“Ngam manged boch e tamachib [ara “sensey,” NW].” (Heb. 5:12) Aygum lemnag e re n’ey! Jehovah ni ir e bin th’abi fel’ e Sensey u ga’ngin e palpalth’ib e be piningdad ni ngad filed murung’agen ko girdi’! Maruwel ni kan pi’ ngodad ni ngad filed murung’agen Jehovah u lan e tabinaw, nge ulung, ngu nap’an e machib e ba tow’ath nib manigil ma kub maruwel nib ga’ fan. Ere uw rogon ni ngad rin’ed nib fel’ rogon?

Bay e fulweg riy ko fapi thin ni yoloy apostal Paul ngak Timothy ni be gaar: “Mu tiyan’um nguum beeg e thin u lan e babyor nib thothup ngak e girdi’ ko muulung, ma ga be machib ngorad ma ga be weliy fan e thin rok Got ngorad.” Ki ulul Paul ngay ni gaar: “Faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.” (1 Tim. 4:13, 16) Bay e thin ni ngam weliy ko girdi’ nra ayuweg e yafos rorad. Aram fan nrib t’uf ni ngam mon’og ko beeg babyor nge rogon ni ngam skulnag be’. Ireray fan e re ke babyor ney ni kan ngongliy. Baaray boch ban’en ni bay riy.

Dariy reb e sensey ni taareb rogon ngak Jehovah. (Job 36:22) Yugu aray rogon nra ayuwegem e re ke babyor ney ni ngam salap ko beeg babyor nge rogon ni ngam skulnag be’, machane dabi m’ay u wan’um ni Jehovah e Ir e Keb Rok e pi n’en ni gad ma machibnag maku ir e ma pow’iy e girdi’ ngak. (John 6:44) Ere gubin ngiyal’ ni ngaum yibilay gelngin nib thothup, ma ga be fanay e Thin rok. Gathi tin ni ga be lemnag e ngam weliy, ya ngam ayuweg e girdi’ ni ngar lemnaged rogon laniyan’ Jehovah ko n’en ni ga be weliy. Mu guy rogon ni ngam ayuwegrad ni ngari t’uf Jehovah rorad.

Kan piningem ni ngam un i fil ko girdi’ ba thin nrib ga’ fan ni kan pi’ ko girdi’ ni ngar weliyed. Ere ba pagan’mad ngay ni faan ga ra taga’ ko fare “gelngin ni ke pi’ Got,” ma aram e rayog ni nge yib angin e tin ni ga be rin’.​—1 Pet. 4:11.

Piin gimed be maruwel,

Ulung ni Ma Pow’iyey ko Pi Mich Rok Jehovah