GURUY NI 21
Uw Rogon ni Yibe Machibnag Fare Thin nib Fel’?
Dabki n’uw nap’an ma bayi fanay Jehovah Gil’ilungun ni nge chuweg urngin e magawon rodad. Ireray e thin nib fel’ nib t’uf ni nge nang urngin e girdi’. Baadag Jesus ni nge weliy pi gachalpen e re thin ney ngak urngin e girdi’! (Matthew 28:19, 20) Uw rogon ni ma fol e Pi Mich Rok Jehovah ko n’en ni tay Jesus chilen?
1. Uw rogon ni be lebug e Matthew 24:14 e ngiyal’ ney?
I yog Jesus u m’on riy ni gaar: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng.” (Matthew 24:14) Ba felfelan’ e Pi Mich Rok Jehovah ngay ni ngar rin’ed e re maruwel ney nib ga’ fan. Ba pag 1,000 mit e thin ni gamad be machibnag fare thin nib fel’ riy u ga’ngin yang e fayleng! Re maruwel ney e ba maruwel nib ga’, ere ba t’uf e tayim nge gelngiy ni ngan fanay ngay, maku thingar ni yarmiy nib fel’ rogon. Dabiyog ni ngan rin’ ni faanra dariy e ayuw rok Jehovah riy.
2. Mang e gamad ma rin’ ya nge yag ni nggu machibnaged e girdi’?
Gamad ma machib ko gin nrayog ni nggu pirieged e girdi’ riy. Gamad ma machib ko “tabinaw rok e girdi’ i yan” ni bod e n’en ni i rin’ e pi Kristiano ko bin som’on e chibog. (Acts 5:42) Aram rogon ni ma yag ni nggu nonad ngak bokum milyon e girdi’ u gubin e duw. Bochan ni gathi gubin ngiyal’ ni bay e girdi’ u taferad, ma aram fan ni ku gamad ma machib ko yungi n’en ni boor e girdi’ riy. Gubin ngiyal’ ni gamad ma gay e kanawo’ nrayog ni nggu weliyed ko girdi’ riy murung’agen Jehovah nge tin nib m’agan’ ngay.
3. Mini’ e piin nib milfan ngorad ni ngar machibnaged fare thin nib fel’?
Gubin e tin riyul’ e Kristiano nib milfan ngorad ni ngar machibnaged fare thin nib fel’ ko girdi’. Ba ga’ fan u wan’mad e re maruwel ney nib milfan ngomad. Gubin ngiyal’ nra mab e kanawo’ ngomad, ma gamad ma machib ni bochan e gamad manang nrayog ni nge ayuweg e yafos ko girdi’. (Mu beeg e 1 Timothy 4:16.) Danir pi’ puluwmad ko re maruwel ney, ya be gaar e Bible: “Ke yog ngomed nda mpied puluwon, ere mpied ndab ni pi’ puluwon ngomed.” (Matthew 10:7, 8) Gathi gubin e girdi’ ni ma m’agan’rad ko n’en gamad ma machibnag. Machane gamad ma ulul ko machib ni bochan e aram bang ko liyor romad, maku ma felfelan’nag Jehovah.
KUM FIL BOCH BAN’EN U MURUNG’AGEN
Kum fil boch ban’en u murung’agen rogon ni ma machib e Pi Mich Rok Jehovah u ga’ngin yang e fayleng nge rogon ni ma ayuwegmad Jehovah.
Machib ni yibe tay u ga’ngin yang e fayleng: (A) Costa Rica, (B) Meriken, (C) Benin, (D) Thailand, (E) Waab, (F) Sweden
4. Ba gel e maruwel ni gamad ma tay ya nge yag ni nggu machibnaged urngin e girdi’
Ma athamgil e Pi Mich Rok Jehovah ya nge yag nra machibnaged e girdi’ u gubin yang. Mu yaliyew e re VIDEO ney, mi gimew weliy e fulweg ko re deer ni baaray.
-
Mang e ga be ngat ngay u rogon e athamgil ni ma tay e Pi Mich Rok Jehovah ya nge yag nra machibgad?
Mu beegew e Matthew 22:39 nge Roma 10:13-15, mi gimew weliy e fulweg ko gal deer ni baaray:
-
Uw rogon ni ma m’ug ko machib ni gamad ma tay nib t’uf e girdi’ romad?
-
Uw rogon u wan’ Jehovah e piin yad ma machibnag fare thin nib fel’?—Mu guy e verse 15.
5. Gamad ma maruwel Got u taabang
Boor ban’en ni ke buch ni be dag ni Jehovah e ir e be pow’iy e maruwel romad. Bod ni bay reb e walag ni pumoon u New Zealand ni ka nog Paul ngak ni mada’nag be’ nib pin u nap’an ni be machib u mit e tabinaw reb e mithigyal’. Rofen nem ni kadbul e ke meybil e re ppin nem ngak Got ni be fanay fithingan ni Jehovah, me yog ngak ni nge pi’ be’ nge yib i machibnag. I gaar Paul, “Dalip e awa nga tomuren, mug taw nga tafen.”
Mu beegew e 1 Korinth 3:9, mi gimew weliy e fulweg ko re deer ni baaray:
-
Uw rogon ni be m’ug u boch ban’en ni ke buch ni bod e n’en ni buch u New Zealand ni Jehovah e ir e be pow’iy fare maruwel ni machib?
Mu beegew e Acts 1:8, mi gimew weliy e fulweg ko re deer ni baaray:
-
Mang fan nib t’uf ni nge ayuwegdad Jehovah ya nge yag nda rin’ed fare maruwel ni machib?
Baaray murung’agen ban’en
Nap’an e muulung ni gamad ma tay u lan e wik, ma yima skulnagmad u rogon ni nggu machibgad. Faanra kam un nga reb e pi muulung ney, ma uw rogon e re skul ney u wan’um?
6. Gamad ma fol ko n’en ni tay Got chilen ni aram e ngan machib
Nap’an e bin som’on e chibog, me guy e pi tatogopuluw rogon ni ngar taleged pi gachalpen Jesus ndab kur machibgad. Tin som’on e Kristiano e ur guyed rogon ni ngar ayuweged mat’awrad ni ngar machibgad ni aram e ur ‘micheged nga laniyan’ e girdi’’ fare thin nib fel’. (Filippi 1:7) Ku aram e n’en ma rin’ e Pi Mich Rok Jehovah e ngiyal’ ney. a
Mu beegew e Acts 5:27-42, mi gimew weliy e fulweg ko re deer ni baaray:
-
Mang fan ndab gu talgad ko machib?—Mu guy e verse 29, 38, nge 39.
RAYOG NI NGE GAAR BE’: “Mang fan ni ma machib e Pi Mich Rok Jehovah u mit e tabinaw i yan?”
-
Uw rogon ni ga ra fulweg?
N’EN KAN FIL
I yog Jesus ngak pi gachalpen ni ngar machibnaged fare thin nib fel’ u gubin e nam. Be ayuweg Jehovah e girdi’ rok ni ngar rin’ed e re maruwel ney.
Ngan Sul u Daken
-
Uw rogon ni yibe machibnag fare thin nib fel’ u ga’ngin yang e fayleng?
-
Uw rogon ni ma m’ug ko machib ni gamad ma tay nib t’uf e girdi’ romad?
-
Ga be lemnag nrayog ni ngad felfelan’gad ni faan gad ra un i rin’ fare maruwel ni machib, fa? Mang fan?
MU GAY MURUNG’AGEN
Mu guy rogon ni ma machibnag e Pi Mich Rok Jehovah e girdi’ u boch e mach nib ga’.
Uw rogon ni ke ayuweg e Pi Mich Rok Jehovah e piin kar milgad ko nam rorad?
Mmotoyil ngak be’ ni nge weliy fan ni ke felfelan’ ni ke fanay e yafos rok ni nga i machib.
Mu beeg murung’agen boch e case ni ke yag ni ngan gelnag u boch e tagil’ e puf oloboch ni ke momnag rogon ni ngan machibnag fare thin nib fel’.
“Kingdom Preachers Take Their Case to Court” (God’s Kingdom Rules!, chapter 13)
a Got e ir e ke pi’ mat’awmad ni nggu machibgad. Aram fan nde t’uf ni nge pi’ e girdi’ ni yad ma yog e thin mat’awun e Pi Mich Rok Jehovah ni ngar machibnaged fare thin nib fel’.
