1, 2. Mang fan nib t’uf Jehovah Got rom?

 BA T’UF Got rom, fa? Sana rayog nrib t’uf rom ma kam ognag e yafos rom ngak. Sana ga ma tay ni ir e bin th’abi fel’ e Fager rom. Machane u m’on ni nge t’uf Jehovah rom, ma um moy ni gab t’uf rok. Be gaar e Bible: “Ba t’uf Got rodad nge girdi’ ni bochan e Got e som’on ni at’ufegdad.”​—1 John 4:19.

² Am lemnag urngin e kanawo’ ni ke dag Jehovah riy ni gad ba t’uf rok. Ke pi’ e fayleng nrib fel’ yaan ni ngad pared riy nge tin nib t’uf rodad ya nge yag nda felfelan’gad ko yafos rodad. (Matthew 5:43-48; Revelation 4:11) Baadag ni nge fel’ e tha’ u thildad, ma ke bing e kanawo’ ngodad nrayog ni ngad filed murung’agen. Nap’an ni gad ra beeg e Bible, ma aram e gad be motoyil ngak. Ma nap’an ni gad ra meybil, ma aram e ir e be motoyil ngodad. (Psalm 65:2) Ma pow’iydad ma ma pi’ gelngidad u daken gelngin nib thothup. (Luke 11:13) Ke pi’ Fak nrib t’uf rok ni nge yib nga fayleng ya nge yag ni chuwegdad u tan gelngin e denen nge yam’.​—Mu beeg e John 3:16; Roma 5:8.

3. Uw rogon ni nge par nib fel’ e tha’ u thildad Jehovah?

 ³ Am lemnag reb e fager rom nrib pach e thin romew ni gubin ngiyal’ ma bay ni be ayuwegem, ndemtrug ko ngiyal’ ni gab felfelan’ ara ngiyal’ ni ke kireban’um. Boor ban’en nib t’uf ni ngam rin’ew ya nge yag ni par e tha’ u thilmew nrib manigil. Ku arrogon e tha’ u thildad Jehovah, ni ir e bin th’abi fel’ e Fager nrayog ni nge yag ngodad. Rayog ni nge par nib fel’ e tha’ u thildad ni manemus. Aram fan ni be gaar e Bible: “Um pired ni gimed ba t’uf rok Got.” (Jude 21) Uw rogon ni ngad rin’ed e re n’ey? Be gaar e Bible: “Baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.”​—1 John 5:3.

4, 5. Uw rogon ni tabab ni nge t’uf Jehovah rom?

⁴ I yoloy apostal John murung’agen e t’ufeg rodad ngak Got. Ka ga manang e ngiyal’ ni baaram ni tabab ni nge t’uf Jehovah rom, fa?

⁵ Am lemnag e ngiyal’ nth’abi som’on nim fil ni baadag Jehovah ni ngam par u lan e bin nib beech e fayleng ndariy n’umngin nap’an. Kam fil murung’agen e tin ke rin’ ya nge yag e re tow’ath ney ngom, ma kam nang feni manigil e tow’ath ni ke pi’ ngodad u nap’an ni l’og Fak nge yib nga fayleng. (Matthew 20:28; John 8:29; Roma 5:12, 18) Nap’an nim nang gelngin fanam t’uf rok Jehovah, ma aram e n’en ni k’aringem ni ngki t’uf Jehovah rom.​—Mu beeg e 1 John 4:9, 10.

6. Mang e ba muun ngay ni nge t’uf be’ rodad? Mang e kam rin’ ni bochan e ba t’uf Got rom?

 ⁶ Machane, re t’ufeg nem nim thamiy e aram tabolngin e t’ufeg rom ngak Got. Bod ni, faanra ba t’uf be’ rodad, ma gathi kemus ni ma lungudad ngak, “Gab t’uf rog.” T’ufeg e ir e ra k’aringdad ni ngad adaged ni ngad rin’ed e tin baadag facha’. Ku arrogon e t’ufeg rom ngak Jehovah ni aram e n’en ke k’aringem ni ngam adag ni ngam rin’ e tin nib m’agan’ ngay. Nap’an ni gel e t’ufeg rom ngak Jehovah, ma dabisiy ni k’aringem e re n’ey ni ngam ognag e yafos rom ngak mag un ko taufe. Nap’an nim rin’ e re n’ey, ma aram mag micheg ngak Jehovah ni ngam pigpig ngak ndariy n’umngin nap’an. (Mu beeg e Roma 14:7, 8.) Ere, uw rogon ni ngam tay e n’en ni kam micheg u gil’?

7. Mang e gad ra rin’ ni faanra ba t’uf Jehovah rodad? Mang boch e motochiyel rok?

⁷ Gad ma ‘fol ko tin ni ke yog’ Jehovah ni ngad rin’ed ni bochan e ba t’uf rodad. Uw rogon ni gad ma rin’ e re n’ey? Aram e gad ma fol rok. Kad filed u Bible rogon ni baadag Jehovah ni ngaud ngongolgad. Bod ni, ke yog nib kireb e chingaw, nge moro’ro’, ara ban, ara ngam parew be’ ni gathi mabgol rom, ara ngan liyor ku be’ ara yugu ban’en.​—1 Korinth 5:11; 6:18; 10:14; Efesus 4:28; Kolose 3:9.

8, 9. Uw rogon ni ngad nanged e n’en ni baadag Jehovah ni ngad rin’ed nga boch ban’en ndariy e motochiyel riy u Bible? Mu weliy reb.

⁸ Machane faanra ngad rin’ed e tin nib m’agan’ Jehovah ngay, ma gathi kemus ni ngaud folgad ko tin  ke yog ni ngad rin’ed. Gathi gubin ban’en ni gad ma rin’ ni bay e motochiyel riy ni ke tay. Ere rayog ni ngad mada’naged boch ban’en ndariy ba motochiyel u Bible ni be yog e n’en ni ngad rin’ed ngay. Ere uw rogon ni ngad dugliyed e n’en nib fel’ ni ngad rin’ed? (Efesus 5:17) Bay kenggin e motochiyel u Bible, ara boch ban’en nib riyul’ ni be fil ngodad rogon ni ma lemnag Jehovah ban’en. Nap’an ni gad ra beeg e Bible, ma aram e rayog ni ngad nanged rarogon Jehovah. Rayog ni ngad nanged rogon ni ma lem, ni kub muun ngay e pi n’en ni baadag nge pi n’en ni ma fanenikan.​—Proverbs 6:16-19; mu beeg e Amos 5:15; mu guy Yugu Boch e Thin 1.

⁹ Bod ni, uw rogon ni gad ma dugliy e pi n’en ni gad ma yaliy u TV ara Internet? Dawori yog Jehovah rogon e n’en nthingar da rin’ed. Machane, bay e pi kenggin e motochiyel ni ke tay nra ayuwegdad ni ngad dugliyed e n’en nib fel’ ni ngad rin’ed. Yooren e kachido e ngiyal’ ney e ba sug yaan e cham nge ngongol ndarngal riy. Be yog e Bible nib fanenikan Jehovah e “en ni baadag e cham,” maku ra gechignag e piin “be ngongliy e ngongol ko darngal.” (Psalm 11:5, NW; Hebrews 13:4) Uw rogon nra ayuwegdad e gal kenggin e motochiyel ney ni ngad dugliyed e n’en nib fel’ ni ngad rin’ed? Nap’an ni gad ra nang ban’en ni ma fanenikan Jehovah ara ba kireb u wan’, ma aram e susun ni ngad siyeged.

10, 11. Mang fan ni gad ma fol rok Jehovah?

¹⁰ Mang fan ni gad ma fol rok Jehovah? Gathi gad ma fol ni bochan e nge dabi gechignagdad ara ngad siyeged boch e magawon nra yib ngodad ni faanra dab  da dugliyed ban’en nib fel’ rogon. (Galatia 6:7) Gad ma fol rok Jehovah ni bochan e ba t’uf rodad. Piin bitir e yad baadag ni ngar felfelan’naged e chitamangirad. Ere ku arrogodad ni gad baadag ni ngad felfelan’naged e Chitamangidad ni bay u tharmiy. Dariy ban’en ni kab fel’ ko bin ngaud pared ma gad manang ni gad be rin’ e tin nib m’agan’ Jehovah ngay!​—Psalm 5:12; Proverbs 12:2; mu guy Yugu Boch e Thin 2.

¹¹ Gathi kemus ni gad ma fol rok Jehovah ko ngiyal’ nib mom ngodad ara nap’an ni ke math e liyeb ngodad. Ku darud mel’eged ko tin ngan e motochiyel rok e ngad folgad riy ma tin ngan e dab da folgad riy. (Deuteronomy 12:32) Bin riyul’ riy e, gad ma fol rok u polo’ i gum’ircha’dad ni bod rogon e n’en ni rin’ e en ni yoloy fare thin ko Psalm ni gaar: “Ku gu pirieg e felfelan’ u fithik’ e fol ni gu be tay ko tin ka mog ni ngan rin’, ni bochan e rib t’uf rog e tin ka mog.” (Psalm 119:47, BT; Roma 6:17) Gad baadag ni ngad boded Noah ni dag nib t’uf Jehovah rok ni aram e rin’ urngin ban’en ni tay Jehovah chilen ngak ni nge rin’. Be yog e Bible ni “rin’ Noah urngin e tin ni yog Got ngak ni nge rin’.” (Genesis 6:22) Ga baadag ni nge yog Jehovah e re n’ey u murung’agem, fa?

12. Uw rogon ni ngad felfelan’naged Jehovah?

¹² Uw rogon u wan’ Jehovah ni faanra ud folgad rok? Ma “felfelan’.” (Proverbs 11:20; 27:11, BT) Am lemnag e re n’ey! Faanra ud folgad rok e En Ke Sunmiy e palpalth’ib, ma aram e ra felfelan’ ngodad. Machane der ma towasariydad ni ngad folgad rok, ya ke pi’ e puf rogon ngodad. Re n’ey e be yip’ fan nib puf  mat’awdad ni ngad dugliyed ni ngad rin’ed e tin nib fel’ ara tin nib kireb. Machane, baadag Jehovah ni nge k’aringdad e t’ufeg rodad ngak ni ngad dugliyed boch ban’en nib fel’, ya nge yag ni fel’ e par rodad.​—Deuteronomy 30:15, 16, 19, 20; mu guy Yugu Boch e Thin 3.

13, 14. Uw rogon ni kad nanged ni pi motochiyel rok Got e gathi kaygi mo’maw’ ni ngad folgad riy? Mu susunnag.

¹³ Uw rogon ni faanra gad be lemnag ni kaygi mo’maw’ ni ngad folgad ko pi motochiyel rok Jehovah, fa reb e gad be lemnag ni faan gad ra fol riy ma aram e dakuriy e puf rogon rodad? Be tamilangnag e Bible ni be gaar: “Tin ni ke yog ni ngad rin’ed e gathi rib mo’maw’.” (1 John 5:3) Fare bugithin ni Greek ni kan pilyeg ni “mo’maw’” e be yip’ fan ban’en nib “tomal.” Yima fanay e re bugithin ney u boch e thin nu Bible ni nge weliy murung’agen boch e motochiyel ni yugu ba pag rogon, ara girdi’ ni yad ma guy rogon ni ngar gagiyegnaged ara ra gafgownaged yugu boch e girdi’. (Matthew 23:4; Acts 20:29, 30) Baaray rogon ni ka nog e re n’ey u ba ken e Bible: “Pi motochiyel rok e der ma tomalnagdad.” (New English Translation) De “tomal” e pi motochiyel rok Jehovah, ara kaygi mo’maw’ ngodad ni ngad folgad riy. Der ma yog Jehovah ni ngad rin’ed ban’en ni manang ndabiyog rodad.

¹⁴ Mu susunnag ni ga be ayuweg reb e fager rom ni ngam fekew e chugum rok ya nge chuw nge yan i par nga bang. Gubin e chugum rok ni ke tay nga kahol.  Boch e pi kahol nem e bbaud nib mom ni ngan chibiy, ma boch e ba tomal nib t’uf ni nge chibiy l’agruw ni’. Ere gur, ga be lemnag nra yog e fager rom ngom ni ngam chibiy reb fapi kahol nib tomal ni goo gur? Ba mudugil ni danga’! Mang fan? Bochan e dabun ni ngam gafgow riy. Ere, Jehovah e bod fare fager ndabi yog ngodad ni ngad rin’ed ban’en ni yugu ba pag feni mo’maw’. (Deuteronomy 30:11-14) Manangdad nib fel’ rogon, maku “manang e n’en nni ngongliydad ngay; ma manang ni gadad e fiyath.”​—Psalm 103:14.

15. Mang fan nrayog ni nge pagan’dad nra yib angin e pi motochiyel rok Jehovah ngodad?

¹⁵ I yog Moses ko fare nam nu Israel ni pi motochiyel rok Jehovah e gubin ngiyal’ “nra i yib angin” ngorad, ma faan yad ra fol ma aram e “yad ra par ni yad ba fos.” (Deuteronomy 5:28-33; 6:24, NW) Ku arrogodad e ngiyal’ ney. Gubin ban’en ni ma yog Jehovah ni ngad rin’ed e ra yib angin ko yafos rodad. (Mu beeg e Isaiah 48:17.) Jehovah ni Chitamangidad e gubin ngiyal’ ni manang e tin nib fel’ ngodad. (Roma 11:33) Be gaar e Bible: “Got e t’ufeg.” (1 John 4:16) Re n’ey e be yip’ fan ni gubin ban’en ni ma yog Jehovah nge tin ni ma rin’ e gubin ni ma rin’ u fithik’ e t’ufeg.

16. Uw rogon ni kad nanged nrayog ni ngad folgad ni yugu aram rogon ndawor da flontgad ma gad be par u ba fayleng nib kireb?

¹⁶ Gathi gubin ngiyal’ nib mom ni ngad folgad rok Got. Gad be par u ba fayleng nib kireb ni be gagiyegnag Moonyan’. Ere ma guy rogon ni nge k’aring e girdi’ ni ngar rin’ed e tin nib kireb. (1 John 5:19) Ku thingar  da guyed rogon ni ngad gelgad nga rogon e lem nde puluw ni gad ma tay ya dawor da flontgad, ma rayog ni nge waliydad e re n’ey ni nge dab kud folgad rok Got. (Roma 7:21-25) Machane, t’ufeg rodad ngak Jehovah e aram e n’en ma ayuwegdad ni ngad rin’ed e tin nib fel’. Ma guy rogon e athamgil ni gad ma tay ni ngad folgad rok, ma ma ayuwegdad ni aram e ma pi’ gelngin nib thothup ngodad. (1 Samuel 15:22, 23; Acts 5:32) Gelngin Got nib thothup e ma ayuwegdad ni nge yag boch e fel’ngin ngodad nra momnag ni ngad folgad rok.​—Galatia 5:22, 23.

17, 18. (a) Mang e gad ra fil ko re ke babyor ney? (b) Mang e gad ra weliy ko bin migid e guruy?

¹⁷ Re ke babyor ney e ra fil ngodad rogon ni ngaud ngongolgad u reb e kanawo’ nib m’agan’ Jehovah ngay. Ku gad ra fil riy rogon ni ngaud folgad ko pi kenggin e motochiyel rok nge yugu boch e motochiyel ni murung’agen rogon e ngongol ni ngaud rin’ed. Dab mu pagtalin nder ma towasariydad Jehovah ni ngad folgad rok. Faan gad ra mel’eg ni ngad folgad, ma aram e ra fel’ boch rogon e par rodad e chiney me fel’ rogodad boch nga m’on. Bin th’abi ga’ fan riy e, faanra ud folgad ma aram e gad be dag ngak Got gelngin feni t’uf rodad.​—Mu guy Yugu Boch e Thin 4.

¹⁸ Ke pi’ Jehovah e nangan’ ngodad ni nge ayuwegdad ni ngad nanged e tin nib fel’ nge tin nib kireb. Faan gad ra skulnag e nangan’ rodad, ma aram e rayog ni nge ayuwegdad ni ngad “folgad ko tin ni ke yog ni ngad rin’ed.” Ere mang e nangan’, ma uw rogon ni ngad skulnaged? Aram e n’en ni migid ni ngad weliyed.