GURUY NI 16
Mu Togopuluw Ngak Moonyan’
“Mi gimed togopluw ngak fare moonyan’, me mil romed.”—JAMES 4:7.
1, 2. Mang e ba t’uf ni ngad nanged u murung’agen Satan nge pi moonyan’?
RIB manigil rogon e par u lan e bin nib beech e fayleng rok Jehovah boch nga m’on. Aram e ngiyal’ nra sul e par rodad nge bod rogon ni lemnag Got ko som’on. Machane chiney e gad be par u reb e fayleng ni be gagiyegnag Satan nge pi moonyan’ rok. (2 Korinth 4:4) Yugu aram rogon ndabiyog ni ngad guyed yad, machane rriyul’ ni yad bay ma rib gel gelngirad.
2 Re guruy ney e gad ra weliy riy rogon nrayog ni ngad pared ni gad ba chugur ngak Jehovah mad ayuweged gadad rok Satan. Ke micheg Jehovah nra ayuwegdad. Machane ba t’uf ni ngad nanged boch e kanawo’ ni ma fanay Satan nge pi moonyan’ ni ngar bannaged gadad riy mu kur chamgad ngodad.
“BOD BA LAYON NI BE TOLUL”
3. Mang e baadag Moonyan’ ni nge rin’ ngodad?
3 Be yog Satan ni ma liyor e girdi’ ngak Jehovah ni bochan e pi n’en ni be yag riy ngorad, ma gad ra tal ko pigpig ni gad be tay ngak ni faan gad ra mada’nag e magawon nib pag feni mo’maw’. (Mu beeg e Job 2:4, 5.) Nap’an nra dag be’ ni baadag ni nge fil murung’agen Jehovah, ma manang Satan nge pi moonyan’ e re n’ey, ere yad ma guy rogon ni ngar taleged. Yad ma damumuw u nap’an nra ognag be’ ir ngak Jehovah nge un ko taufe. Ke taarebrogonnag e Bible Moonyan’ nga “ba layon ni be tolul, ni be gayiy be’ ni nge longuy.” (1 Peter 5:8) Baadag Satan ni nge kirebnag e tha’ u thildad Jehovah.—Psalm 7:1, 2; 2 Timothy 3:12.
Ma damumuw Satan u nap’an ni gad ra ognaged gadad ngak Jehovah
4, 5. (a) Mang e dabiyog rok Satan ni nge rin’? (b) Mang e be yip’ fan ni ngan “togopluw ngak fare moonyan’”?
4 Machane dariy rogon ni ngad rusgad ngak Satan nge pi moonyan’ rok. Ke tay Jehovah ni bay e gin ni ngar musgad riy ko tin nrayog ni ngar rin’ed ngodad. Ke micheg Jehovah ni bay ba ulung i girdi’ ni “pire’ ni pire’” ni yad boch e tin riyul’ e Kristiano ni yad ra magey ni yad ba fos u tomuren “fare gafgow ni ba ga’.” (Revelation 7:9, 14) Dariy ban’en nrayog ni nge rin’ Moonyan’ ni nge taleg e re n’ey ndabi buch ni bochan e be ayuweg Jehovah e girdi’ rok.
5 Faan gad ra par ni gad ba chugur ngak Jehovah, ma dabiyog ni nge kirebnag Satan e tha’ u thildad. Be micheg e Thin rok Got ni be gaar: “I Somol e bay romed u n’umngin nap’an ni gimed bay rok.” (2 Kronicles 15:2, BT; mu beeg e 1 Korinth 10:13.) Boor e pumoon nge ppin kakrom ni yad ba yul’yul’ ni bod Abel, nge Enok, nge Noah, nge Sarah, nge Moses nra togopuluwgad ngak Moonyan’ ni aram e ur pared ni yad ba chugur ngak Jehovah. (Hebrews 11:4-40) Ku arrogodad nrayog ni ngad rin’ed e re n’ey. Be micheg e Thin rok Got ni gaar: “Mi gimed togopluw ngak fare moonyan’, me mil romed.”—James 4:7.
“GADAD BE CHAM”
6. Uw rogon ni ma cham Satan ngodad?
6 Yugu aram rogon ni manang Satan ni ke tay Jehovah ni bay e gin ni nge mus riy ko tin nrayog ni nge rin’ ngodad, machane ra guy rogon ni nge rin’ urngin ban’en nrayog rok ni nge palognag e tha’ u thildad Got. Ngiyal’ ney e ba thilthil e kanawo’ ni ma cham Moonyan’ riy ngodad, ma pi kanawo’ ney e ke yan bokum biyu’ e duw ni ma fanay. Mang boch ko pi n’ey?
7. Mang fan ni be cham Satan ko girdi’ rok Jehovah?
7 I yoloy apostal John ni gaar: “Tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Re fayleng nib kireb ney e Satan e be gagiyegnag, maku baadag ni nge gagiyegnag e girdi’ rok Jehovah. (Mikah 4:1; John 15:19; Revelation 12:12, 17) Manang Moonyan’ ndab ki n’uw nap’an ni nge par, ere rib gel e towasar ni be tay ngodad ya nge dab kud yul’yul’gad ngak Got. Yu ngiyal’ e ba gagiyel e cham ni ma tay Moonyan’ ngodad, machane yu ngiyal’ e ma cham ngodad u boch e kanawo’ nib mo’maw’ ni ngan nang.
8. Mang e ba t’uf ni nge reb e Kristiano me nang?
8 Be gaar e Efesus 6:12: “Gadad be cham . . . [nga] gelngin e kan u lan e lang.” Ra reb e Kristiano ma be cham ngak Satan nge pi moonyan’. Ba t’uf ni ngad nanged ni gubin e piin kar ognaged yad ngak Jehovah e yad be un ko re cham ney. Dalip yay ni pi’ apostal Paul e athamgil nga laniyan’ e pi Kristiano u Efesus u lan fagi babyor ni yoloy nge pi’ ngorad ni ngar ‘pired ni kar fal’eged rogorad.’—Efesus 6:11, 13, 14.
9. Mang e ma guy Satan nge pi moonyan’ rogon ni ngar rin’ed ngodad?
9 Boor e kanawo’ ni ma guy Satan nge pi moonyan’ rogon ni ngar bannaged gadad riy. Ra ke yag ni ngad gelgad ngak Satan u reb e kanawo’, ma aram e gathi be yip’ fan ndabkiyog ni nge gel ngodad u yugu reb e kanawo’. Ma guy Moonyan’ rogon ni nge pirieg e pi meewar rodad ya nge yag ni nang e re miti wup ni nge fanay ni ngad awgad ngay. Machane rayog ni nge dabi koldad Moonyan’ ni bochan e be fil e Bible ngodad murung’agen e pi wup ni ma fanay. (2 Korinth 2:11; mu guy Yugu Boch e Thin 31.) Reb ko pi wup nem e aram ngongolen e pig.
MU PALOGNAGEM KO PI MOONYAN’
10. (a) Mang ngongolen e pig? (b) Uw rogon ngongolen e pig u wan’ Jehovah?
10 Ra un be’ nga ngongolen e pig, ma aram e be non ko pi moonyan’ u daken boch e ngongol ni bay rogon ko pi kan nib kireb ni bod rogon e bey, nge falayin e fal’egyan’ fa adag, ara pong thagith. Be yog e Bible ngodad ni ngongolen e pig e ba “sonogor,” ma dabiyog ni ngad uned nga ngongolen e pig ma ka gad be liyor ngak Jehovah. (Deuteronomy 18:10-12, BT; Revelation 21:8) Piin Kristiano e thingar ra siyeged urngin mit ngongolen e pig.—Roma 12:9.
11. Mang e rayog ni nge buch rodad ni faanra gad baadag ni ngad nanged murung’agen ngongolen e moonyan’?
11 Manang Satan ni faan gad ra adag ngongolen e moonyan’, ma aram e ra mom ngak ni nge waliydad ni ngad uned nga ngongolen e pig. Gubin mit ngongolen e pig nra kirebnag e tha’ u thildad Jehovah.
MA GUY SATAN ROGON NI NGE BANNAGDAD
12. Mang e baadag Satan ni nge rin’ ko lem rodad?
12 Ma guy Satan rogon ni nge athukuy laniyan’ e girdi’. Ma guy rogon ni nge maruwar laniyan’ e girdi’ u boch ban’en ni buchuuw ma buchuuw, nge mada’ ko ngiyal’ ni ka rogned e ‘kireb ko manigil mi yad yog e manigil ko kireb.’ (Isaiah 5:20) Ma garereg Moonyan’ fare lem ni fonow nu Bible e dariy angin, ma rayog ni nge gel boch e felfelan’ rodad ni faanra dab da folgad ko pi motochiyel rok Got.
13. Uw rogon ni ke guy Satan rogon ni nge maruwarnag lanin’uy?
13 Re n’ey ni ngan guy rogon ni nge maruwar laniyan’ e girdi’ u boch ban’en e aram reb e ban’en ni ma fanay Satan nri ma yib angin. Ke n’uw nap’an ni ma rin’ e re n’ey. U lan fare milay’ nu Eden, me guy rogon ni nge maruwar laniyan’ Efa u nap’an ni fith ngak ni gaar: “Rriyul’ ni yog Got ngomew ni dab mu koyew wom’engin urngin e gek’iy ni ba’ ko gi woldug ney?” (Genesis 3:1) Boch nga tomuren u nap’an Job, miki fith Satan ngak Jehovah u p’eowchen e pi engel ni gaar: “Gur ra i par Job ni ba’ madgum u wan’ ni faanra der yib e fel’ riy ngak?” (Job 1:9) Tomuren nni taufenag Jesus miki skengnag Satan ni aram e gaar ngak: “Faanra Fak Got gur, me ere mu non ko pi malang ney nge ngal’ ni flowa.”—Matthew 4:3.
14. Uw rogon nrayog ni nge k’aring Satan e girdi’ ni ngar lemnaged ndariy e riya’ u ngongolen e pig?
14 Ngiyal’ ney e ku ma guy Satan rogon ni nge maruwarnag lanin’uy. Ma guy rogon ni nge k’aring e girdi’ ni nge maruwaran’rad ko rriyul’ nib kireb ngongolen e pig fa danga’. Rogon ni ma rin’ e re n’ey e aram e ma n’igin ni nge m’ug ni bay boch ban’en riy nde kireb. Bay boch e Kristiano ndarur tedan’rad ko re n’ey. (2 Korinth 11:3) Ere mang e ngad rin’ed ya nge yag nda ayuweged gadad? Uw rogon ni ngad guyed rogon ndabi bannagdad Satan? Ngad weliyed l’agruw e kanawo’ nrayog ni nge bannagdad Satan riy ni aram e: pi n’en yima chuweg e chalban ngay nge boch e tafalay ni yima un ngay.
MA BANNAGDAD SATAN U DAKEN E PI N’EN GAD BAADAG
15. Uw rogon nrayog ni ngad uned nga ngongolen e moonyan’ u daken e pi n’en gad ma chuweg e chalban rodad ngay?
15 Ngiyal’ ney e boor e kachido, nge video, nge program ni yima pag u TV, nge boch ban’en ni yima fafel ngay ko computer, nge yu yang ko Internet ni yima dag yaan ngongolen e pig riy nge ngongolen e moonyan’. Boor e girdi’ ni yad ma lemnag ndariy ban’en nib kireb ko pi n’ey, ma darur lemnaged ni bay e riya’ riy ni faan yad ra un nga ngongolen e moonyan’. Ku rayog ni nge un be’ nga ngongolen e pig u daken e pi n’en ma yog e piin yad ma fanay boch ban’en u lan e lang, nge wol u lan paay, nge kat ni nga rogned e n’en nra buch rok be’ nga m’on. Ma n’igin Moonyan’ ni ngan lemnag ndariy e riya’ ko pi n’ey, me guy rogon ni nge m’ug ni pi n’ey e bogi ban’en nib mo’maw’ ni ngan nang fan, ma ra k’aring e girdi’ ni ngar adaged ni ngar nanged murung’agen, maku ban’en ni yira felfelan’ ngay. Rayog ni nge lemnag be’ ndariy ban’en nib kireb riy ni nga i yaliy yaan ngongolen e pig ara ngongolen e moonyan’ ni faanra dabi un ko pi ngongol nem. Mang fan ni bay e riya’ ko biney e lem?—1 Korinth 10:12.
16. Mang fan nsusun e ngad siyeged e pi n’en yima chuweg e chalban ngay ni bay murung’agen ngongolen e moonyan’ riy?
16 Dabiyog ni nge guy Satan nge pi moonyan’ e n’en bay u lanin’dad. Machane rayog ni ngar nanged e pi n’en gad baadag nge rogon ni gad ma lem, ni aram e yad ma yaliy e pi n’en gad ma dugliy ni fan ngodad nge chon e tabinaw rodad nib muun ngay e pi n’en gad ma mel’eg ni ngad chuweged e chalban rodad ngay. Faan gad ra mel’eg e kachido, ara musik, ara babyor ni bay murung’agen e pi sothuw riy, ara be’ ni kan pig ngak, ara girdi’ ni ke ying e moonyan’ ngak, ara girdi’ ni ma pig, ara vampire, ara yugu boch ban’en ni taareb rogon ko pi n’ey, ma aram e ra nang Satan nge pi moonyan’ ni gad baadag ni ngad nanged murung’agrad. Ku rayog ni ngar k’aringed gadad ni ngkud uned nga yugu boch i ngongolen e pig nib gel e kireb riy.—Mu beeg e Galatia 6:7.
17. Faanra gad baadag ni nge par fithik’ i dowdad nib fel’, ma uw rogon ni ku rayog ni nge fanay Satan e re n’ey ni nge bannagdad?
17 Faanra gad baadag ni nge par fithik’ i dowdad nib fel’, maku rayog ni nge fanay Satan e re n’ey ni nge bannagdad. Ngiyal’ ney e boor e girdi’ ni ke m’ar. Ere rayog ni nge un be’ nga boor mit e tafalay, machane der yib angin. (Mark 5:25, 26) Bochan nri baadag ni nge gol ko m’ar rok, ma rayog ni nge m’agan’ ngay ni nge un nga urngin mit e tafalay. Machane gadad e piin Kristiano e ngad kol ayuwgad ndab da uned ngab mit e tafalay ni bay rogon nga ngongolen e “pig.”—Isaiah 1:13, NW.
Mu taga’ ngak Jehovah u nap’an ni kam m’ar
18. Ba miti mang tafalay e nge siyeg e piin Kristiano?
18 Kakrom u Israel e immoy boch e girdi’ ni ur uned nga ngongolen e “pig.” Ere gaar Jehovah ngorad: “Gimed ra pug pa’med nga lang ngam meybilgad ngog ma dab gu sap ngomed. Demturug gelngin e meybil ni gimed ra tay ma dab gu telig ngomed.” (Isaiah 1:15) Am lemnag e re n’ey—dabi motoyil Jehovah ko meybil rorad! Dubdad ni ngad rin’ed ban’en nra kirebnag e tha’ u thildad Jehovah ma dabki ayuwegdad, nib ga’ nu nap’an ni kad m’argad. (Psalm 41:3) Ere thingar da fal’eged i gay murung’agen e pi tafalay ni gad ma un ngay, ya nge yag nda nanged ko bay rogon nga ngongolen e pig ara ngongolen e moonyan’ fa danga’. (Matthew 6:13) Faanra bay rogon ngay, mab t’uf ni ngad siyeged!—Mu guy Yugu Boch e Thin 32.
BOCH BAN’EN U MURUNG’AGEN E PI MOONYAN’
19. Uw rogon ni ke k’aring Moonyan’ e marus ngak boor e girdi’?
19 Yugu aram rogon ni bay boch e girdi’ ni yad ma lemnag ni Satan nge pi moonyan’ e yugu bogi ban’en ni kan susunnag, machane bay boch e girdi’ ni yad manang nriyul’ ni bay Satan nge pi moonyan’ ni bochan e n’en ke buch rorad. Boor e girdi’ ni yad ma rus ko pi kan nib kireb, ma kar manged sib u boch e yalen nde riyul’ ni ke mich u wan’uy. Ku bay boch e girdi’ ni yad ma k’aring e girdi’ ni ngar rusgad ko pi moonyan’ ni aram e yad ma weliy rogon ni ke gafgownag e pi moonyan’ boch e girdi’. Ba ga’ ni baadag e girdi’ ni ngar nanged murung’agen e pi n’ey, maku yad baadag ni ngar weliyed ngak yugu boch e girdi’. Pi n’ey ni yima weliy e ba ga’ ni ma k’aring e girdi’ ni ngar rusgad ngak Moonyan’.
20. Uw rogon nrayog ni ngad uned i wereg e pi ban rok Satan?
20 Am lemnag e re n’ey—baadag Satan ni nge rus e girdi’ ngak. (2 Thessalonika 2:9, 10) Ir be’ ni ma lifith l’ugun ma manang rogon ni nge gagiyegnag e lem rok e piin yad baadag ngongolen e pig, me k’aringrad ni nge mich u wan’rad bogi ban’en nde riyul’. Pi girdi’ nem e rayog ni ngaur weliyed murung’agen boch ban’en ni yad be lemnag ni kar guyed ara kar rung’aged laman. Faanra un par ni yibe weliy e pi n’em, ma aram e rayog ni ngan weliy nge thum’ nga wuru’. Dubdad ni ngad uned i weliy murung’agen boch ban’en ni aray rogon, ma gad ayuweg Satan ni nga i k’aring e marus ko girdi’.—John 8:44; 2 Timothy 2:16.
21. Mang e rayog ni ngaud weliyed ko bin ni ngaud weliyed murung’agen e pi moonyan’?
21 Faan gomanga riyul’ ni ke guy reb e girdi’ rok Jehovah e kan kafram, ma dabi sul nga i weliy murung’agen e pi n’em ngak yugu boch e girdi’. De t’uf ni nge rus e girdi’ rok Jehovah ko n’en nrayog ni nge rin’ Satan nge pi moonyan’ rok. Ya ba t’uf ni ngad tedan’dad ngak Jesus nge gelngin ni ke pi’ Jehovah. (Hebrews 12:2) Da i weliy Jesus murung’agen e pi moonyan’ ngak pi gachalpen, ya i tiyan’ ko fare thin nib fel’ ni murung’agen Gil’ilungun Got nge “pi n’en nib sorok Got ni ke ngongliy.”—Acts 2:11; Luke 8:1; Roma 1:11, 12.
22. Mang e kam dugliy ni ngam rin’?
22 Dab da paged talin ni n’en ni be nameg Satan e nge kirebnag e tha’ u thildad Jehovah. Ere ra rin’ gubin ban’en nrayog rok ni nge buch e re n’ey. Machane gad manang e pi ban ni ma fanay Satan, ma kad dugliyed u wan’dad ni ngad siyeged gubin ban’en ni bay rogon nga ngongolen e pig. Dab da “binged e kanawo’ ngak moonyan’” ni nge muleg lanin’dad. (Mu beeg e Efesus 4:27.) Arrogon, faan gad ra togopuluw ngak Moonyan’, ma aram e rayog ni ngad pared ni gad ba palog ko pi ban rok, ma gad par u tan pa’ Jehovah ndabi buch ban’en rodad.—Efesus 6:11.