Biible a kim nnô mékritèn mèmbia pi é ghôk méfa’ a nguia atchou’té—“ménfènè ngheu wô kuité ménfènè.” (Philippiens 1:1) Mè jiô wôp a nteu lélœuè ménguia atchou’té. Wô kuité ménfènè é ghôk émiè méfa’ mi é ghô kuitè yimpè?

Pô kuité ménfènè. Wô kuité ménfènè é teueté anè éshheu ajwakné. A zi ngô yi pô zèè ngwèsso kèè pô na’ nkwhi lè, mbô é si ngô épô mémia pi é ghôk mé ta’ nteu, mè ghô ping nzeung sang anè pôp. Afa’ azôp a tseukné mbing ngô a légheu métangté pô épô méfa’ a nguia atchou’té. Léping ngheu poup, a kuité ménfènè a lépèté nèt mbông-ô té nzi’né épô mémia a nguia atchou’té mbing nzeung ntchiitè wôp.

Pô ghôk mé ta’ nteu. Émô’ wô kuité ménfènè é kui épouô pi é shi’ a nguia atchou’té, épimô’ é ghôkô anè tsitsi a lélôk nkô’né nghi. Émô’ é ghapté mékèté, épimô’ é sang mbing éfeung nkap zi épô mémia é yè ndôk ntôôtè afa’ Lefô. Émô’ é zeung nghiité lepfhou ala’ tsi épô mémia é pheu nkeu Lefô éwou a nteu tissông. Pô métseum é ping mbou ngôk ndôk ngheu nguia atchou’té é laané mbing ngnwang-né éfœu’ métseum. Ntôk méfa’ mouô mèt, pô zeung nkuité ménfènè a létchiité mékritèn pi é kwhi tè athouô zôp a fôk. Ménfènè é zi ntseuknè aziè afa’ lè a mbou pôp, mbô pô ké ghôk mé ta’ nteu. A ping ngheu épô mémia é wou’tè wôp.​—1 Timothée 3:13.

Pô tsui éfœu’ mbông. Mè fhô anè atshuè mbông zi pô wè té nkang wô kuité ménfènè. Pô tsia anè méthouô ashoung-né mi pô yè a nguia atchou’té, éseumtè aveung-è nteu épô mémia. Azèè zi pô wè anè afa’ lépheu nkeu Lefô, a yè ngaaté a mbou épô mémia. Pa’ wô kuité ménfènè pô ménfènè é ghôk ngô ta’ la, a tshouné épô mémia a léghô mé lékak mbing ntchou’tè zôp ngô ta’. (Éphésiens 4:16) Pô ku’nè nkwhi anè éshheu ajwakné, mbô pô shi’ é tchi’è zôp ménfènè.

• A zèté nguè wô kuité ménfènè é wuè aziè atshui?

• Wô kuité ménfènè é ghaa tè atchouang mbông a ghô a nguia atchou’té?