GURUY NI 44
Gubin e Madnom ni Yima Tay nib M’agan’ Got Ngay, Fa?
Baadag Jehovah ni ngad felfelan’gad ko yafos rodad mu kud ted boch e madnom ni ngad felfelan’gad ngay. Machane gur, gubin e madnom ni yima tay nib m’agan’ ngay, fa? Uw rogon ni ngad daged nib t’uf Jehovah rodad u daken e pi madnom ni gad ma un ngay?
1. Mang fan ni boor e madnom nde m’agan’ Jehovah ngay?
Sana ga ra gin ngay ni boor e madnom ni yima tay ni ke sum u boch e machib nde puluw ko Bible ara ke sum rok e piin yad ma liyor nga boch e got ni googsur. Pi madnom ney e ku rayog ni bay rogon ko teliw ni googsur, ara ngongolen e pig, ara fare machib nra yim’ be’ ma bay ban’en rok ni ma par nib fos. Ku bay boch e madnom ni bay rogon nga boch ban’en nde riyul’ ni ke mich u wan’uy nge boch ban’en ni ke mich u wan’uy ni yima yog nra fal’eg e wol ko girdi’. (Isaiah 65:11) Ke ginang Jehovah e pi tapigpig rok ni ke gaar: “Ngam pithiged gimed rorad. Ma dariy ban’en ni ngkum rin’ed ko n’en nde klin.”—2 Korinth 6:17. a
2. Uw rogon u wan’ Jehovah boch e madnom ni yima n’uf e girdi’ riy ni yugu ba pag rogon?
Be ginangdad Jehovah ndabi ‘mang girdi’ e ngad ted e pagan’ rodad nga daken.’ (Mu beeg e Jeremiah 17:5.) Bay boch e madnom ni yima tayfan e pi pilung riy nge salthaw. Ku bay boch e girdi’ ni yad ma madnomnag e pi n’en kan tay ni pow ko nam ara rofen ni ke tabab reb e nam ni ngar pared rorad. (1 John 5:21) Ku bay boch e girdi’ ni yad ma madnomnag boch e ulung ni ke sunmiy e am ara yug girdi’. Ere uw rogon u wan’ Jehovah ni faanra yigi pag rogon nda n’ufed be’ ara reb e ulung ni be tay langin boch ban’en nib togopuluw ko n’en nib m’agan’ ngay?
3. Mang boch e ngongol nrayog ni nge kirebnag e pi madnom ni yima tay u wan’ Got?
Be yog e Bible nib kireb ni ngan ‘balyang ko rrum, ma yibe un ko madnom ni yibe wagey riy, ma yibe un ko mur ni yibe unum e rrum riy.’ (1 Peter 4:3) Bay boch e madnom ni yima tay ndariy yaramen e ngongol ko girdi’ riy, maku yima rin’ boch e ngongol nib puwlag riy. Ere faanra ngad pared ni gad boch e fager rok Jehovah, mab t’uf ni ngad paloggad ko tiney e ngongol nib alit.
KUM FIL BOCH BAN’EN U MURUNG’AGEN
Mu fil rogon ni ngam dugliy e n’en nib fel’ ni ngam rin’ ni bay rogon ko pi madnom ni yima tay ya nge yag nim felfelan’nag Jehovah.
4. Dab mu un ko pi madnom nde m’agan’ Jehovah ngay
Mu beegew e Efesus 5:10, mi gimew weliy e fulweg ko pi deer ni baaray:
-
Mang e ba t’uf ni ngad guyed rogon ni ngad nanged u m’on ni ngad dugliyed ko ngad uned nga reb e madnom fa danga’?
-
Mang boch e madnom nib ga’ ni yima tay ko gin ga ma par riy?
-
Ga be lemnag nib m’agan’ Jehovah ko pi madnom ney fa danga’?
Kaam lemnag rogon u wan’ Got e madnom ni yima tay ni fan ko rofen nni gargeleg be’ riy, fa? Dariy ba ngiyal’ ni ke weliy e Bible murung’agen reb e tapigpig rok Jehovah ni be madnomnag e rofen nni gargeleg be’ riy, machane be weliy murung’agen l’agruw ni’ ndarur pigpiggow ngak nni madnomnag e rofen nni gargelegrow riy. Mu beegew e Genesis 40:20-22 nge Matthew 14:6-10. Tomuren mi gimew weliy e fulweg ko gal deer ni baaray:
-
Mang e taareb rogon ko gal madnom ney?
-
Ga be lemnag ma uw rogon u wan’ Jehovah e madnom ko rofen nni gargeleg be’ riy nrogon nib puluw ko gal thin nu Bible ney?
Machane sana rayog ni nge lungum u wan’um, ‘Faan gu ra un ko madnom ko rofen nni gargeleg be’ riy ara yugu reb e madnom nde puluw ko Bible, ma gur, bay rogon u wan’ Jehovah?’ Mu beegew e Exodus 32:1-8. Tomuren mi gimew yaliy e re VIDEO ney mi gimew weliy e fulweg ko gal deer ni baaray.
-
Mang fan nib t’uf ni ngad guyed rogon ni ngad nanged e n’en nib m’agan’ Jehovah ngay?
-
Uw rogon ni ngad rin’ed e re n’ey?
Rogon ni ngad nanged ko ba m’agan’ Got nga reb e madnom fa danga’
-
Ke sum u boch e machib nde puluw ko Bible, fa? Ra ngam nang, mag gay murung’agen e gin ke sum riy.
-
Yibe n’uf boch e girdi’ riy, ara boch e ulung, ara pi pow ko nam ni yugu ba pag rogon, fa? Yigoo Jehovah e ir e ngad n’ufed me pagan’dad ngak ni nge pithig e pi magawon u fayleng.
-
Ba togopuluw e pi n’en yima rin’ riy ko pi motochiyel u Bible, fa? Ba t’uf ni ngad pared nib beech e ngongol rodad.
5. Mu ayuweg yugu boch e girdi’ ni ngar ted fan e michan’ rom
Nap’an nra towasariyem boch e girdi’ ni ngam un nga boch e madnom nde m’agan’ Jehovah ngay, ma rayog ni nge mo’maw’ ni ngam siyeg. Ere mu weliy e n’en kam dugliy u fithik’ e gum’an’ nge gonop. Mu yaliyew e re VIDEO ney ni be weliy reb e kanawo’ nrayog ni ngam rin’ e re n’ey riy.
Mu beegew e Matthew 7:12, mi gimew weliy e fulweg ko gal deer ni baaray:
-
Gur, be tamilangnag e re verse ney nib fel’ ni nga mog ngak chon e tabinaw rom ndar nanged e tin riyul’ ndabiyog ni ngar uned nga reb e madnom, fa?
-
Mang e rayog ni ngam rin’ ya nge yag nim micheg nga laniyan’ chon e tabinaw rom ni yugu aram rogon ndab mu un ngorad nga reb e madnom, machane yad ba t’uf rom mab ga’ farad u wan’um?
6. Baadag Jehovah ni ngad felfelan’gad
Baadag Jehovah ni ngaud felfelan’gad chon e tabinaw nge pi fager rodad u taabang. Mu beegew e Eklesiastes 3:12, 13, mi gimew weliy e fulweg ko re deer ni baaray:
-
Uw rogon ni be dag e re thin ney ni baadag Jehovah ni ngad felfelan’gad?
Baadag Jehovah ni nge felfelan’ e girdi’ rok u taabang. Mu yaliyew e re VIDEO ney ni be dag rogon ni ma m’ug e re n’ey ko pi international convention ni yima tay.
Mu beegew e Galatia 6:10, mi gimew weliy e fulweg ko pi deer ni baaray:
-
Ra ngad ngongliyed e “ngongol nib fel’” ngak yugu boch e girdi’, ma aram e be yip’ fan ni ngad uned nga boch e madnom nib ga’ ni ma tay e girdi’, fa?
-
Mang e ra yibnag e felfelan’ ngom—ngam pi’ ban’en u nap’an reb e madnom ni bochan e ban’en nthingar mu rin’, ara ngam pi’ ban’en ni bochan e ga baadag ni ngam rin’?
-
Boor e Pi Mich e bayi n’en mar ngongliyed bochi abich ni fan ngak pi fakrad mu kur pied e tow’ath ngorad. Faanra bay e bitir rom, ma mang boch ban’en nrayog ni ngam rin’ ni fan ngorad?
MA GAAR BOCH E GIRDI’: “De ga’ fan e gin ni sum reb e madnom riy, ya n’en nib ga’ fan e nge felfelan’ chon e tabinaw nge pi fager u taabang.”
-
Mang e ga ra yog?
N’EN KAN FIL
Baadag Jehovah ni ngad felfelan’gad chon e tabinaw nge pi fager rodad u taabang. Machane ku baadag ndab da uned ko pi madnom nde m’agan’ ngay.
Ngan Sul u Daken
-
Mang boch e deer nrayog ni ngad fithed gadad riy ni ngad nanged ko ba m’agan’ Jehovah nga reb e madnom fa danga’?
-
Uw rogon nrayog ni ngad ayuweged chon e tabinaw nge pi fager rodad ni ngar nanged fan ni kad dugliyed ndab da uned nga boch e madnom?
-
Uw rogon ni kam nang ni baadag Jehovah ni ngaud rin’ed boch ban’en ni ngad felfelan’gad ngay?
MU GAY MURUNG’AGEN
Mu beeg murung’agen boch e madnom nder ma un e piin Kristiano ngay.
“Why Don’t Jehovah’s Witnesses Celebrate Certain Holidays?” (Article ni bay ko website)
Mu beeg aningeg i fan nib mich u wan’mad nde m’agan’ Got ngay ni ngaun madnomnag e rofen nni gargeleg be’ riy.
“Why Don’t Jehovah’s Witnesses Celebrate Birthdays?” (Article ni bay ko website)
Mu guy rogon nrayog ni nge rinʼ e piin bitir nib tʼuf Jehovah rorad e nʼen nib mʼaganʼ ngay u napʼan boch e madnom.
Bokum milyon e Kristiano ni kar dugliyed ndab ra uned ko Christmas. Uw rogon u wan’rad e n’en kar dugliyed?
“They Found Something Better” (The Watchtower, December 1, 2012)
a Mu guy Yugu Boch e Thin 5 ni ngam nang e n’en ngam rin’ u nap’an ni yibe tay reb e madnom.
