1, 2. Mang e rayog ni ngad rin’ed ya nge yag nda pared ni gad ba t’uf rok Got?

 GAD gubin ni gad baadag ni nge par fithik’ i dowdad nib gel mad paloggad ko m’ar. Aram fan ni gad ma guy rogon ni ngad ked e ggan nib fel’ ngodad, ma gad be rin’ boch ban’en nib chamag ngodad ni gubin ngiyal’, ma gad be ayuweg fithik’ i dowdad. Yugu aram rogon nib t’uf ni ngad athamgilgad ni ngad rin’ed e re n’ey, machane gad ma felfelan’ nga angin ni ma yib ngodad, ere aram fan nder mulan’dad. Machane, ku bay yugu reb e kanawo’ nib t’uf ni ngad pared ni gad ba gel riy.

² Yugu aram rogon ni kad guyed rogon ke yag ni ngad nanged Jehovah, machane ba t’uf ni ngad guyed rogon ni nga i chugur e tha’ u thildad i yan. Nap’an ni pi’ Jude e athamgil nga laniyan’ e piin Kristiano ni ngaur ‘pired ni yad ba t’uf rok Got,’ me weliy rogon nrayog ni ngar rin’ed e re n’ey. I gaar ngorad: “Nguum gelniged gimed ko mich romed nib th’abi thothup.” (Jude 20, 21) Ere uw rogon ni ngad gelnaged e michan’ rodad?

3-5. (a) Mang e baadag Satan ni ngam lemnag u murung’agen e pi motochiyel rok Jehovah? (b) Uw rogon u wan’um e pi motochiyel rok Jehovah nge pi kenggin e motochiyel rok?

³ Ba ga’ fan ni ngari mich u wan’um ni birok Jehovah e kanawo’ e aram bin th’abi fel’. Baadag Satan ni ngam lemnag ni kaygi mo’maw’ ni ngam fol ko pi motochiyel rok Got, ma ra gel boch e felfelan’ rom ni faanra gur rom e ngam dugliy ko mang e ba fel’ ma mang e ba kireb. Ka nap’an fagi milay’ nu Eden ni guy Satan rogon ni nge k’aring e girdi’ ni nge mich e re ban ney u wan’rad. (Genesis 3:1-6) Maku aram e n’en ni be guy rogon ni nge rin’ e ngiyal’ ney.

⁴ Ba puluw e n’en ke yog Satan, fa? Gur, riyul’ ni pi motochiyel rok Jehovah e be chuweg e puf rogon rodad, fa? Danga’. Am susunnag ni ga be yan u bangi ban’en nib fel’ yaan, mag guy ba yoror ni bay u rom nib tolang ndabiyog ni ngam man nga barba’ riy. Sana ra lungum u wan’um, ‘Mang fan ni bay e re yoror ney u roy?’ De n’uw nap’an mag rung’ag laman ba layon ni be tolul nga barba’ fare yoror. Uw rogon fare yoror u wan’um e chiney? Kam felfelan’ ya be ayuwegem ndabi longuyem fare layon! Pi kenggin e motochiyel rok Jehovah e bod rogon e re yoror nem, ma Moonyan’ e bod fare layon. Be ginangdad e Thin rok Got ni be gaar: “Mu tedan’med mi gimed ayuwegmed! Yi moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy.”​—1 Peter 5:8.

⁵ Baadag Jehovah ni nge yag e bin th’abi fel’ e yafos ngodad. Dabun ni nge bannagdad Satan. Aram fan ni  ke pi’ boch e motochiyel nge kenggin e motochiyel ni nge ayuwegdad me yibnag e felfelan’ ngodad. (Efesus 6:11) I yoloy James ni gaar: “En nra fal’eg i yaliy ir nga fithik’ fare motochiyel nrib yal’uw ni ir e ma pithig e girdi’ ko kireb, me tiyan’ ngay . . . e Got e ra ayuweg [“ra pirieg e felfelan’,” NW] ko tin ni be rin’.”​—James 1:25.

6. Uw rogon nrayog ni ngari mich u wan’dad ni tirok Got e kanawo’ e aram e tin th’abi fel’?

⁶ Nap’an ni gad ra fol ko pi fonow rok Jehovah, ma aram e ra fel’ boch e par rodad me gel e chugur ko tha’ u thildad. Bod nnap’an nra m’agan’dad ko n’en be yog ngodad ni aram e ngaud meybilgad ngak ni gubin ngiyal’, ma aram e ra yib angin ngodad. (Matthew  6:5-8; 1 Thessalonika 5:17) Gad ma felfelan’ u nap’an ni gad ra fol ko n’en ke yog ni aram e ngaud mada’gad nga taabang ni ngad liyorgad ngak me bagadad me pi’ e athamgil nga laniyan’ bagadad, ngu nap’an ni gad ra un ko fare maruwel ni machib nge ngan fil e tin riyul’ ko girdi’. (Matthew 28:19, 20; Galatia 6:2; Hebrews 10:24, 25) Nap’an ni gad ra lemnag rogon ni ke ayuwegdad e pi n’ey ni nge par e michan’ rodad nib gel, ma aram e rayog ni ngari riyul’ u wan’dad ni tirok Jehovah e kanawo’ e aram e tin th’abi fel’.

7, 8. Mang e ra ayuwegdad ni nge dabki magafan’dad nga boch e skeng nrayog ni ngad mada’naged boch nga m’on?

⁷ Sana rayog ni be magafan’dad nri boch ngaram ma gad mada’nag boch ban’en nra skengnag rogon e michan’ rodad ni kaygi mo’maw’ ni ngad gelgad ngay. Faanra bay ba ngiyal’ ni kam lem ni aray rogon, ma dab mu pagtalin fapi thin ni yog Jehovah ni be gaar: “I gag Jehovah ni Got romed, ni Faen baadag ni nge fil ngomed e tin nra fel’ rogomed riy, me pow’iymed ko kanawo’ nib fel’ ni ngam marod riy. Faan gomanga gimed ra motoyil ko pi motochiyel rog, ma gapas romed e ra bod e lul’, ma tin nib mat’aw nra um rin’ed e ra bod e n’ew u maday.”​—Isaiah 48:17, 18, NW.

⁸ Nap’an ni gad ra fol rok Jehovah, ma gapas nra yib ngodad e bod rogon ba lul’ ndariy e ngiyal’ nra m’ay e ran riy, ma tin nib mat’aw nra ud rin’ed e bod rogon e n’ew u maday ni gubin ngiyal’ ni be lobeb i yib nga dap’el’ay. Demtrug e n’en nra buch rodad ma rayog ni ngad pared ni gad ba yul’yul’. Be micheg e  Bible ni be gaar: “Mu pi’ e gilab rom ngak Somol, ma bayi n’ufegem; dariy e ngiyal’ nra pag e piin yul’yul’ ngar meewargad.”​—Psalm 55:22, BT.

9, 10. Mang e be yip’ fan ni nge ilal be’ ko tirok Got ban’en?

⁹ Nap’an ni ga ra gelnag e chugur ko tha’ u thilmew Jehovah, ma aram e ga ra ‘ilal’ i yan ko tirok Got ban’en. (Hebrews 5:14) Mang e be yip’ fan ni ngad ilalgad ko tirok Got ban’en?

¹⁰ Re n’ey ni ngad manged boch e Kristiano ni kar ilalgad ko tirok Got ban’en e gathi be yip’ fan ni nge yoor e duw rodad. Ra ngad ilalgad ko tirok Got ban’en ma be yip’ fan ni ngad ted ni Jehovah e ir e bin th’abi fel’ e Fager rodad, mad guyed rogon ni ngaud lemnaged boch ban’en ni bod rogon ni ma lemnag. (John 4:23) I yoloy Paul ni gaar: “Piin yad be ngongol nrogon ni be yog e dowef rorad ngorad e tin baadag e dowef rorad ni ngar rin’ed e ir e ke par ni be gagiyegnag lanin’rad. Machane, piin yad be ngongol nrogon nib puluw nga gelngin Got nib thothup e gelngin Got nib thothup e ir e be gagiyegnagrad.” (Roma 8:5, NW) Be’ ni ke ilal ko tirok Got ban’en e der ma par ni yigoo chugum ara pi n’en yima felfelan’ ngay ko re fayleng ney e ir e be m’oneg. Ya be par ni pigpig rok ngak Jehovah e aram e n’en nib m’on u wan’ maku be mel’eg e tin nib fel’ ni nge rin’ ko yafos rok. (Proverbs 27:11; mu beeg e James 1:2, 3.) Der ma pag ir ni ngan waliy ko kireb. Maku reb e, be’ ni ke ilal ko tirok Got ban’en e manang e n’en nib fel’ ni nge rin’ ma aram e n’en ke dugliy u wan’ ni nge rin’.

11, 12. (a) Mang e yog Paul u murung’agen rogon ni nge nang reb e Kristiano e “tin nib fel’ ko tin nib kireb”? (b) Uw rogon ni faanra nge mang be’ reb e Kristiano ni ke ilal ko tirok Got ban’en ma taareb rogon ko bin nge mang be’ reb i girdien e gosgos?

 ¹¹ Bay boch ban’en nthingar da rin’ed ya nge yag nda ilalgad ko tirok Got ban’en. I yoloy apostal Paul ni gaar: “Ggan nib el e piilal e ngar ked, ya kar filed rogon ni ngar nanged e tin nib fel’ ko tin nib kireb.” (Hebrews 5:14) Fare thin ni “filed rogon” e rayog ni nge yibnag ngan’dad e n’en ma rin’ girdien e gosgos.

¹² Nap’an ni gad ra guy reb i girdien e gosgos ni be un nga ba mit e gosgos nib salap riy, ma gad ra nang nib n’uw nap’an ni ke fil rogon ni nge salap ko re miti gosgos nem. Dan gargeleg ni ir be’ nib salap ko gosgos. Nap’an ni yira gargeleg reb e bitir, ma de nang rogon ni nge fanay pa’ nge ay. Machane, ra munmun ma aram e ra nang rogon ni nge kol ban’en nge rogon ni nge yan. Machane, faanra fil rogon ba mit e gosgos, ma aram e rayog ni nge mang reb i girdien e gosgos. Ere ku arrogodad nib t’uf ba ngiyal’ nib n’uw nap’an ma kub t’uf ni ngad filed rogon i rin’ boch ban’en ya nge yag nda manged boch e Kristiano ni kar ilalgad ko tirok Got ban’en.

13. Mang e ra ayuwegdad ni ngad filed rogon ni ngaud lemgad ni bod Jehovah?

¹³ U lan e re ke babyor ney e kad weliyed riy rogon nrayog ni ngaud lemgad ni bod Jehovah ma gad sap nga boch ban’en ni bod rogon ni ma sap ngay. Kad filed rogon ni nge ga’ fan e pi motochiyel rok Jehovah u wan’dad me t’uf rodad. Nap’an ni gad ra dugliy boch ban’en, ma ngad fithed gadad ni nge lungudad: ‘Mang boch e motochiyel ara kenggin e motochiyel u  Bible ni bay rogon ko re n’ey? Uw rogon ni nggu fol riy? Mang e baadag Jehovah ni nggu rin’?’​—Mu beeg e Proverbs 3:5, 6; James 1:5.

14. Faanra nge gel e michan’ rodad, ma mang e ba t’uf ni ngad rin’ed?

¹⁴ Dariy ba ngiyal’ ni gad ra tal i guy rogon ni nge gel e michan’ rodad ngak Jehovah. Ggan ni gad ma kay nib fel’ nga fithik’ i dowdad e ma gelnag fithik’ i dowdad. Ere ku arrogon ni faan gad ra fil murung’agen Jehovah, ma aram e ra gel e michan’ rodad. Nap’an nda tababgad ko fol Bible, ma gad fil e tin nib mom e machib u murung’agen Jehovah nge rogon ni ma rin’ boch ban’en. Machane faani munmun ma aram me t’uf ni ngad nanged boch e machib nib toar fan. Aram e n’en ni yog Paul u nap’an ni gaar: “Ggan nib el e piilal e ngar ked.” Faan gad ra fol ko tin kad filed, ma aram e ra yag e gonop ngodad. Be gaar e Bible: “Gonop ni nge yag ngom e ireram e n’en th’abi ga’ fan.”​—Proverbs 4:5-7, BT; 1 Peter 2:2.

15. Uw feni ga’ fan ni nge t’uf Jehovah nge pi walagdad rodad?

¹⁵ Be’ nib gel mab fel’ fithik’ i dow e manang ni faanra nge par ni aram rogon ma thingari ulul ni nge ayuweg fithik’ i dow ni nge par nib fel’. Ku arrogon be’ ni ke ilal ko tirok Got ban’en ni manang nib t’uf ni nge maruwel nib gel ya nge yag ni par e tha’ u thilrow Jehovah nib chugur. Ke puguran Paul ngodad ni gaar: “Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’.” (2 Korinth 13:5) Machane, gathi kemus nib t’uf ni nge gel e michan’ rodad, ya kub t’uf ni nga i gel i yan e t’ufeg rodad ngak Jehovah nge pi  walagdad. I gaar Paul: “Ra . . . gu manang fan urngin e tin nde nang e girdi’, ma gelngin nib michan’ug ngak Kristus e rayog ni chuweg e burey u tagil’, machane faanra de t’uf Got rog nge girdi’, ma dariy rogog.”​—1 Korinth 13:1-3.

16. Uw rogon e lem ni baadag Satan ni ngaud ted?

¹⁶ Baadag Satan ni ngad lemnaged ndariy ba ngiyal’ nrayog ni ngad felfelan’naged Jehovah. Baadag ni nge mulan’dad ma gad lemnag ndabiyog ni nge puf e pi magawon rodad. Dabun ni nge pagan’dad ngak pi walagdad ni Kristiano, maku dabun ni ngad felfelan’gad. (Efesus 2:2) Manang Satan ni lem nde puluw ni gad ma tay e rayog ni nge gafgownagdad me kirebnag e tha’ u thildad Got. Machane bay ban’en ni ke pi’ Jehovah ni nge ayuwegdad ni ngad gelgad ko lem nde puluw. Re n’em e aram e athap rodad.

17. Uw feni ga’ fan e athap rodad?

¹⁷ Ke taarebrogonnag e Bible e athap rodad ko urwach ni ma ayuweg lolugen reb e salthaw u nap’an e mahl nrogon ni bay ko 1 Thessalonika 5:8, ma be yog e Bible nre urwach nem e be yip’ fan e “tin ni be l’agan’dad ngay ni bay da guyed ni bochan e kad thapgad ngak Got.” Pi n’en ke micheg Jehovah ni gad be athapeg e rayog ni nge ayuweg e tafinay rodad miki ayuwegdad ni ngad siyeged boch e lem nde puluw.

18, 19. Uw rogon ni yag ni nge par Jesus nib gel ni bochan e athap rok?

¹⁸ Athap rok Jesus e aram e n’en ni i tay nib gel. Nap’an e bin tomur e rran ko yafos rok u roy u fayleng, ma boor e magawon ni mada’nag nra chuw reb miki  yib reb. Reb e fager rok nri yow ba chugur e chel nge yognag. Ma reb e yog nde nang Jesus. Ma tin ka bay e ra paged ngar milgad rok. Girdi’ ko nam rok e ra chelgad ngar togopuluwgad ngak, ma rogned ni ngan gafgownag min li’ nge yim’. Ere mang e ayuweg ni nge athamgil u fithik’ e gafgow nni tay ngak nib gel e amith riy? “Bochan e felfelan’ ni be sonnag ma daki tafinaynag e tamra’ nra tay ko yam’ ni nge tay” u daken fare ley i gek’iy “me ere chiney e ke par nga but’ u ba’ ni mat’aw rok Got u tagil’ Got.”​—Hebrews 12:2.

¹⁹ Manang Jesus ni faanra par nib yul’yul’, ma aram e ra n’uf e Chitamangin me micheg ni Satan e ba malulfith l’igin. Rib gel e felfelan’ ni tay Jesus ni bochan e athap rok. Ku manang ndab ki n’uw nap’an ma ra sul ngak e Chitamangin u tharmiy. Re athap ney e ir e ayuweg ni nge k’adan’ u fithik’ e gafgow ni  i tay. Thingar da pared ni gad be lemnag e athap rodad ni bod rogon Jesus. Re n’ey e ra ayuwegdad ni ngad athamgilgad ndemtrug e n’en nra buch rodad.

20. Mang e ra ayuwegem ni nga i par nib puluw e lem rom?

²⁰ Be guy Jehovah rogon e michan’ rom, ma manang gelngin e athamgil ni ga be tay. (Isaiah 30:18; mu beeg e Malaki 3:10.) Ke micheg nra “pi’ ngom e tin ni ir e kari t’uf rom.” (Psalm 37:4) Ere mu par ni ga be lemnag e athap rom. Baadag Satan ni nge mulan’um ko athap rom, mag lemnag ndabi riyul’ e pi n’en ke micheg Jehovah. Machane, dab mu lem ni aram rogon! Faanra kam guy ni be tabab ni nge maruwar lanin’um ko athap rom, mag ning e ayuw ngak Jehovah. Dab mu pagtalin fapi thin ni bay ko Filippi 4:6, 7 ni be gaar: “Dariy ban’en ni nge magafan’med ngay, machane faan gimed ra meybil ngak Got mi gimed ning  ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.”

21, 22. (a) Mang e ba m’agan’ Jehovah ngay ni fan ko fayleng? (b) Mang e kam dugliy u wan’um ni ngam rin’?

²¹ Gubin ngiyal’ ni ngaum tay e tayim ni ngam fal’eg i lemnag e pi n’en gad be sonnag ni ka bay nga m’on ni gad ra felfelan’ ngay. Dabki n’uw nap’an ma urngin e piin bay u fayleng e yad ra liyor ngak Jehovah. (Revelation 7:9, 14) Am lemnag rogon e par u lan e bin nib beech e fayleng. Rib manigil ndabi chuchugur ni nge taw rogon e lem rodad ngay! Ra taw ko ngiyal’ nem ma daki moy Satan, nge pi moonyan’ rok, ma ke chuw urngin e kireb. Dab kum m’ar, ma dab ku mum’. Gubin e rran ni ga ra od ma gab pasig ma gab felfelan’ ni ga be par ni gab fos. Gubin e girdi’ ni yad ra maruwel u taabang ni ngar fal’eged e re fayleng ney nge mang paradis. Gubin e girdi’ ni yad ra kay e ggan nib fel’ ma bay bang ni ngar pared riy nib pagan’rad. Dabki cham e girdi’ ara ur gafgownaged yad, ya yad gubin nra ur golgad ngorad. Munmun ma gubin e girdi’ u fayleng e yad ra “un ko flaab rok pi fak Got.”​—Roma 8:21.

²² Baadag Jehovah ni nge par ni ir e bin th’abi fel’ e Fager rom. Ere mu athamgil u rogon nrayog rom ni ngaum fol rok Jehovah ma ga be guy rogon ni nga i chugur e tha’ u thilmew ni gubin e rran. Arrogon, manga yugu da pared ni gad ba t’uf rok Got ndariy n’umngin nap’an!​—Jude 21.