“I gur enggin gubin e yafos.”—Psalm 36:9, BT

Uw rogon ni ngad daged ni gad be tayfan e yafos?

• Acts 17:28; Revelation 4:11

  Yafos e reb e tow’ath ni ke yib rok Jehovah, ere susun ni ngad ted fan.

• Exodus 21:22, 23; Deuteronomy 5:17

  Ba kireb e mathang fan nge mali’ bitir u meyal.

• 1 John 3:11, 12, 15

  Ba kireb e fanenikan.

• 2 Korinth 7:1

  Mu siyeg boch e ngongol nib kireb ni yima mecham ngay ni bod rogon e tamagow nge ngan fanay boch e falay nib kireb.

• Matthew 4:5-7

  Mu siyeg boch ban’en ni yima chuweg e chalban ngay ni bay yaan e cham riy nge boch e gosgos ni yira maad’ad riy.

“Yafos ko gubin ban’en nib fos e bay u fithik’ e racha’.”—Levitikus 17:14, BT

Uw rogon e yafos nge racha’ u wan’ Got?

• Genesis 4:10; Deuteronomy 12:23

  Racha’ e be yip’ fan e yafos.

• Genesis 9:3, 4

  Rayog ni ngad ked e ufin, machane dab da ked e racha’ ni bay u fithik’.

• Acts 15:28, 29; 21:25

  Fare motochiyel rok Got ni be yog ni ngad siyeged e racha’ e ba muun ngay e racha’ ni yima fanay ko tafalay.

• Hebrews 11:6

  Tha’ u thildad Jehovah e aram e n’en nth’abi ga’ fan u lan e yafos rodad.

“Rachaen Jesus . . . e be beechnagdad u urngin e denen rodad.”—1 John 1:7

Mang e ra yag ngodad ni bochan e maligach ni pi’ Jesus?

• Levitikus 17:11

  Kakrom u nap’an piyu Israel e nap’an nra denen be’, ma ma pi’ e gamanman ni maligach, me yog ngak e prist ni nge puog boch e racha’ riy nga daken e altar ya nge n’ag Jehovah fan e denen rok.

• Matthew 20:28; Hebrews 9:11-14

  Nap’an ni yib Jesus nga fayleng, me pi’ e yafos rok ni nge biyuliy e denen rodad, ma yafos rok ni ke pi’ e ke yan nga lon fare motochiyel u murungagen e gamanman ni yima pi’ ni maligach.

• John 3:16

  Rib ga’ fan e yafos rok Jesus, ya tomuren ni faseg Jehovah nge sul nga tharmiy, ma aram me bing Jehovah e kanawo’ ngak e piin ni yad ra maruweliy e michan’ rorad ko fare biyul ni pi’ Jesus ni nge yag e yafos ni manemus ngorad.