•  Ashoung-né lélôk nzii 2

•  Mékweung mi é fhô a nteu ashoung-né Ndem 3-5

  •  Ashoung-né 3

  •  Mpè tsa’ mékweung ajwakné 4

  •  Létông-ô Biible 5

•  Ghôkô afa’ Lefô neung nteu 6-11

  •  Mévidéo méfœu’ lélôk mbheu nkeu Lefô 7

  •  Lézii ashoung-né pô gning 8

  •  Léping nzeum ngwoua 9

  •  Azi’né Biible 10

  •  Ashoung-né 11

•  Ntsi lénang kritèn 12-13

  •  Azi’né Biible nguia atchou’té 13

•  Ashoung-né lélôk nzôkô 14

•  Neung nteu anè létông azou pô lézi’né épouô 15

•  Léwouʼté pô léyè ménteukné 16

•  Njheu lélôk ngôk 17

•  Ngap zi nfènè yi a woua métchou’té a shi’ 18

•  Ngap mia atchou’té ta’ alé’é, kèè ézi élé’é tèt lè 19

•  Ngap zi mè kimté legwheu Yésso 20

•  Nfènè yi a tsang-a atchou’té Ntsi lénang kritèn pô afa’ Lefô 21

•  Ngnwèt atchou’té Ntsi lénang kritèn pô afa’ Lefô 22

•  Nfènè yi a tsang-a nnô ménfènè 23

•  Nfènè yi a yè nteukné anè ntsi lélôk nguiè ashoung-né 24

•  Nguia assikou mbaaté pia 25

•  Mévidéo 26

1. Mè pôngtè létsang-a atchou’té Ntsi lénang kritèn pô afa’ Lefô ndeung-ndeung pa’ ménteukné mouô mi é paaté, ngheuè Akèté atchou’té Ntsi lénang kritèn pô afa’ Lefô, é si ntsui poup. Nkwa épô mémia pi é lé nnou’ ntshi, é ghô wuè afa’ anè atchou’té mèt. Émô’ épouô pi é zeung shi’è zôp atchou’té éfœu’ métseum, é ghô zeung ngwuè zôp afa’ éwou, éyi pô veung mézi’né mi é nteu Biible, mbing neung nguè ménteukné Biible mé tsang lénang tsôp.—be-F p. 282.

 2. 1 minute. Mè zôp-é, mbing ngheuè apriya té mmak, ngnwèt yi a tsang-a atchou’té Ntsi lénang kritèn pô afa’ Lefô, a pôngtè lélôk méshoung-né mbông éshoung-ô afhœuté épouô ntshiè anè métsoo mi é tôkô assi. A ping nzèté nguè a lèè ntshiè athou apou anè métsoo mi é tswhi kuité nguia atchou’té.

  3. Ashoung-né: Mézizi 10. Athouô ashoung-né zi mè kè’té, pô mékwangté mèmbia kèè mèntèt lè mi é nteu éwou, é pou fhô a nteu Akèté atchou’té Ntsi lénang kritèn pô afa’ Lefô. Ta’ nfènè mè pôngtè léyè ashoung-né jiô, kèè ta’ nkuité ménfènè lè, éyi a tswhi nteueté anè éshheu ajwakné. Mè ghé zii lézi’né akèté Biible zi swhi, mbôngtè létsui vidéo lélôk nzii akèté mèt. Gning yi a yè ashoung-né, a ghô tsui  atchouang zi anè vidéo pô athouô ashoung-né. Téta’, a ké mbôngtè lé pou nkè’té mékwangté mi mè kia a nteu akèté atchou’té. Éshheu é ping ntoo, a lôk méfitou nguiè ashoung-né zi. A ghô ku’né métsoo mi a jiô a nteu amô’ akèté nkwa té sèt nzeum mbing nguikté, nda’ yi é zing ndeung-ndeung pô athouô ashoung-né zi.

 4. Mpè tsa’ mékweung ajwakné: Mézizi 10. Apak jiô a si ngô ashoung-né mé ménzèté, azi a té wè méshoung-né lélôk nzii, kèè lélôk nzôkô lè. Ta’ nfènè mè pôngtè létsang-a aji’ jiô, kèè ta’ nkuité ménfènè lè, éyi a tswhi nteueté anè éshheu ajwakné. Meung-mô yi a tsang-a aji’ jiô a pôngtè yi a léyè ménzèté mèmbia mi é éwou. A ghô zeung nkia kèè mè tông méleung Biible mi é éwou kèè ngang lè. Épô mémia é té pôngtè léyè méntsô’ô tè é tôk méseconde 30.

  5. Létông-ô Biible: Mézizi 4. Épô mémia pi é pômbang-a nda’, mè pôngtè létông. Meung-mô yi mè ntsô’ nguè a tông-ô Biible, a té pôngté léyè ashoung-né lélôk nzii, kèè lélôk nzôkô lè. Ngnwèt atchou’té a pôngtè létswhi nkuitè ngang-assikou a létông ndeung-ndeung pa’ a ntii-tii poup, nkuitè yi a léjou’ô ajoumi a si ntông-ô mbông-ô, nzeung nkuitè yi a létông té za’té. A zeung mbôngtè lékuitè yi a léghé tông, ntshiè athouô apou aji’ zi a si nzètè, nkoumné nghi afœu’ zi a si nzètè, nzeung ntshi afœu’ zi a si nzètè, mbing ntông pa’ a ghôô shoung-nè poup élé’é tseum. Pa’ mépak Biible mi mè tông, é sak ntôk émô’ la, nfènè yi a tsang-a atchou’té Ntsi lénang kritèn pô afa’ Lefô a pôngtè léfhô anè ajoumi ta’ meung-mô a ghô kou’ô légheu, té ntseukné afa’ a mbou yi.

 6. Mézizi 15. Apak atchou’té jiô a si ngô lélôk nkuité awuè-wuè a lékwhi anè ntsi zi a lôk mbheu nkeu Lefô poup, mbô anè ntsi zi a lôk nzi’né épouô Biible. Éwuè ngang-assikou lè mè ghô kia a légheuô a nteu Tsitsi lélôk nzi’né épouô a Biible, éfôkô ta’ akèté zi a ya, kèè vidéo yi a tsui lè, pa’ a ghô zeung nkia a léghô lé lôkô tsitsi mèt ngôkô. Mè gheuô anè apap méfœu’ lélôk mbheu nkeu Lefô, njiô amô’ aji’ zi a lè “Jiô pa’ mè kè’té léleung tchiô poup a nteu Tsitsi lélôk nzi’né épouô a Biible,” azi a si ngô lélôk nkuité épô mémia anè afa’ lépheu nkeu Lefô. Méghang-assikou ghô lôk mbèté afa’ zi mè ntseukné a mbou pôp éyi pô kông. Akèté atchou’té Ntsi lénang kritèn pô afa’ Lefô a yè ménteukné anè ntsi zi éwuè ngang-assikou lè, a ghô pètè afa’ zi poup, mbing nguiè njheu zi a lôk ghôkô afa’ mèt. Njheu zi mè ntseukné a mbou ngang-assikou a lélôk ngôkô afa’ zi é koo nzaa, mbô a té pôngtè léku’né métsoo mi a kông ndôk nguing-né njheu mèt-è. Ngang-assikou yi a mbèté nèt mbông-ô, a ghô ghô mmô’ éfœu’, mmak afa’ zi tè ajouô ta’ minute, kèè té ntôk lè, é vou’ô. Mè ghô zeung nguiè afa’ anè assikou a mbou ménfènè, éyi éshheu é too. A ghô mmô’ éfœu’, mè tsui ta’ vidéo éyi a té si ngô a nnô mévidéo mi é anè méfœu’ lélôk mbheu nkeu. A ghô poup, ta’ nfènè kèè ta’ nkuité ménfènè lè, éyi a tswhi nteueté anè éshheu ajwakné, mè tsang-a aji’ jiô mèt.

 7. Mévidéo méfœu’ lélôk mbheu nkeu Lefô: Mè ghô mmôʼ éfœu’, é tsui mévidéo méfœu’ lélôk mbheu nkeu Lefô, é ping yè ménzèté mi é kuitè léjheuè apè éwou. Mévidéo mèt é tsui éfœu’ a lélôk nzii ashoung-né pô gning, mbô éfœu’ a lélôk mbing nzeum ngwoua gning yi mè mbheu nkeu Lefô a mbou yi. Ngnwèt yi a tsang-a atchou’té Ntsi lénang kritèn pô afa’ Lefô, mè pôngtè létsang-a aji’ jiô.

 8. Lézii ashoung-né pô gning: Épô mémia pômbang-a mbô épi wôngwi é ghô ghôkô afa’ jiô. Gning mbang-a pôngtè léghôk pô gning mbang-a, méngwi ping ngôk pô méngwi; ngô té poup-ô, é ghô épouô ta’ atseung-è nguia. Pô ghô kang a létshiè aji’, kèè a lénang-a assi lè. Ngang-assikou a pôngtè létsa’tè gning yi a pheu nkeu a mbou yi pa’ mè ghôô ntsa’tè épouô poup anè akap ala’ zi pô nang éwou. A zeung mbôngtè léfhô anè éfœu’ lélôk mbheu nkeu éyi é nteu Akèté atchou’té Ntsi lénang kritèn pô afa’ Lefô té mbètè afa’ zi.

 9. Léping nzeum ngwoua: Épô mémia pômbang-a mbô épi wôngwi é ghô ghôkô afa’ jiô. Gning mbang-a a té pôngtè léghôk aji’ jiô pô méngwi. (km-F 5/97 p. 2) Pô ghô kang a létshiè aji’, kèè a lénang-a assi lè. A si nzètè nguè ngang-assikou a tsui éfœu’ mbông a lélôk mbing nzeum ngwoua gning yi a ké veung nkeu Lefô afœu’ zi mè lé pootè yi a mvhô légheuô. A pôngtè léfhô anè éfœu’ lélôk mbheu nkeu éyi é nteu Akèté atchou’té Ntsi lénang kritèn pô afa’ Lefô té mbètè afa’ zi.

 10. Azi’né Biible: Épô mémia pômbang-a mbô épi wôngwi é ghô ghôkô afa’ jiô. Gning mbang-a a té pôngtè léghôk aji’ jiô pô méngwi. (km-F 5/97 p. 2) Pô ghô kang a létshiè aji’, kèè a lénang assi lè. Afa’ jiô a pôngtè léghô éfœu’ lélôk ntsui pa’ ngang-assikou a si nzi’nè Biible a mbou gning a nka’ Lefô poup;  ndôkô nguè a té pôngté a léyè ashoung-né lélôk nzii kèè a lélôk nzôkô lè, nda’ yi afa’ zi mè ntseukné a mbou yi a si nzètè nguè a gheu poup. A té si nzètè nguè ngang-assikou a gheu gning yi pô yi si nzi’nè Biible a tông nkwa méntaané mi mè ghiité, mé nghi nténteuè; tè, mmô’ gning a ghô ké nkia yi a légheu poup. Ajoumi a tswhi ntseukné, a lèè ngôô létshiè athou apou anè ntsi mbông lélôk nzi’nè gning a Biible.

 11. Ashoung-né: Épô mémia pi é pômbang-a nda’ mè ghô wuè afa’ jiô; a si ngô ta’ athouô ashoung-né zi pô ya a mbou atchou’té.

 12. Mè nzôp mékou’ té mmak, mézizi 15 mi é paaté é ghô lélôk ntsia anè ta’ ashoung-né kèè méshoung-né mèmbia lè, nkuité épô mémia a léjiô pa’ pô ghô gheu poup té nzing ndeung-ndeung pa’ Ashoung-né Ndem a si ntsui poup. Ménfènè mè pôngtè létsang-a aji’ jiô, kèè wô kuité ménfènè pi é tswhi nteueté anè éshheu ajwakné lè, nda’ yi mè ghiitè ajouô ndè’è. Tè, ménfènè nda’ mè pôngtè létsang-a apak zi lè Ajoumi a si nzaka a mbou atchou’té.

  13. Azi’né Biible nguia atchou’té: Mézizi 30. Ta’ nfènè mè pôngtè létsang-a aji’ jiô. (Wô kuité ménfènè pi é tswhi nteueté anè éshheu ajwakné é ghô zeung ntsang-a zôp aji’ jiô, éyi ménfènè é té nguia atchou’té té nzaa.) Nnô ménfènè mè tsô’ épouô pi é ghô tsang-a azi’né Biible nguia atchou’té. Épô mémia pi mè tsô’ô wôp, pô pôngtè létsang-a azi’né jiô anè ntsi zi pô mmak anè njheu; pô zeung mbôngtè létshiè athouô apou anè méleung Biible mi é tswhi ntseukné, mbing ngheu tè épô mémia é jheuè apè anè azi’né. Pô ghô jiô ménteukné mbông anè ntsi lélôk ntsang-a azi’né a nteu mékèté mi é tsui pa’ mè tsang-a azi’né La Tour de garde poup. Meung-mô yi a tsang-a azi’né a pik té mmak apak zi mè nông ngô nzi’né anè ngap, a té zeung ésseung-è ashoung-né ndôkô fa’a léying-né njheu zi é vou’ô. Éshheu é ghô éwou mbô a si nzètè nguè mè ghô a nkwa méngap, nkoumné épô mémia pi pô tsang, mbô pi pô tông méntaané. Ngnwèt atchou’té Ntsi lénang kritèn pô afa’ Lefô a zètè nguè mè tsuèté njheu azi’né Biible nguia atchou’té, mbô meung-mô yi a tsang-a azi’né mèt, mè pôngtè lékia pa’ a tsuèté poup. A ghô kia nguè mè té tông émô’ méntaanè.

  14. Mézizi 3. Anè aji’ jiô, ngnwèt atchou’té Ntsi lénang kritèn pô afa’ Lefô a pôngtè lé lèè nkimtè mékwangté mi é tswhi ntseukné, émi mè jiô anè atchou’té. A zeung mbôngtè yi lékia émô’ métsoo mi mè shi’ jiô anè ngap zi é paaté. A ghô zeung ntông ménzeung méghang-assikou pi é shi’ tôk ngap aya’a, éyi njheu é too. Ngnwèt mè pôngtè létông ménkeu mbô mékèté mi filiale a too, nda’ yi mè ghiitè ajouô ndè’è; a ping ngheu poup a nteu méshoung-né lélôk nzôkô. A té si nzètè nguè mè tông métsoo pa’ atangté lélôk mbheu nkeu, kèè atangté lélôk ntoung-né nguia atchou’té lè, a mvhô atchou’tè; mè pôngtè lépèlè métangté mèt anè alang-a. Ngnwèt atchou’té a teue-njheu njiô léghè jheu é koo kœuôk a lélôk ntông ménkeu kèè mékètè mi filiale a too lè, mbô a ghô zèté a mbou épô mémia pi é wuè afa’ a nteu apak zi lè Ntsi lénang Kritèn nguè pô teunè lémak. (Tchiité  ntaané 13 pô  ntaané 17.) Mè pôngtè lézôkô atchou’té mé azôp, ngheuè apriya.

 15. Éwuè ngang-assikou lè a pôngtè lélôk akèté Lézi’né épouô éshi’ a nguia atchou’té. Akèté mèt a ghô a nteu atông-ô mveung-è kèè anè apipa lè, mbô alô’ a té assi. A si nzètè nguè ngnwèt atchou’té Ntsi lénang kritèn pô afa’ Lefô a tsou’nè anè akèté mèt té nguia nteukné a mbou méghang-assikou. Éwuè ngang-assikou lè, a pôngtè légheuô a nteu akèté Lézi’né épouô, mbètè azi’né zi a si ntchiitè afa’ zi mè ntseuknè mbou yi a nteu Akèté atchou’té ntsi lénang kritèn pô afa’ Lefô. Ngnwèt atchou’té a té pôngtè létii azou anè apap zi a lè “Tii pa’ o gheuô té ntshi poup” a nteu akèté Lézi’né épouô, éwuè ngang-assikou lè mè pôngtè légheu poup a nteu azi akèté.

  16. Ngang-assikou pik té mmak afa’ zi, ngnwèt atchou’té Ntsi lénang kritèn pô afa’ Lefô a wè ajouô ta’ minute a lélôk nguiè yi nteukné, éfhô anè akèté Lézi’né épouô. Ngnwèt atchou’té a nông nguiè aji’ a mbou ngang-assikou pa’a, a té shoung azi’né zi a gheuô mé ngôkô. Tè, ngang-assikou a pikè té mmak, ngnwèt atchou’té a pôngtè léfoussi siaknè yi, té nkim azi’né zi mè nông ntchiitè yi éwou, mbing shoung  mela’poup tè ngang-assikou a ghôkô mbông-ô, kèè shoung-ô yi mé apông-nteu mela’poup tè a zeung mbôngtè léghôkô azi’né mèt lè. Ngnwèt atchou’té a ghô zeung siaknè ngang assikou anè émô’ métsoo mi a gheuè mbông-ô, éyi a si njiô léghè nguia atchou’té ghô jheuè apè éwou. A ghô zeung ndôk akèté Lézi’né épouô, kèè akèté Tirez profit lè, nguiè nteukné a mbou ngang-assikou tè mbô atchou’té mii; a ghô yè nteukné poup anè azi’né zi ngang-assikou a ké nông ngôkô, kèè anè zi ndè’è lè, éyi a jiô léghè a ghô kuitè yi. O nông nkông-ô léku’né nzhè afa’ ngnwèt anè atchou’té Ntsi lénang kritèn pô afa’ Lefô, mbô afa’ nfènè yi a yè nteukné anè ntsi lélôk nguiè ashoung-né, o tchiité  ntaané 17, pô  ntaané 22, ngheu  24.

     17. Ta’ meung-mô a té pôngtè létôk njheu zi mè yè a mbou yi a lélôk ngôkô afa’ zi; tè mbô ngnwèt atchou’té Ntsi lénang kritèn pô afa’ Lefô. A zi ngô yi mè kaa ntii nguè “té tôk” anè njheu a lélôk ngôk afa’, mbô ngang assikou a té pôngtè lésak ashoung-né ndèè ndôk fa’a yi a léying-né njheu zi mè ntseuknè mbou yi, éyi a nda’ mmak afa’ zi. Ngnwèt atchou’té a pôngtè lélôk léghi té nza’ ashoung-né ngang-assikou, éyi a tôk njheu zi mè ké tseuknè mbou yi. Ta’ meung-mô a tôkô njheu lélôk ngôkô afa’ zi mè ké tseuknè mbou yi, mbô nfènè yi a yè nteukné anè ntsi lélôk nguiè ashoung-né, a pôngté léjiô yi tè mbô atchou’té a mii. (Tchiité  ntaané 24.) Atchou’té ntseum, tè mbô mézôp ngheuè apriya, a pôngtè lénang a 1 hawa pô mézizi 45.

 18. Ngap zi nfènè yi a woua métchou’té é nang té shi’, mè pôngtè légheu métchou’té ndeung-ndeung pa’ a ntii-tii poup a nteu akèté Ntsi lénang kritèn pô afa’ Lefô, nda’ nguè épô métsoo mouô mi é paaté, é koumné: Nfènè yi a woua métchou’té a yè ta’ ashoung-né zi a nang mézizi 30 anè aji’è azi’né Biible nguia atchou’té. Ngnwèt atchou’té a pôngtè léfoussi nkimté ajoumi mè jiô anè atchou’té, mbaaté nkia métsoo mi mè la’ ngap aya’a éjiô, nzeung ntông ménkeu mbô mékèté mi filiale a ntoo, éyi é assi, té mbing nguiè aji’ a mbou nfènè yi a woua métchou’té. Nfènè yi a woua métchou’té mè kang-a azôp zi mè lôk zôkô atchou’té alé’é mèt. A ghô gheuè apriya lélôk nzôkô, kèè yi ngnwèt a tsô’ô ta’ meung-mô lè. Épô mémia é té pôngtè létchou’té a nguia assikou mbaaté pia anè ngap zi nfènè yi a woua métchou’té a shi’è. Meung-è gha’ nnô épô mémia pi é shoung-ô ala’ ndè’è, mbing nzèè té ghô a mia atchou’té, a ghô assi, mbô pô ghô ké ngheu métchou’té môp, anè ngap mèt. Téta’, pô ké mbôngtè léghô pô mia atchou’té afœu’ zi nfènè yi a woua métchou’té a si nguiè ashoung-né zi.

 19. Mè té shi’ gheu métchou’té anè ngap mia atchou’té ta’ alé’é, kèè azi élé’é tèt lè. Épô mémia é pôngtè létsa’ métsoo mi mè nông ngô njiô a nguia atchou’té pô méngnwèt, kèè a nteu atseung-è nguia lè.

 20. Mè té shi’ gheuè atchou’té Ntsi lénang kritèn pô afa’ Lefô afœu’ zi Lékimté legwheu Yésso a gwheuè nteu ngap-a. Téta’, mè pôngtè légheuè atchou’té lélôk ntouô nka’ Lefô alé’é Lékimté legwheu Yésso.

 21. Nnô ménfènè mè kang-a nfènè yi a tsang-a atchou’té Ntsi lénang kritèn pô afa’ Lefô. Nfènè mèt, mè pôngtè lépèté akœuè-kœuè ndôk ngheu tè atchou’té a tôkô mbông-ô, ndeung-ndeung pa’ ménteukné mouô é si ntsui poup. Mela’poup tè a si nzètè nguè pô nfènè yi a yè nteukné anè ntsi lélôk nguiè ashoung-né, é piakné éfœu’ métseum. Akèté atchou’té Ntsi lénang kritèn pô afa’ Lefô a pik té ntoo, nfènè yi a tsang-a atchou’té Ntsi lénang kritèn pô afa’ Lefô a pôngtè yi létseukné méfa’ a mbou méghang-assikou. (Tchiité  méntaané 5-11.) Mè pôngtè léteue-njheu nguiè afa’ a mbou ngang-assikou, tsôô méngap mèntèt, tè alé’é zi a ghôkô afa’ mèt a shi’. Mè lôkô pipa yi a lè Devoir d’élève à la réunion Vie chrétienne et ministère (S-89-F), té nguiè afa’ a mbou ngang-assikou.

  22. A nkwa méngap, ta’ nfènè mè pôngtè léghô ngnwèt atchou’té Ntsi lénang kritèn pô afa’ Lefô. (Wô kuité ménfènè pi é tswhi nteueté anè éshheu ajwakné é ghô zeung tsang-a aji’ jiô, éyi ménfènè é té nguia atchou’té té nzaa.) Yi mè pètè ashoung-né lélôk nzii, mbô ashoung-né lélôk nzôkô, ngheu ménzèté mi a yè anè mévidéo méfœu’ lélôk mbheu nkeu. Yi mè zeung nguiè aji’ a mbou nkwa épô mémia pi é  tôkô mvhô; a ghô ping nzeung ngwuè zi amô’ afa’ anè atchou’té, éyi ménfènè é té a nguia atchou’té té nzaa. A té pôngtè léshoung-né tè’è. Nnô ménfènè mè kia kèè ta’ meung-mô a ghô kou’ô yi a léghô ngnwèt anè atchou’té Ntsi lénang kritèn pô afa’ Lefô, kèè ngang lè. Mè pôngtè légheuè atangté anè ntsi zi éwuè nfènè lè, éyi mè njiô nguè a kou’ô yi a léghô ngnwèt, a zhè alé’é zi a tsang-a atchou’té. Téta’, éfhô anè ndoung ménfènè pi é nguia atchou’té, nfènè yi tsang-a atchou’té Ntsi lénang kritèn pô afa’ Lefô a ghô ghôkô afa’ ngnwèt méngueô té nzaané, ntôk émô’ ménfènè. Nfènè yi a kou’ô yi létsang-a Azi’nè Biible nguia atchou’té, a ghô zeung ngô ngnwèt anè atchou’té Ntsi lénang kritèn. Séssou, pè lèè nkimté nguè ngnwèt atchou’té a pôngtè lésiakné méghang-assikou, éseumtè wôp anè méfa’ môp, mbing ndôkô apông-ô nteu té nguiè wôp nteukné. Ngnwèt atchou’té pôngtè létsang-a atchou’té anè ntsi zi a mmak anè njheu. (Tchiité  ntaané 14 pô  17.) A kông-ô, mbô a ghô zèté nguè mè tshiè amô’ ajoung-ô nghi a mvhô, nzhè nguè a tshi éwou tè tông épô mémia a mvhô, tè mè lé njheu pii. Ngnwèt atchou’té a ghô zeung nkia yi lénang assi a mvhô, afœu’ zi ngang-assikou a si ntông-ô Biible a mvhô ala’, mbô éfœu’ zi méghang-assikou é si ntôkô anè apak atchou’té zi a lè Ghôkô afa’ Lefô neung nteu. A gheuè poup mbô mè té pii njheu tè’è.

 23. Nfènè yi a tsang-a nnô ménfènè kèè nfènè yi a kuitè yi lè, mè tseuknè afa’ a mbou épô mémia anè atchou’té Ntsi lénang mékritèn pô afa’ Lefô; tè, yi mè té yè afa’ a mbou méghang-assikou. Ndôkô nguè yi mè zeung ngueô a nnô épô mémia pi nnô ménfènè é ntsô’, nkang-a meung-mô yi a ghô ngnwèt anè atchou’té Ntsi lénang kritèn pô afa’ Lefô, éziè ngap lè. A ghôkô ta’ nnô pô nfènè yi a tsang-a atchou’té Ntsi lénang kritèn pô afa’ Lefô ndôk ngheu tè mè pèlè atangté atchou’té anè alang-a.

   24. Éshheu é ghô éwou, mbô nfènè yi a ghôkô afa’ jiô, a pôngtè yi léghô ta’ meung-mô yi a kwa’ nzhè léyè ashoung-né. Nfènè mèt a zu’té nguè atchou’té Ntsi lénang Kritèn pô afa’ Lefô a mii, té nguiè nteukné a mbou émô’ ménfènè, mbô a mbou wô kuité ménfènè anè ntsi lélôk nguiè ashoung-né; a zeung nguiè nteukné anè ntsi lélôk nguiè ashoung-né a mbou ala’, anè ntsi lélôk ntsang-a azi’né La Tour de Garde, mbô anè ntsi lélôk ntsang-a azi’né Biible nguia atchou’té, ngheu anè ntsi lélôk ntông méntaané. (Tchiité  ntaané 17.) Ménfènè pi é kwa’ nzhè léyè ashoung-né pô ghô éwou té nzaa, mbô mè ghô koumnè meung-mô yi a ghôkô afa’ jiô mèt a nkwa méngou’. A té si nzèté nguè nfènè yi a yè nteukné anè ntsi lélôk nguiè ashoung-né, a yè nteukné élé’é tseum a mbou épô mémia.

 25. Mè ghô wè nguia assikou mbaaté pia éfhô anè ndoung méghang-assikou. Ta’ meung-mô yi a zhè yi léyè nteukné mè ghô tsang-a nguia assikou mbaaté pia; éshheu ping ngô éwou mbô a si nzètè nguè a ghô ta’ nfènè. Téta’, ta’ nkuité ménfènè yi a tswhi nteueté anè éshheu ajwakné, a ghô zeung ntsang nguia assikou mèt. Nnô ménfènè mè kang épô mémia pi pô ghô tsang nguia assikou mbaaté pia, mbing nzeung nkia kèè mè ghô ghô mmô’ éfœu’ ékoumnè meung-mô yi a tsang-a lè. Meung-mô yi a tsang-a assikou mèt, a pôngtè yi légheu pa’  ntaané 16 é si ntsui poup. Méghang-assikou pi é wuè afa’ a nteu nguia assikou mbaaté pia, é gheuô éwou afœu’ zi mè zôkô apak atchou’té zi a lè Mpè tsa’ mékweung ajwakné. Pô ping fhô éwou ntoo afœu’ zi pô mmak apak atchou’té zi a lè Ghôkô afa’ Lefô neung nteu. Éshheu é ghô éwou, mbô épô mémia pi é nteu nguia assikou mbaaté pia, é pôngtè lénang éwou té njiô mévidéo mi mè si ntsui té fhô nteu mia nguia atchou’té, anè apak atchou’té zi a lè Ghôkô afa’ Lefô neung nteu. Ngô té poup-ô, mbô meung-mô yi a tsang-a nguia assikou mèt, a ghô lôk atông-ô mveung-è kèè tablèt lè, té ntsui vidéo.

 26. Ménzeung mévidéo mi mè koo tsui a nguia atchou’té, é nteu Akèté atchou’té Ntsi lénang kritèn pô afa’ Lefô. Mè ghô fôk mévidéo mèt a nteu JW Library®, é ping ngô anè ntsi zi mè ghô lôk ntsi-ntsi tsitsi té ntông. Ta’ meung-mô a ghô lôkô ta’ vidéo éfœu’ lélôk mbheu nkeu, ntsang-a atchou’té lélôk ntouô nka’ Lefô éyi mè nda’ ntsui vidéo mèt a nguia atchou’té.