1, 2. (a) Mang e ma athapeg e piin ka fin nra uned ko mabgol? (b) Mang boch e deer ni gad ra weliy e fulweg riy ko re guruy ney?

 MU SUSUNNAG ba wu’ i mabgol ni kar ra felfelan’gow ko rofen ni m’agpa’ rorow. Kar felfelan’gow nga rogon e par rorow boch nga m’on, maku bay e pi n’en yow be athapeg ma yow be nameg. Yow be athapeg ni nge par e mabgol rorow nib n’uw nap’an ma bay e felfelan’ riy.

² Boor e mabgol nib fel’ ko som’on, machane der ma yag ni nge par ni aram rogon. Faanra nge par e mabgol rok l’agruw ni’ nib manigil ma bay e felfelan’ riy, mab t’uf ni nge pow’iyrow Got. Ere chiney e ngad weliyed e fulweg ko pi deer ni baaray nrogon ni bay u Bible: Mang boch i fel’ngin e mabgol? Faanra ngam mabgol, ma uw rogon ni ngam mel’eg be’ nib fel’ ni ngam mabgolgow? Uw rogon ni ngam mang reb i figirngiy ara leengiy nib manigil? Ma mang e ra ayuweg reb e mabgol ni nge par ndabi kireb?​—Mu beeg e Proverbs 3:5, 6.

3. Ga be lemnag nib t’uf ni nge un be’ ko mabgol mfin aram e rayog ni nge par nib felfelan’, fa? Mu tamilangnag.

³ Boch e girdi’ e yad ma lemnag ndabiyog ni ngar pared ni yad ba felfelan’ ni faanra dab ra uned ko mabgol. Machane de riyul’ e re n’ey. I yog Jesus ni yira par ni yib muchugbil, ma aram reb e tow’ath. (Matthew 19:11, 12) Ki yog apostal Paul ni bay boch i fel’ngin e muchugbil. (1 Korinth 7:32-38) Gur e ba milfan ngom ko ngam un ko mabgol fa danga’. Susun e dab mu un ko mabgol ni bochan e pi fager rom, ara chon e tabinaw rom, ara yalen ko nam rom.

4. Mang boch i fel’ngin reb e mabgol nib manigil?

⁴ Be yog e Bible ni mabgol e aram reb e tow’ath ni ke yib rok Got, ma bay boch i fel’ngin ni ngan un ko mabgol. I weliy Jehovah murung’agen e bin som’on e pumoon ni aram Adam ni gaar: “De fel’ ni nge par fare moon ni go ir. Bay gu ngongliy be’ ni nge chag ngak ngi i ayuweg.” (Genesis 2:18) I sunmiy Jehovah Efa ni nge mang leengin Adam, ma aram me sum e bin som’on e tabinaw ko girdi’. Faanra fakay ba wu’ e mabgol e bitir, ma thingari fel’ rogon e mabgol rorow nrayog ni ngar chuguliyew pi fakrow. Machane, gathi kemus ni yima mabgol ni bochan e ngan fakay e bitir.​—Psalm 127:3; Efesus 6:1-4.

5, 6. Uw rogon nrayog ni nge par reb e mabgol ni bod ba “yil’ i tal nni ngongliy u dalip yil’ e gaf”?

⁵ I yoloy Solomon ni Pilung ni gaar: “L’agruw e ba fel’ ko taareb, ni bochan e yow ra peth mi yow maruwel nib fel’ rogon. Faanra paraw bagayow me ayuweg bagayow nge sak’iynag. Machane faanra be’ ni goo ir  nra paraw, ma rib gafgow, ni bochan e dariy be’ nra ayuweg. . . . Ba yil’ i tal nni ngongliy u dalip yil’ e gaf e ba mo’maw’ ni nge math’.”​—Eklesiastes 4:9-12, BT.

⁶ Faanra ba fel’ reb e mabgol ma bod l’agruw i fager nrib fel’ thilrow nra bagayow ma be ayuweg bagayow, ma be fal’eg laniyan’, maku be ayuweg ndabi buch ban’en rok. T’ufeg e rayog ni nge gelnag e tha’ u thilin ba wu’ e mabgol. Machane ra gel boch e tha’ u thilrow ni faanra yow l’agruw ni yow be pigpig ngak Jehovah. Faanra aray rogon, ma aram e rayog ni nge par e mabgol rorow ni bod rogon ba “yil’ i tal nni ngongliy u dalip yil’ e gaf.” Dalip yil’ e gaf e kab gel nga l’agruw yil’. Rayog ni nge par reb e mabgol nib gel ni faanra bay Jehovah riy.

7, 8. Mang fonow e pi’ Paul u murung’agen e mabgol?

⁷ Tomuren nra mabgol l’agruw ni’, ma aram e rayog ni nge bagayow me rin’ e tin nib t’uf rok bagayow ni fan ko par ko pumoon nge ppin. (Proverbs 5:18) Machane faanra kemus fan ni nge un be’ ko mabgol, ma rib mom nra mel’eg be’ nde fel’ ni ngar mabgolgow. Aram fan ni be yog e Bible nib fel’ ni nge un be’ ko mabgol u tomuren e ngiyal’ ni ke pag e “bin baaram e yangar ni immoy riy nib gel e ar’ar u fithik’ i dow ni ma tay e piin fel’ yangaren,” ya aram e ngiyal’ ni kab gel e ar’ar rok ko par ko pumoon nge ppin. (1 Korinth 7:36, NW) Ere kab fel’ ni nge son be’ nge taw ko ngiyal’ nrayog rok ni nge gagiyegnag e biney e ar’ar ni bay rok. Aray e ngiyal’ nrayog ni nge lem me dugliy ban’en nib fel’ rogon.​—1 Korinth 7:9; James 1:15.

 ⁸ Faanra ga be lemnag ni ngam un ko mabgol, mab fel’ ndab mu pagtalin ni gubin e mabgol ni yad ra mada’nag e magawon. I yog Paul ni piin yad ra mabgol e yad ra ‘pirieg e gafgow ni be pirieg e piin ni mabgol.’ (1 Korinth 7:28) Mus ko tin th’abi fel’ e mabgol ni yad ma mada’nag e magawon. Ere, faanra kam dugliy ni ngam un ko mabgol, ma aram e ngam fal’eg i mel’eg e en ngam leay.

9, 10. Mang e ra buch ni faanra mu leay be’ nder ma pigpig ngak Jehovah?

⁹ Baaray reb i kenggin e motochiyel u Bible nib ga’ fan ndabi m’ay u wan’um u nap’an ni ngam mel’eg be’ ni ngam leay. Be gaar: “Dab mu guyed rogon ni ngam pachgad ngak e piin nde mich Got u wun’rad.” (2 Korinth 6:14) Re fanathin ney e bay rogon nga ban’en ni ma rin’ e pi tamilay’. Faanra ba thil ga’ngin ara gelngin l’agruw e gamanman, ma aram e dabi tayrow reb e tamilay’ nga taab mat’ ni ngar maruwelgow u taabang. Ya faanra rin’ e re n’ey, ma aram e ra gafgow fa gal gamanman. Ere ku arrogon e mabgol. Faanra leay reb e tapigpig rok Jehovah be’ nder ma pigpig ngak Jehovah, ma aram e rayog ni nge sum boor e magawon u thilrow. Aram fan ni be fonownagdad e Bible ni ngad mabgolgad “nrogon e mabgol ni ma tay e piin ni girdien Kristus.”​—1 Korinth 7:39.

¹⁰ Bay yu ngiyal’ ni ma lemnag boch e Kristiano ni kab fel’ e bin ni ngar leayed be’ nder ma pigpig ngak Jehovah ko bin ngar pared ni yigoo yad. Machane faanra dab da folgad ko fonow u Bible, mab ga’ ni  amith laniyan’ nge kireban’ e gad ra pirieg. Gadad e pi tapigpig rok Jehovah e pigpig rodad ngak e aram e n’en th’abi ga’ fan u lan e yafos rodad. Ere ra uw rogon u wan’um ni faanra dabiyog ni ngam rin’ew e en mabgol rom e n’en th’abi ga’ fan u wan’um u taabang ni bochan e ba thil e michan’ romew? Aram fan ni boor e Kristiano ni kar dugliyed ni ngar pared ni yad ba muchugbil ko bin ngar leayed be’ nde t’uf Jehovah rok maku der ma pigpig ngak.​—Mu beeg e Psalm 32:8.

11. Uw rogon ni ngam mel’eg be’ nib fel’ ni ngam leay?

¹¹ Re n’ey e der yip’ fan ni yugu demtrug be’ ni be pigpig ngak Jehovah nib fel’ ni ngam leay. Faanra ga be lemnag e mabgol, mag gay be’ nri ga baadag mab taareban’mew. Mu son nge taw ko ngiyal’ ni kam pirieg be’ ni taab n’en e gimew be nameg, ma kub m’on u wan’ e pigpig ni be tay ngak Got. Mu tay e tayim ni ngam beeg ma ga be fal’eg i lemnag boch e fonow nib manigil ni fan ko piin mabgol ni bay ko pi babyor ni ke ngongliy fare tapigpig nib yul’yul’.​—Mu beeg e Psalm 119:105.

12. Mang e rayog ni ngad filed u murung’agen e mabgol ni ma m’ag e gallabthir nrogon ni bay u Bible?

¹² Rogon e yalen u boch e nam e ba ga’ ni piin gallabthir e yad ma mel’eg e en nge leay fakrad, ya yima lemnag ni piin gallabthir e yad manang e en nib fel’ ni nge leay fakrad. Aray rogon e yalen kakrom nrogon ni bay u Bible. Ere faanra ke lemnag chon e tabinaw rom ni ngar folgad ko biney e yalen, ma aram e rayog ni nge ayuweg e Bible e piin gallabthir ni ngar nanged e pi fel’ngin ni ngar yaliyed rok be’ ni ngar mel’eged  ni nge leay fakrad. Bod nnap’an ni mel’eg Abraham be’ ni nge leay Isak ni fak, ma gathi salpiy ara liw rok e ir e sap Abraham ngay, ya rogon feni t’uf Jehovah rok.​—Genesis 24:3, 67; mu guy Yugu Boch e Thin 25.

13-15. (a) Mang e ba t’uf ni nge rin’ reb e pumoon ya nge yag ni mang reb i figirngiy nib manigil? (b) Mang e ba t’uf ni nge rin’ reb e ppin ya nge yag ni mang reb i leengiy nib manigil?

¹³ Faanra ga be lemnag e mabgol, ma fel’ ni ngam guy ko rriyul’ ni ke bung rogom nrayog ni ngam un  ko mabgol fa dawor. Sana ga be lemnag ni ke bung rogom, machane ngad weliyed boch ban’en nib t’uf ni nge rin’ be’ u m’on ni nge un ko mabgol, ya sana ga ra gin ko n’en bay riy.

¹⁴ Be yog e Bible nib thil e n’en nib milfan ko en figirngiy nge en leengiy u lan e tabinaw. Ere faanra nge bung rogom nrayog ni ngam un ko mabgol, ma n’en nib t’uf ni ngam rin’ e be yan u rogon ko gur reb e pumoon ara gur reb e ppin. Faanra be lemnag reb e pumoon e mabgol, mab t’uf ni nge fith ir ko ke bung rogon nrayog ni nge mang lolugen reb e tabinaw fa dawor. Baadag Jehovah ni nge ayuweg e en figirngiy leengin nge pi fak ko tin nib t’uf ko par rorad nge lanin’rad. Bin th’abi ga’ fan riy e ba t’uf ni nge yarmiy e en figirngiy rogon e liyor ni be tay chon e tabinaw rok ngak Got. Be yog e Bible ni faanra dabi ayuweg reb e pumoon chon e tabinaw rok ma “kab gel e kireb rok ngak be’ ndawori mich Got u wan’.” (1 Timothy 5:8) Ere faanra gur reb e pumoon ni ga be lemnag e mabgol, mag lemnag rogon nib puluw e re kenggin e motochiyel nu Bible ni baaray ngom ni be gaar: “Dab mu toy e naun rom ngam sunmiy reb e tabinaw nge mada’ ko ngiyal’ ni ka mu fal’eg rogon yungi flang rom, ni ke pagan’um nrayog ni ngam par rom.” Re n’ey e be yip’ fan nu m’on ni ngam un ko mabgol, ma susun e rayog rom ni ngam rin’ e n’en nib m’agan’ Jehovah ngay ni nge rin’ e en figirngiy.​—Proverbs 24:27, BT.

¹⁵ Reb e ppin ni be lemnag e mabgol e ba t’uf ni nge fith ir ko ke bung rogon nrayog ni nge rin’ e n’en  nib milfan ngak e en leengiy ara reb e matin fa dawor. Be weliy e Bible boch e kanawo’ ni ma ayuweg e en leengiy figirngin riy nge pi fak. (Proverbs 31:10-31) Ngiyal’ ney e boor e pumoon nge ppin ni kemus ni yigoo n’en ni nge rin’ e piin mabgol rorad ni fan ngorad e ir e yad ma lemnag. Machane bin riyul’ riy e, baadag Jehovah ni ngad lemnaged e n’en nrayog ni ngad rin’ed ni fan ko piin mabgol rodad.

16, 17. Faanra ga be lemnag e mabgol, ma mang e susun ni ngam fal’eg i lemnag?

¹⁶ U m’on ni ngam un ko mabgol, mag fal’eg i lemnag e n’en be yog Jehovah u murung’agen e piin figirngiy nge piin leengiy. Faanra nge mang reb e pumoon e en lolugen e tabinaw, ma gathi aram e be yip’ fan nrayog ni nga i gafgownag chon e tabinaw rok. Be’ ni lolugen e tabinaw nib manigil e ma folwok rok Jesus ni gubin ngiyal’ ni ma dag e t’ufeg nge gol ngak e piin ma ayuwegrad. (Efesus 5:23) Reb e ppin e ba t’uf ni nge lemnag e pi n’en nib t’uf ni nge rin’ ya nge yag ni dag ni be tayfan e pi n’en ke dugliy figirngin ma be fol rok. (Roma 7:2) Ba t’uf ni nge fith ir ko rayog rok ni nge par nib felfelan’ u tan pa’ reb e pumoon ndawori flont fa dabiyog. Faanra be lemnag ndabiyog, ma sana ba fel’ ndab kaa un ko mabgol e chiney.

¹⁷ Piin figirngiy nge piin leengiy e ba t’uf ni nge ga’ fan u wan’rad rogon ni nge par e en mabgol rorad nib felfelan’ mfin ra migidgad. (Mu beeg e Filippi 2:4.) I yoloy Paul ni gaar: “Urngin e pumoon e thingari t’uf rok leengin ni gowa ir, ma urngin e ppin ni thingari ta’ fan figirngin.” (Efesus 5:21-33) Gubin e  pumoon nge ppin nib t’uf ni ngar nanged ni yibe t’ufegrad ma yibe tay farad. Machane, faanra nge fel’ reb e mabgol, ma fare pumoon e rib t’uf ni nge nang ni be tay leengin fan ma fare pin e rib t’uf ni nge nang nib t’uf rok e en figirngin.

18. Mang fan nib t’uf ni nge kol ayuw l’agruw ni’ u nap’an ni yow be puruy’nag e mabgol?

¹⁸ Ngiyal’ ni be puruy’nag l’agruw ni’ e mabgol e aram e ngiyal’ ni ngar felfelan’gow mar guyew  rogon ni nge bagayow me nang rarogon bagayow nib fel’ rogon. Ireray e ngiyal’ ni ngar dugliyew ko ri yow baadag ni ngar parew u taabang u n’umngin nap’an e yafos rorow fa danga’. Ere aram fan nib t’uf ni ngar yul’yul’gow ngorow mar lemgow nib fel’ rogon. Ku ireray e ngiyal’ ni ngar filew rogon ni nge fel’ e numon u thilrow mar guyew rogon ni nge bagayow me nang e n’en bay u laniyan’ bagayow. Nap’an nra gel e chugur u thilrow, mab mudugil nra gel e adag rorow ngorow. Machane, ba t’uf ni ngar kol ayuwgow ko re n’ey ya ri chey mar rin’ew ban’en nde puluw u m’on ni ngar mabgolgow. Bin riyul’ e t’ufeg e ra ayuwegrow ni ngar t’arew lanin’row, miki ayuwegrow ndab rrin’ew ban’en nra magawonnag e tha’ u thilrow nge tha’ u thilrad Jehovah.​—1 Thessalonika 4:6.

19, 20. Uw rogon e mabgol u wan’ e piin Kristiano?

¹⁹ Boor ken e babyor nge kachido nra taw nga tungun min weliy murung’agen ara ni dag yaan reb e madnom ko m’agpa’ nib ga’ ma yib felfelan’ riy. Machane bin riyul’ riy e, rofen ni m’agpa’ e aram tabolngin e mabgol. I sunmiy Jehovah e mabgol ni nge par u n’umngin nap’an e yafos.​—Genesis 2:24.

²⁰ Ngiyal’ ney e boor e girdi’ ni yad ma tay ni mabgol e ban’en ndabi par nib n’uw nap’an. Ba mom ni yibe mabgol, ma kub mom ni yibe dar. Boch e girdi’ e yad ma lemnag nnap’an nra sum e magawon u lan  e mabgol rorad, ma aram e ngiyal’ ni ngar chuwgad ko en mabgol rorad me mus fare mabgol. Machane, dab mu pagtalin fare fanathin u lan e Bible ni murung’agen fare yil’ i tal nni ngongliy u dalip yil’ e gaf. Ba yil’ i tal ni aram rogon e yugu demtrug e gin nra matal ngay ma dabi math’. Faan gad ra sap ngak Jehovah ni nge ayuwegdad, ma aram e rayog ni nge par e mabgol rodad ndabi kireb. I gaar Jesus: “Thingari  dabi dareg e girdi’ e gali cha’ ni Got e ke chagiyrow.”​—Matthew 19:6.

21. Mang e ra ayuweg e en figirngiy nge en leengiy ni ngar t’ufegew yow?

²¹ Gad gubin ni bay e n’en gad ba gel riy maku bay e meewar rodad. Rib mom ni ngad pared ni yigoo meewar rok be’ e ir e gad be sap ngay, nib ga’ ni en mabgol rodad. Machane faan gad ra rin’ e re n’ey, ma dab da pirieged e felfelan’. Machane faan gad ra par ni yigoo fel’ngin e en mabgol rodad e gad be yaliy, ma rayog ni ngad pirieged e felfelan’ u lan e mabgol rodad. Ere gur, rayog ni ngaud pared ni gad be yaliy fel’ngin e en mabgol rodad ni yugu aram rogon ndawori flont? Arrogon! Manang Jehovah ndawor da flontgad, machane yigoo fel’ngidad e ma yaliy. Am susunnag ni faanra yigoo thibngidad e ma yaliy Jehovah. Be gaar fare psalmist: “Faan mang e mu tay ngan’um e kireb ni gamad be rin’, me mini’ e rayog rok ni nge thay ndab ni gechignag?” (Psalm 130:3) Rayog ni nge folwok e en figirngiy nge en leengiy rok Jehovah ni aram e ngaur sapgow nga fel’ngirow, mi yow gur ngaur n’agew fan e kireb rorow.​—Mu beeg e Kolose 3:13.

22, 23. Uw rogon ni ke dag Abraham nge Sarah e kanawo’ nib fel’ ni nge folwok e piin mabgol riy?

²² Ra i n’uw nap’an i yan ma aram e rayog ni nge gel reb e mabgol. Abraham nge Sarah e ba n’uw nap’an nra mabgolgow ma kub fel’ e mabgol rorow. Nap’an ni yog Jehovah ngak Abraham ni nge chuw u tafen u Ur, ma sana ke pag 60 e duw rok Sarah. Am  lemnag rogon feni mo’maw’ ngak ni nge n’ag tafen nga i par u lan e tent. Machane Sarah e ir reb e fager nib manigil ma taayuw rok figirngin, ma ri ku ma tayfan. Aram fan ni i tayfan e pi n’en ni i dugliy Abraham maku be ayuweg ni nge yan i aw nga rogon e tin be dugliy.​—Genesis 18:12; 1 Peter 3:6.

²³ Riyul’ ni faanra ba fel’ e mabgol rok l’agruw ni’ ma gathi be yip’ fan ni gubin ban’en nra i taareban’row ngay. Immoy bayay nde m’agan’ Abraham ko n’en ke yog Sarah, ma aram me gaar Jehovah ngak: “Mu rin’ e tin ni ke yog Sarah ngom.” Ireray e n’en ni rin’ Abraham, me yib angin nib fel’. (Genesis 21:9-13) Faanra bay yu ngiyal’ nder taareban’mew e en mabgol rom, ma dabi mulan’um. N’en nib ga’ fan e mus ni faanra bay ban’en nder taareban’mew ngay, ma nge bigimew me dag e t’ufeg nge tayfan ngak bigimew.

24. Uw rogon ni ngad n’ufed Jehovah u lan e mabgol rodad?

²⁴ Bokum biyu’ e mabgol u lan e ulung ni Kristiano nib fel’ e mabgol rorad. Faanra ga baadag ni ngam un ko mabgol, ma dab mu pagtalin ni cha’ ni ga ra mel’eg ni ngam leay e aram reb e ban’en nrib ga’ fan ni ga ra dugliy u lan e yafos rom. Re n’ey e ra rin’ ban’en nga rogon e par rom boch nga m’on. Ere mu sap ngak Jehovah ni nge pow’iyem. Faan ga ra rin’ ni aray rogon, ma aram e rayog ni ngam mel’eg be’ nib fel’ ni ngam mabgolgow, mu kum rin’ e n’en nib t’uf ni ngam rin’ u m’on ni ngam un ko mabgol, me yag ni par e mabgol rom nib gel ma bay e t’ufeg riy ma ga be n’uf Jehovah.