1. Mang e i magafan’ Jesus ngay ko fare nep’ u m’on ni nge yim’?

 ROFEN nem e aram fare nep’ u m’on ni yim’ Jesus. Manang ndab ki n’uw nap’an me pag pi gachalpen, ma be magafan’ nga rarogorad boch nga m’on. Ere gaar ngorad: “Kug mel’egmed u fithik’ e girdi’ nu fayleng, ni gathi ki gimed boch i yad.” (John 15:19) Boch nga tomuren, ma aram me yibilayrad ngak e Chitamangin ni gaar: “Gathi yad e girdi’ nu roy u fayleng ni bod gag ni gathi gag e girdi’ nu fayleng.” (John 17:15, 16) Mang fan e re thin ney ni yog Jesus?

2. Mini’ e be yip’ fan e “girdi’ nu roy u fayleng” ni faani weliy Jesus murung’agen?

² Fapi “girdi’ nu roy u fayleng” ni weliy Jesus murung’agen e be yip’ fan e girdi’ ndar nanged Got ma Satan e ir e be gagiyegnagrad. (John 14:30; Efesus 2:2; James 4:4; 1 John 5:19) Ere, uw rogon ni ngad pared ni gad ba dar ko re “fayleng” ney? U lan e re guruy ney e gad ra weliy riy boch e kanawo’ nrayog ni ngad rin’ed e re n’ey riy, ni aram e: Ngad pared ni gad ba yul’yul’ nga Gil’ilungun Got ma gad par u mathilin ngongolen e am, ma gad siyeg e lem nu fayleng, me yalen e munmad rodad nge rogon ni gad ma fal’eg yaadad, me puluw e lem rodad u murung’agen e salpiy. Maku  reb e, nga don’ed nga dakendad urngin e pi talin e cham ni ke pi’ Got ngodad.​—Mu guy Yugu Boch e Thin 16.

3. Uw rogon ngongolen e am u wan’ Jesus?

³ Nap’an ni immoy Jesus u fayleng, ma i guy ni boor e magawon ko girdi’ mab mo’maw’ rogon e par rorad. Ere ri ma lemnagrad ma baadag ni nge ayuwegrad. Machane gur, i mang reb e tayugang’ ko am, fa? Danga’, ya manang ni Gil’ilungun Got ara am rok Got e aram e n’en nib t’uf ko girdi’. Jesus e ir e ra mang Pilung ko re Am nem, ma aram kenggin e machib ni i tay. (Daniel 7:13, 14; Luke 4:43; 17:20, 21) Da i un Jesus nga ngongolen e am, ma gubin ngiyal’ ni ma par u mathilin ngongolen e am. Nap’an nni fek nga p’eowchen Pontius Pilate ni ir e Governor nu Roma, ma aram me gaar: “Gin nsuwog e dariy u roy u fayleng!” (John 18:36) Ku arrogon pi gachalpen Jesus ni ur pared u mathilin ngongolen e am. Be yog ba ken e babyor ni pi Kristiano kakrom e “da ur feked boch e liw nib tolang ko am.” (On the Road to Civilization) Ku arrogon e lem rodad e tin riyul’ e Kristiano e ngiyal’ ney. Gad ma par ni gad ba yul’yul’ nga Gil’ilungun Got, ma gad ma par u mathilin ngongolen e am ko re fayleng ney.​—Matthew 24:14.

4. Uw rogon ni ma ayuweg e tin riyul’ e Kristiano Gil’ilungun Got?

⁴ Piin yad ma maruwel u reb e nam ni owchen e am rorad e darur uned ko pi n’en yima rin’ ko fare nam ni yad be maruwel riy. Piin kan dugliyrad ni yad be athapeg ni ngar uned ngak Kristus ko gagiyeg u tharmiy e  taareb rogorad ko pi girdi’ ney. I yol Paul ngak e pi Kristiano ni kan dugliyrad ni gaar: “Gamad e piin owchen Got ni gamad be maruwel ni pa’ Kristus.” (2 Korinth 5:20, NW) Piin kan dugliyrad e yad owchen e am rok Got. Ere, darur uned nga ngongolen e am ko re fayleng ney. (Filippi 3:20) Bin riyul’ riy e, piin kan dugliyrad e bokum milyon e girdi’ ni kar ayuweged ni ngar filed murung’agen e am rok Got. Ma “yugu boch e saf” ni yad be athapeg e yafos ni manemus u lan e bin nib beech e fayleng rok Got e yad ma ayuweg e piin kan dugliyrad. Maku arrogorad ni yad ma par u mathilin ngongolen e am. (John 10:16; Matthew 25:31-40) Ere, tin riyul’ e Kristiano e dariy bagayad ni ma un nga ngongolen e am ko re fayleng ney.​—Mu beeg e Isaiah 2:2-4.

5. Mang reb i fan nder ma un e piin Kristiano ko mahl?

 ⁵ Tin riyul’ e Kristiano e yad ma tay ni gubin e piin taareb e michan’ rorad e yad taab tabinaw, ma yad ma par nib taareban’rad ni yugu demtrug e nam rorad ara rarogon e gin kar bad riy. (1 Korinth 1:10) Ere faan gad ra un ko mahl, ma aram e gad ra cham ngak e piin gad ma tay ni ku yad boch i chon e tabinaw rodad, mab taareb e michan’ rodad, ni aram e piin ke tay Jesus chilen ngodad ni ngaud t’ufeged yad. (John 13:34, 35; 1 John 3:10-12) Maku reb e, ki yog Jesus ngak pi gachalpen ni ngar t’ufeged e pi toogor rorad.​—Matthew 5:44; 26:52.

6. Uw rogon e pi am u wan’ e pi tapigpig rok Jehovah?

⁶ Gadad e piin Kristiano e yugu aram rogon ni gad ma par u mathilin ngongolen e am, ma gad ma guy rogon ni ngad pared ni gad boch i girdien e nam nib fel’ e ngongol rodad. Bod ni gad ma tayfan e am ni aram e gad ma fol ko pi motochiyel rorad ma gad ma pi’ e tax. Machane, ku gad ma guy rogon ni ngad pied ngak “Got e tirok Got ban’en.” (Mark 12:17; Roma 13:1-7; 1 Korinth 6:19, 20) “Tirok Got ban’en” nthingar da pied ngak e ba muun ngay e t’ufeg rodad ngak, nge rogon ni gad be fol rok, nge liyor rodad ngak. Ba m’agan’dad ngay ni ngad paged fan e pogofan rodad ko bin nge dab da folgad rok Jehovah.​—Luke 4:8; 10:27; mu beeg e Acts 5:29; Roma 14:8.

7, 8. Mang fare “lem nu roy u fayleng,” ma mang e ma rin’ ko girdi’?

⁷ Ra ngad pared ni gad ba dar ko fayleng rok Satan, ma aram e be yip’ fan ndab da paged e “lem nu roy u  fayleng” ni nge gagiyegnagdad. Aram rogon e lem nge ngongol ni ke yib rok Satan, ni ir e be gagiyegnag e piin ndarur pigpiggad ngak Jehovah. Machane, piin Kristiano e yad ma siyeg e mit ney e lem. I yog Paul ni “gathi lem nu roy u fayleng e ir e ke yog ngodad; ya fare Kan ni Thothup [“gelngin Got nib thothup,” NW] ni Got e l’og e ir e ke yog ngodad.”​—1 Korinth 2:12; mu guy Yugu Boch e Thin 17.

⁸ Lem nu fayleng e ma k’aring e girdi’ ni ngar pared ni yigoo yad e yad be lemnagrad, ma yad ba ufanthin, ma yad be togopuluw. Ma k’aring e girdi’ ni ngar lemnaged nde t’uf ni ngar folgad rok Got. Baadag Satan ni nge rin’ e girdi’ e tin yad baadag ni ngar rin’ed ndab ra lemnaged e n’en nra buch nga tomuren. Baadag ni nge mich u wan’ e girdi’ ni “tin nib tagan ban’en ni yima ar’arnag, [nge] tin nra guy e girdi’ ma yad ba adag ni nge yog ngorad” e aram e n’en th’abi ga’ fan u lan e yafos rorad. (1 John 2:16; 1 Timothy 6:9, 10) Ri be athamgil Moonyan’ u rogon nrayog rok ni nge bannag e pi tapigpig rok Jehovah me k’aringrad ni ngaur lemgad ni bod ir.​—John 8:44; Acts 13:10; 1 John 3:8.

9. Uw rogon nrayog ni nge magawonnagdad e lem nu fayleng?

⁹ Ke liyegdad e lem nu roy u fayleng ni bod rogon e nifeng ni yima pogofannag. Faanra dab da guyed rogon ni ngad siyeged e re lem ney, ma aram e rayog ni nge magawonnagdad. (Mu beeg e Proverbs 4:23.) Rayog ni nge tabab e re n’ey u boch e kanawo’ ni gathi rib gagiyel, ni bod rogon ni ngad paged e lem rok e piin ndarur pigpiggad ngak Jehovah ni nge gagiyegnagdad. (Proverbs 13:20; 1 Korinth 15:33) Fa  reb e rayog ni ngad adaged ni ngaud yaliyed yaan e ngongol ni puwlag, ara ngad motoyilgad ngak e piin kar paged e bin riyul’ e liyor ma kar chelgad yad be togopuluw ngay, ara boch e gosgos nib gel e tagenging riy.​—Mu guy Yugu Boch e Thin 18.

10. Uw rogon ni ngad siyeged e lem nu fayleng?

¹⁰ Ere uw rogon ni nge dab da paged e lem nu fayleng ni nge gagiyegnagdad? Ba t’uf ni ngad pared ni gad ba chugur ngak Jehovah ma gad pag e gonop rok ni nge pow’iydad. Thingar ud ninged gelngin nib thothup u daken e meybil ma gad fanay e tayim rodad ni fan ko pigpig ni gad be tay ngak. Jehovah e Ir e th’abi gel gelngin u ga’ngin e palpalth’ib. Ba pagan’dad nra ayuwegdad ni ngad siyeged e lem nu fayleng.

11. Mang e ke rin’ e lem nu fayleng nga rogon e munmad ni ma tay e girdi’?

¹¹ Ku gad ma dag ni gathi gad bang ko re fayleng ney u rogon e munmad ni gad ma tay nge rogon ni gad ma fal’eg yaadad. Boor e girdi’ nu fayleng e yad ma munmad u reb e kanawo’ ni ngar faled mit e girdi’ ngorad, ara ngar k’aringed yugu boch e girdi’ ni ngar lemnaged boch ban’en nde puluw, ara ngar daged ni yad be togopuluw, ara nge gagiyel farad flaab. Ma yugu boch e girdi’ e dariy fan yaarad u wan’rad. Girdi’ ni aray rogon e sana rayog ni kar dugliyed ni ngar pared nib wagagey rogon e par rorad ara yad ba alit. Dabiyog ni ngad paged e pi lem ney ni nge gagiyegnag rogon e munmad ni gad ma tay nge rogon ni gad ma fal’eg yaadad.

12, 13. Mang boch i kenggin e motochiyel nsusun e nge ayuwegdad u rogon ni ngad mel’eged e re miti mad ni ngad chuwgad ngay?

 ¹² Gadad e pi tapigpig rok Jehovah e gubin ngiyal’ ni gad baadag ni ngad munmadgad u reb e kanawo’ nib yaram, mab beech, mab manigil, ma kub m’ag ko n’en gad be rin’. Gad ma gonopiy rogon e ‘mad rodad nge yan i par nib fel’ rogon, ma gad ma yin’ e mad nrogon yalen e munmad,’ ya nge m’ug ni gadad “girdien Got.”​—1 Timothy 2:9, 10; Jude 21.

 ¹³ Rogon e munmad ni gad ma tay e rayog ni nge rin’ ban’en nga rogon ni ma lemnag e girdi’ Jehovah nge pi tapigpig rok. Gad baadag ni ngad rin’ed urngin ban’en ni “fan e nga nog e sorok riy ngak Got.” (1 Korinth 10:31) Faanra gad manang e gin ngad musgad riy mab muun ngay ni ngaud ted fan laniyan’ yugu boch e girdi’. Ere, nap’an ni gad be mel’eg e mad rodad ara gad be dugliy rogon yaadad ni nge yan i par, ma susun e dab da paged talin ni pi n’en gad ma mel’eg e ku ra rin’ ban’en ngak yugu boch e girdi’.​—1 Korinth 4:9; 2 Korinth 6:3, 4; 7:1.

14. Mang e susun ni ngad lemnaged u nap’an ni gad be mel’eg e mad ni ngad chuwgad ngay ko muulung ara machib?

¹⁴ Uw rogon e mad ni gad ma chuw ngay u nap’an e muulung ara machib? Gur, gad ma guy rogon ni ngad faled mit e girdi’ ngodad? Gad ma k’aring e tamra’ ngak boch e girdi’ ni bochan e mad ni gad ma chuw ngay, fa? Gad ma lemnag nrogon e munmad ni gad ma tay e dariy rogon ngak be’, fa? (Filippi 4:5; 1 Peter 5:6) Riyul’ ni ka ban’en ni bay rodad ni gad baadag ni nge m’ug nib fel’ yaadad, machane pi fel’ngin e Kristiano ni bay rodad e aram e n’en nra fal’eg yaadad. Ireray e pi fel’ngin ni ma yaliy Jehovah rodad. Pi fel’ngin ney e ma dag e bin riyul’ i rarogodad ndabi guy e girdi’ “ni ir e ba ga’ fan u mit Got.”​—1 Peter 3:3, 4.

15. Mang fan ndawori pi’ Jehovah e motochiyel ngodad ni be yog rogon e munmad ni ngaud ted nge rogon ni ngaud fal’eged yaadad?

¹⁵ Dawori pi’ Jehovah boch e motochiyel ngodad  ni be yog rogon e re miti mad ni ngad chuwgad ngay nge tin dab da chuwgad ngay. Ya ke pi’ e pi kenggin e motochiyel u Bible nrayog ni nge ayuwegdad ni ngad mel’eged e tin nib fel’ ban’en. (Hebrews 5:14) Baadag ni gubin ban’en ni ngad dugliyed ndemtrug ko ban’en nib ga’ fa ba achig, ma ngad rin’ed u fithik’ e t’ufeg rodad ngak nge girdi’. (Mu beeg e Mark 12:30, 31.) Pi tapigpig rok Jehovah u ga’ngin yang e fayleng e ba thilthil yaan e mad ni yad ma chuw ngay ya be yan u rogon e yalen ko nam rorad nge rogon e n’en yad baadag. Re n’ey e ban’en nrib fel’ yaan mab manigil.

16. Uw rogon nib togopuluw e lem nu fayleng u murung’agen e salpiy ko n’en ni i fil Jesus? Mang l’agruw e deer nsusun e ngad fithed gadad riy?

¹⁶ Baadag Satan ni nge lemnag e girdi’ ni salpiy nge chugum e aram e n’en nra yibnag e felfelan’ ngorad, machane manang e pi tapigpig rok Jehovah nde riyul’ e re n’ey. Ba pagan’dad ko fapi thin ni yog Jesus ni gaar: “Yafos ku be’ e gathi ni ngongliy ko pi n’en ni ir e mmil suwon ngak faanem, ndemturug rogon feni yoor ban’en rok.” (Luke 12:15) Salpiy e dabiyog ni nge yibnag e bin riyul’ e felfelan’ ngodad. Dabiyog ni nge yognag e tin riyul’ e fager ngodad, ara gapaseg lanin’dad, ara yognag e yafos ni manemus ngodad. Riyul’ nib t’uf e chugum rodad, maku gad baadag ni ngad felfelan’gad ko par rodad. Machane, i yog Jesus ni gad ra pirieg e felfelan’ ni faanra ba fel’ e tha’ u thildad Got mab m’on u wan’dad e pigpig rodad ngak. (Matthew 5:3; 6:22) Ere mu fithem ni nge lungum: ‘Ke af e lem nu fayleng ngog u murung’agen rogon ni yima lemnag e salpiy, fa? Yigoo salpiy e gu ma lemnag ara yugu aram e n’en ni gu ma weliy murung’agen, fa?’​—Luke 6:45; 21:34-36; 2 John 6.

17. Faan ga ra siyeg e lem nu fayleng u murung’agen e salpiy, ma uw rogon nra mon’og rogon e par rom?

¹⁷ Faan gad ra tedan’dad ko pigpig ni gad be tay ngak Jehovah ma gad siyeg e lem nu fayleng u murung’agen e salpiy, ma aram e ra yib fan e yafos rodad. (Matthew 11:29, 30) Ra fel’ u wan’dad e tin bay rodad me gapas lanin’dad nge gum’ircha’dad. (Matthew 6:31, 32; Roma 15:13) Ra war e magafan’ rodad ko chugum.  (Mu beeg e 1 Timothy 6:9, 10.) Ku gad ra felfelan’ ni ngaud pied ban’en ku be’. (Acts 20:35) Ku rayog ni nge yoor e tayim rodad ni fan ko piin yad ba t’uf rodad. Ku rayog ni nge fel’ e mol rodad.​—Eklesiastes 5:12.

18. Mang e be guy Satan rogon ni nge rin’ ngodad?

¹⁸ Be guy Satan rogon ni nge kirebnag e tha’ u thildad Jehovah, ere thingar da athamgilgad u rogon nrayog rodad ni ngad ayuweged e tha’ u thildad Jehovah. Gad be cham nga “gelngin e kan nib kireb.” (Efesus 6:12) Dabun Satan nge pi moonyan’ rok ni ngad felfelan’gad ara nge yag e yafos ni manemus ngodad. (1 Peter 5:8) Pi toogor rodad ney e ba gel gelngirad ma yad be cham ngodad, machane rayog ni nge ayuwegdad Jehovah ni ngad gelgad ko re cham ney!

19. Uw rogon ni be weliy e Efesus 6:14-18 murung’agen e pi “talin e cham” ni bay ko piin Kristiano?

¹⁹ Kakrom e bay ba mit e mad ni ma chuw e salthaw ngay ni ma ayuwegrad u nap’an e mahl. Ku arrogodad e ngiyal’ ney nthingar don’ed nga dakendad e pi “talin e cham” ni ke pi’ Jehovah ngodad. (Efesus 6:13) Re n’ey e ra ayuwegdad. Be weliy e Efesus 6:14-18 murung’agen e pi talin e cham ney ni be gaar: “Mpired ni kam fal’eged rogomed: tin riyul’ e thin e ir e nge mang leed romed ni kam chichiiyed nga lukngumed; ma tin nib mat’aw e nga mon’ed nga dakenmed, ni aram e fa gin’en ni ma ing e salthaw nga daken ngorongoren, ma rogon ni kam fal’eged rogomed ni ngam weliyed e Thin Nib Fel’ ni murung’agen e gapas e nge mang sus romed. Gubin ngiyal’ ni nguum marod ma gimed be fek e michan’ romed ngak Kristus ni ir e nge mang fa  gin’en ni yima mith nga fon ko cham; yi ir e rayog ni ngam piliged ngay urngin gan e gat’ing ni be yik’ ni be pag Faanem nib Kireb ngomed. Mi gimed fek kanawoen ni ma thap e girdi’ ngak Got nge mang urwach romed, ma thin rok Got e nge mang sayden ni ke pi’ fare Kan ni Thothup [“gelngin Got nib thothup,” NW] ngomed. Mu rin’ed urngin e pi n’ey u fithik’ e meybil, nguum weniggad ngak Got nge ayuwegmed. Gubin ngiyal’ ni nguum meybilgad nrogon ni be pateg fare Kan ni Thothup [“gelngin Got nib thothup,” NW] nga lanin’med.”

20. Mang e thingar da rin’ed ni faanra nge ayuwegdad fapi “talin e cham” ni ka don’ed nga dakendad?

²⁰ Faanra pagtalin reb e salthaw reb fapi talin e cham ndabi yon’ nga daken, ma aram e bay bang u downgin ndabiyog ni nge ayuweg. Ere aram e gin nra guy e toogor rok rogon ni nge yip’. Faanra gad baadag ni nge ayuwegdad e pi “talin e cham” ney, ma dabiyog ni ngad paged reb riy. Ba t’uf ni gubin ngiyal’ ni nga u darod ma bay u dakendad maku gad be guy rogon ni gubin yang riy ni be par nib fel’ rogon. Dab da talgad ko cham ni gad be tay ngak Satan nge mada’ ko ngiyal’ ni kan thang e re fayleng rok ney ma kan chuwegrad e pi moonyan’ rok u fayleng. (Revelation 12:17; 20:1-3) Ere, faanra gad be ar’arnag boch ban’en nib kireb ara bay boch e meewar rodad ni be mo’maw’ rogon ni ngad gelgad ngay, ma susun e dabi mulan’dad!​—1 Korinth 9:27.

21. Uw rogon ni ngad gelgad ko cham ni gad be tay?

²¹ Dabiyog ni ngad gelgad ngak Moonyan’ ni gadad rodad. Machane faanra ayuwegdad Jehovah ma aram e rayog ni ngad gelgad ngak! Ra ngad pared ni gad ba  yul’yul’, ma aram e ba t’uf ni ngad meybilgad ngak Jehovah, ma gad fil e Thin rok, mu ud chaggad ko pi walag u lan e ulung. (Hebrews 10:24, 25) Ireray e pi n’en nra ayuwegdad ni ngad pared ni gad ba yul’yul’ ngak Got ma gad ayuweg e michan’ rodad.

22, 23. (a) Mang e ra ayuwegdad ni ngad pared ni gubin ngiyal’ ni kad fal’eged rogodad ni ngad ayuweged e michan’ rodad? (b) Mang e gad ra weliy ko bin migid e guruy?

²² Ba t’uf ni gubin ngiyal’ ma kad fal’eged rogodad nrayog ni ngad ayuweged e michan’ rodad. (John 15:19) Pi Mich Rok Jehovah e bay boch ban’en nib thil rogon ni yad ma rin’ ngak yooren e girdi’. Ere mu fithem ni nge lungum: ‘Kari tamilang u wan’ug fan nda gur rin’ e re n’ey, fa? Kari mich u wan’ug nib puluw e n’en ni be yog e Bible nge fare tapigpig nib yul’yul’ mab gonop, fa? Gub felfelan’ ngay ni gag reb e Pi Mich Rok Jehovah, fa? (Psalm 34:2; Matthew 10:32, 33) Rayog ni nggu weliy e michan’ rog ngak yugu boch e girdi’, fa?’​—Matthew 24:45; John 17:17; mu beeg e 1 Peter 3:15, 16.

²³ Boor ban’en ni gad ma mada’nag nrib tamilang e n’en nthingar da rin’ed ngay, ya nge yag nda pared ni gad ba dar ko re fayleng ney. Machane, bay boch ni gathi rib tamilang. Boor e kanawo’ ni ma guy Satan rogon ni nge bannagdad riy. Reb e ban ni ma fanay e aram e pi n’en yima chuweg e chalban ngay. Ere, uw rogon ni ngad gonopiyed e pi n’en gad ma mel’eg ni ngad chuweged e chalban rodad ngay? Aram e n’en ni gad ra weliy ko bin migid e guruy.