GURUY NI 01

Uw Rogon Nra Ayuwegem e Bible?

PLAY

Ba dake gad gubin ni gad ma fith boch e deer u murung’agen e yafos rodad, nge gafgow ni gad be tay, nge yam’, nge pi n’en bay nga m’on. Ku gad ma lemnag boch ban’en ni ma buch rodad u reb e rran ngu reb ni bod rogon ni ngad yognaged e salpiy ni fan ko tin nib t’uf rodad, ara rogon ni nge yag e felfelan’ nga lan e tabinaw rodad. Boor e girdi’ ni kar pirieged ni gathi kemus ni be ayuwegrad e Bible ni ngar pirieged e fulweg u boch e deer nib ga’ fan ni yad ma fith u murung’agen e yafos rodad, ya ku bay boch e fonow riy nra yib angin ko par rodad u reb e rran ngu reb. Bay be’ ni ga manang ni ga be lemnag nrayog ni nge yib angin e thin nu Bible ngak?

1. Mang boch e deer ni be pi’ e Bible e fulweg riy?

Be pi’ e Bible e fulweg ko pi deer ni baaray nib ga’ fan ni be gaar: Uw rogon ni tabab e yafos rodad? Mang fan e yafos? Mang fan ni ma gafgow e girdi’? Mang e ma buch rok be’ u nap’an nra yim’? Faanra gubin e girdi’ ni baadag ni nge aw e gapas, me ere mang fan ni yugu yibe mahl? Nge mang e ra buch ko fayleng boch nga m’on? Be pi’ e Bible e athamgil nga lanin’dad ni ngad gayed e fulweg ko pi deer ney, ma bokum milyon e girdi’ e ba fel’ u wan’rad e fulweg ni be pi’ e Bible.

2. Uw rogon nrayog ni nge ayuwegdad e Bible ni ngad felfelan’gad ko par rodad u reb e rran ngu reb?

Be pi’ e Bible e fonow nib manigil ngodad. Bod ni ma fil ngak chon e tabinaw rogon ni ngar pared ni yad ba felfelan’. Bay e fonow riy nra ayuwegdad u nap’an ni gad be mochuch, maku be weliy rogon ni ngad adaged e maruwel ni gad ma rin’. Nap’an ni yibe weliy e n’en bay ko re ke babyor ney, ma ga ra fil e n’en be yog e Bible u murung’agen e pi n’ey nge ku boch ban’en. Ra munmun ma sana ra riyul’ u wan’um ni “urngin e thin ni bay u lan e babyor nib thothup [urngin ban’en ni bay u Bible] e . . . ma fil e tin nib riyul’ e thin ngodad.”—2 Timothy 3:16.

Re ke babyor ney e gathi ke yan nga lon e Bible. Ya be pi’ e athamgil nga lanin’um ni ngam fal’eg i yaliy e n’en bay u Bible. Ere gamad be pi’ e athamgil nga lanin’um ni ngam beeg e pi thin nu Bible ni bay ko pi guruy ney mag taarebrogonnag ko n’en ga be fil.

KUM FIL BOCH BAN’EN U MURUNG’AGEN

Mu guy rogon ni ke ayuweg e Bible boch e girdi’, nge rogon ni ngam adag ni ngaum beeg, nge fan nib fel’ ni nge ayuwegem be’ ni ngam nang fan e thin riy.

3. Rayog ni nge pow’iydad e Bible

Bible e bod ba magal nib ga’ raen. Rayog ni nge ayuwegdad ni ngad dugliyed boch ban’en nib fel’ rogon, ma gad nang e n’en bay nga m’on.

Mu beegew e Psalm 119:105, mi gimew weliy e fulweg ko gal deer ni baaray:

Uw rogon e Bible u wan’ e en ni yoloy e re thin ney?
Uw rogon e Bible u wan’um?

4. Rayog ni nge pi’ e Bible e fulweg ko deer rodad

I pirieg be’ nib pin ni pi deer ni ke n’uw nap’an ni i lemnag e bay e fulweg riy u Bible. Mu yaliyew e re VIDEO ney, mi gimew weliy e fulweg ko gal deer ni baaray.

VIDEO: Never Give Up Hope! (1:48)

Mang deer e i lemnag fare pin ni kan dag yaan ko fare video?
Mang angin e fol Bible ni un ngay?

Be pi’ e Bible e athamgil nga lanin’dad ni ngaud fithed e deer. Mu beegew e Matthew 7:7, mi gimew weliy e fulweg ko re deer ni baaray:

Mang boch e deer rom nrayog ni nge pi’ e Bible e fulweg riy?

5. Rayog ni ngam adag e beeg Bible

Boor e girdi’ ni yad baadag e beeg Bible ma be yib angin ngorad. Mu yaliyew e re VIDEO ney, mi gimew weliy e fulweg ko gal deer ni baaray.

VIDEO: Bible Reading (2:05)

Uw rogon e beeg babyor u wan’ fapi fel’ yangaren ni kan dag yaarad ko fare video?
Mang fan ni ke thil rogon e lem rorad u murung’agen e beeg Bible?

Bay e fonow u Bible nra fal’eg lanin’dad me pi’ e athap ngodad. Mu beegew e Roma 15:4, mi gimew weliy e fulweg ko re deer ni baaray:

Ga baadag ni ngam nang murung’agen e n’en be micheg e Bible nra fal’eg lanin’um me pi’ e athap ngom?

6. Rayog ni nge ayuwegdad boch e girdi’ ni ngad nanged fan e thin nu Bible

Boor e girdi’ ni kar pirieged nib fel’ ni ngaur beeged e Bible ni yigoo yad, maku yad be weliy boch e girdi’ u taabang. Mu beegew e Acts 8:26-31, mi gimew weliy e fulweg ko re deer ni baaray:

Uw rogon ni ngad nanged fan e thin nu Bible?—Mu guy e verse 30 nge 31.

Ba t’uf be’ ni nge ayuweg fare moon nu Ethiopia ni nge nang fan e n’en ni bay u lan fare Babyor nib Thothup. Boor e girdi’ e ngiyal’ ney ni kar guyed nib fel’ ni ngar weliyed boch e girdi’ e Bible u taabang

MA GAAR BOCH E GIRDI’: “Ga ra fil e Bible ma ga be adbey e tayim rom.”

Mang e ga ra yog? Mang fan?

N’EN KAN FIL

Bay e fonow u Bible ni bay rogon ko par rodad u reb e rran ngu reb, ma be pi’ e fulweg u boch e deer nib ga’ fan, maku be fal’eg laniyan’ e girdi’ ma be pi’ e athap ngorad.