnagrad. Machane gathi aram rogon ni ma tow’athnagey Jehovah.​—John 14:6; 16:23.

21. Mang boch e madnom nsusun e ngki siyeg e piin Kristiano?

²¹ Nap’an ni ga be dugliy ko ngam un nga reb e madnom fa danga’, mag lemnag rogon e re miti lem nge ngongol ni yima rin’ riy. Bod ni bay boch e madnom ni yima tay e churu’ ni puwlag riy, ma yima chingaw riy, maku yima rin’ e ngongol ndarngal riy. Mit ney e madnom e ku rayog ni ngaun rin’ boch ban’en riy ni be dag nde kireb ni nga i par e pumoon nge pumoon nge ppin nge ppin ara ni k’aring e girdi’ ni ngar lemnaged ni kab fel’ e nam rorad nga boch e nam. Faan gad ra un ko mit ney e madnom, ma gur, riyul’ ni gad be fanenikay e tin ma fanenikay Jehovah, fa?​—Psalm 1:1, 2; 119:37; Roma 12:9.

22. Mang e rayog ni nge ayuweg reb e Kristiano ni nge dugliy ko nge un nga reb e madnom fa danga’?

 ²² Ba t’uf ni nge kol ayuw e piin Kristiano ndab ra uned nga urngin mit e madnom ni yima tay ni ma darifannag Got. I yoloy apostal Paul ni gaar: “Demturug e n’en ni gimed ra rin’, ndemturug ko ngam abichgad ara ngam garbodgad, ma urngin ni ngam rin’ed ni fan e nga nog e sorok riy ngak Got.” (1 Korinth 10:31; mu guy Yugu Boch e Thin 29.) Riyul’ ni gathi gubin e madnom ni yima tay ni bay rogon ko ngongol ndarngal, ara teliw ni googsur, ara fare lem ni kab fel’ reb e nam nga reb. Faanra der togopuluw reb e madnom ko pi kenggin e motochiyel u Bible, mab t’uf ni ngad dugliyed ko ngad uned ngay fa danga’. Kub t’uf ni ngad lemnaged rogon ndab da magawonnaged laniyan’ yugu boch e girdi’ ni bochan e n’en kad dugliyed.

23, 24. Uw rogon ni ngad weliyed ngak chon e tabinaw rodad ni gathi yad boch e Pi Mich fan ni kad dugliyed ndab da uned nga boch e madnom?

²³ Sana kam tal ndakumur un nga boch e madnom ni ma darifannag Jehovah. Machane sana bay boch i girdien e tabinaw rom ni gathi yad boch e Pi Mich Rok Jehovah nrayog ni ngar lemnaged nre n’ey e be yip’ fan ni kam dabuy dakenrad ara kam dabuy ni ngaum chag ngorad. Sana rayog ni ngar lemnaged ni kemus e ngiyal’ nrayog ni nge mada’ chon e tabinaw nga taabang. Ere mang e rayog ni ngam rin’? Boor e kanawo’ nrayog ni ngam micheg ngorad ni yad ba t’uf rom ma kub ga’ farad u wan’um. (Proverbs 11:25; Eklesiastes 3:12, 13) Rayog ni ngam piningrad ni ngam rin’ed boch  ban’en u taabang u yugu reb e tayim ni gathi ngiyal’ nem.

²⁴ Faanra baadag e girdi’ rom ni ngar nanged fan ndakumur un nga boch e madnom ni yima tay, ma rayog ni ngam gay murung’agen e pi madnom ney u lan e pi babyor rodad ara jw.org ya nge yag nim weliy ngorad fan ndakumur un ngay. Dab mu k’aringrad ni ngar lemnaged ni ga be guy rogon ni ngam gel ko maluagthin u murung’agen e pi n’ey ara mu towasariyrad ni ngar lemgad ni bod gur. Mu ayuweg chon e tabinaw rom ni ngar nanged ni bay boch ban’en ni kam fal’eg i gay murung’agen u m’on ni ngam dugliy e n’en ni ngam rin’. Mu par ni gab gapas, ma ‘gubin ngiyal’ nthingar umog e thin ngorad nib fel’ ma ba’ fan.’​—Kolose 4:6.

25, 26. Uw rogon nrayog ni nge ayuweg e piin gallabthir pi fakrad ni nge t’uf e pi motochiyel rok Jehovah rorad?

²⁵ Gad gubin nib t’uf ni nge tamilang fan u wan’dad ndab da uned nga boch e madnom ni yima tay. (Hebrews 5:14) Gad be nameg ni ngad rin’ed e tin nib m’agan’ Jehovah ngay. Ma faanra bay pi fakdad, ma thingar da ted e tayim ni ngad ayuweged yad ni nge tamilang e pi kenggin e motochiyel u Bible u wan’rad me t’uf rorad. Nap’an nra riyul’ Jehovah u wan’rad, ma aram e ku yad ra adag ni ngar rin’ed e tin nib m’agan’ ngay.​—Isaiah 48:17, 18; 1 Peter 3:15, 16.

²⁶ Ma felfelan’ Jehovah u nap’an nra guy ni gad be athamgil u rogon nrayog rodad ni ngad liyorgad ngak u rogon nib m’agan’ ngay ngu fithik’ e yul’yul’. (John 4:23) Machane boor e girdi’ ni yad ma lemnag ndariy be’ nrayog rok ni nge par nib yul’yul’ u lan e re fayleng ney ndakuriy e yul’yul’ riy. Gur riyul’ e re n’ey? Ngad weliyed e fulweg riy ko bin migid e guruy.