PARTE 3
¿Jaisa machiakan juʼu jiapsiwame a naʼateo?
Lioj Adanta intok Evata juebena tuʼuwata am makak (Genesis 1:28; Krijtota yeu puʼarim yaʼari 17:25)
Jehova Lioj juka bat jaamutta Eva teamta juʼunaktek intok Adanta a juptuak (Maekos 10:6, 7).
Lioj Adanta intok Evata tua tuʼisi am juʼunaktek. Kobapo intok takaʼapo kaita ka tuʼik amet ayukan.
Edenpo seewam intok juyam auka nasuk joʼakanimme, batweta waʼam boʼokapo intok animalim aukapo. Tua ujyolisi machiku.
Jehova amemak eʼetejon intok juka tuʼik am majtan. Bempo jiba yuu betchiʼibo jiapsipeateko junamaʼa, bempo Liojta nok jikkajiʼean intok a nokaapo katʼean.
Lioj senu juya takata ka am bwaʼasaek (Genesis 2:16, 17)
Senu ankel Liojtau taweka kiktek. Junaʼa ka tuʼi ankel Bebejeʼeripo taʼewa.
Lioj Adanta intok Evata am nok tejwak senu juyata nasuk weyekamta, ka am bwaʼasaek. Bempo a bwaʼako, kokkoʼeanimme.
Juʼu Bebejeʼeri ka Jehova Liojta am nok jikkajiʼiian. Bakotpo amani, au nookak Evatawi, juyata ka bwawamta a bwaʼako ka a mukne ti au jiiak. Inien ket au jiiak: “Liojta e benane”. ¡Tua anokichia! (Genesis 3:1-5; 2 Korintiom 11:3.)
