Mu ayuweg e piin be motoyil ni ngar yaliyed rarogorad. Mu fith boch e deer nra k’aring e piin be motoyil ni nge bagayad me fal’eg i yaliy ir.

Mu pi’ e athamgil ngorad ni ngar rin’ed e tin nib fel’. Mu pi’ e athamgil nga laniyan’ e piin be motoyil ni ngar fal’eged i lemnag fan ni yad be rin’ e tin nib fel’. Mu ayuwegrad ni ngar adaged ni ngar rin’ed e tin nib fel’ ni bochan e ba t’uf Jehovah rorad, nge girdi’, nge tin riyul’ u Bible. Mu ayuwegrad ni ngar nanged ni bay e gonop ko n’en ni be yog e Bible. Machane dab mu gathibthibnagrad ara mu puwan’ ngorad. Mu guy rogon ni nge taw nga tungun e welthin rom ma ke yib e athamgil nga lanin’rad ni ngar rin’ed e tin nrayog rorad ko bin ni ngam k’aring e tamra’ ngorad.

Mu pow’iyrad ni ngar lemnaged Jehovah. Mu tamilangnag rogon ni be m’ug pi fel’ngin Got nge t’ufeg rok ngodad ko pi n’en ni be fil e Bible, nge pi kenggin e motochiyel, nge pi n’en ni kan tay chilen ni ngad rin’ed. Mu ayuweg e piin be motoyil ni ngar lemnaged rogon laniyan’ Jehovah mar adaged ni ngar rin’ed e tin nib m’agan’ ngay.