Kammagar ni kam fek e tayim rom ni ngam fal’eg i yaliy e n’en ni bay ko re ke babyor ney, ya nge yag nim nang boch ban’en u murung’agen e Pi Mich Rok Jehovah, nge rogon e pi n’en ni yad ma rin’, nge rogon ni ma maruwel e ulung rorad. Gamad be athapeg ni ke tamilang u wan’um nriyul’ ni gamad be rin’ e n’en nib m’agan’ Jehovah ngay e ngiyal’ ney. Ma gamad be pi’ e athamgil nga lanin’um ni ngam ulul i fil murung’agen Got, mag weliy e n’en ni kam fil ngak chon e tabinaw rom, nge pi tafager rom, mag athamgil ngam un ko muulung romad ni gubin ngiyal’.​—Hebrews 10:23-25.

Ra munmun ma ga ra pirieg ni ke yoor e n’en ni kam fil u murung’agen Jehovah, ma re n’ey e ra tamilangnag ni riyul’ ni gab t’uf rok. Ireram e n’en nra k’aringem ni ngam dag ngak feni rib t’uf rom. (1 John 4:8-10, 19) Machane, uw rogon ni nge m’ug nriyul’ nib t’uf Got rom? Mang fan nra fel’ rogom ni faanra ga ra fol ko pi kenggin e motochiyel nu Bible? Mang e ra ayuwegem ngam adag ni ngam un ngomad i rin’ e n’en nib m’agan’ Got ngay? Ra felfelan’ e en ni be fil e Bible ni nge un ngom ngam gayew e fulweg ko pi deer ney ya nge yag nim pired chon e tabinaw rom ‘ni gimed ba t’uf rok Got, . . . me yag e yafos ndariy n’umngin nap’an ngomed.’​—Jude 21.

Gamad be pi’ e athamgil nga lanin’um ni ngam ulul ngam mon’og u kanawoen e tin riyul’ ni aram e ngam fil e bin migid e babyor ni kenggin e “Um Pired Ni Gimed Ba T’uf Rok Got.”