Pa’ métchou’té mimpè ntseum la, atchou’té lélôk mbheu nkeu Lefô a si ngô mmô’ éshheu yi Joovah a yè mbou pimpè métseum, a lélôk ntsui nkông-né a nnô pimpè, mbing ngôk méfa’ mi mbông. (Héb. 10:​24, 25) Atchou’té mèt a pôngtè lé lèè nang-a mézizi 5 nda’, mbing ngô yi a nang tè’, a ghô mézizi 7. Lépèté épô mémia, ntsui wôp aji’ zi pô gheuô pheu nkeu éwou, mbô apriya, é pou ngô a nteu éwou. (Atchou’té mèt a zeung mbôngtè lé tswhi mvôk éyi a paatè amô’ atchou’té.) Meung-mô yi a tsang-a, a pôngtè yi a lé lèè mbètè ajoumi a kuité épô mémia a lépheu nkeu Lefô mbông-ô alé’é ala’ mèt. Mpè nna’ mbè éfœu’, a Sassidè, mbông a lé lèè nkimtè ajoumi épô mémia é kouô nka’ Lefô, éshoung-ô gning yi pô jiô mbaa mela’mi épouô té nzaané a nnô pôp, é kè té pheu nkeu a nteu ngap-a. Émô’ métsoo mi mè ghô zeung ndôk ngheuè atchou’té mèt, é mouô:

• Fœu’nè ta’ éfœu’ lélôk mbheu nkeu Lefô ézi é fhô a nteu Akèté atchou’té​—Ntsi lénang kritèn pô afa’ Lefô

• Tsui pa’ mè ghô fhô anè amô’ anou zi a ké tôkô assi, kèè anè mmô’ nkeu yi é nteu mèssa’akô lè, té nzii ashoung-né

• Fa’ méshheu lélôk mbheu nkeu, tè mbô pa’ gning a shoung-ô anou ndôk nza’a ashoung-né jou

• Tsui pa’ mè ghô shoung-né poup pô gning yi a té veung nguè Ndem a éwou, mbô gning yi a kwang nguè métsoo é lé lèè nzii-zii, ngheuè gning yi a si shoung-nè ala’ ndè’è, kèè gning yi a nteu mmô’ tchôssi yi mè té ghakné njiô a lépfhou piè lè

• Tsui pa’ mè ghô lôk amô’ apap jw.org, kèè apap application JW Library^®, kèè mbô Biible lè, ngôk poup

• Tsui pa’ mè ghô lôkô tsitsi lélôk nzi’né épouô a Biible, ngôk poup

• O ghô kuité épô mémia a léjou’ pa’ pô ghô lôkô atông-ô mveung-è, ntii mékèté ndôk mbheu nkeu Lefô poup; nkuitè wôp a léjiô pa’ pô ghô pheu nkeu Lefô a ndoo azaa, mbing nzeum ngwoua épouô, mbing nzeung ntsang mézi’né Biible poup

• Kimtè wôp pa’ pô ghô paa athouô zôp a nka’ Lefô poup, mbô pa’ pô ghô gheu poup té nzhè a lékoumnè ashoung-né zi pô nteue-njheu mbèté. Zeung-è nkimtè wôp a léwuè atshuè mbông, mbing njiô épouô pi pô pheu nkeu Lefô a mbou pôp mé mbông lézeuk; o ghô zeung nkimtè wôp émô’ métsoo mi é pa’ émouô laa

• Pè a pôp é ghô tsa’a ta’ azi’né a nteu akèté Létông-ô azou pô lézi’né épouô kèè njiô ta’ vidéo yi a touô nteu éwou lè, mbing mbiakné

• O ghô tsui épô mémia pa’ pô ghô seumté ménèt môp, mbing nzeung nkuité ménèt môp nzeung-né nzeung-né a nka’ Lefô poup

• Pè a pôp é ghô zeung ntsa’a ta’ léleung Biible tsi é wuè atchouang pô afa’ lépheu nkeu Lefô, kèè ta’ pêté anè lépheu nkeu Lefô éyi a seumté lè