A kè anè ngou’ 2020, méndœuè-nou té nzaa é tôkô assi tè mbô Aghôô COVID-19 zi a ké pou njheu ngông. Ménjheuè-njiô Joovah é ké kuité épouô pi ménou mouô mèt é ké gheuè wôp, é lèkô?

 Comité des coordinateurs Nnô wô tshiè athouô mvhô a ké lôk ngou’ 2020 *, éfôk nkap tè é ghô ajouô 28 millions de dollars *, ndôk nkuité épouô pi ndœuè-nou a ké shi’è anè pôp. Anè méndœuè-nou mèt mi é kè té ntôkô 200, mè ghô sang-a aghôô COVID-19, ésang mécyclone, ésang mé-inondation a Africa, ésang ndzi a lézang épouô a Vénézuela, ngheu éfœu’è aloo zi a ké pou mbat ntsia a Zimbabwe. Mè ké lôk nkap mèt nzoo étsoo léjheu, nzoo ntshi, mbôô ménguia mbing ntchoungté mi é ké ghô mbô é peuk, nzoo ménzhou, nzoo méfhou, nkuité méghôô, mbing nzeung nzoo atsitsi lélôk ngheu éji’ é laané. Pè nna’ njiô émô’ méfœu’.

 COVID-19. Aghôô jiô mèt a ké pfeung épô mémia pimpè té nzaané a nteu ngông ntseum. Nnô wô tshiè athouô mvhô é ké gheuô ngông ntseum, ntshi ménnô tè tôkô 800 a lélôk nkuité épouô pi ndœuè-nou a gheuè wôp. Ménnô mouô mèt é ké tsa’ métsoo mi é ké nông nzaka a mbou épô mémia, ntoo nguia a mbou Comité des coordinateurs, ndôk nkuitè wôp a lézhè pa’ pô ghô tsang-a afa’ lékuité épô mémia a nteu ngông ntseum poup.

 Ménnô lélôk nkuité épô mémia pi ndœuè-nou a gheuè wôp, é ké lôk ngou’ zi é ké tôk-é, nkuité épô mémia a léwè étsoo léjheu, ngwè ntshi, ngwuè tsitsi lélôk ngheu éji’ é laané, mbô méfhou. Pô ké zeung ngueô émô’ méji’, nkuité épô mémia a léwuè hipté yi a fhô a mbou ngômna.

 Épouô pi é té Ménjheuè-njiô Joovah, é ké jiô zôp pa’ mpè kuité épô mémia pimpè poup. Ta’ éfœu’ a wouô: Mmô’ commissaire de district yi mè tông-ô yi lè Field Simwinga, éyi a tissông Nakonde, a ala’ Zambie, a ké shoung épô mémia pimpè nguè: “A pou mpfeung nteu weuk tè’, a léjiô pa’ pè kuité épouô pi ndœuè-nou a gheuè wôp, anè kwa’ njheu mbông.”

 Ndzi lézang épouô a Angola. Aghôô COVID-19 a ké gheu tè étsoo léjheu é zaka a Angola, mbing nteu nkap tè’. Mela’poup tè a ké pou ntchi’è nteuè mbou épô mémia teue, a léwè étsoo léjheu.

 Nnô wô tshiè athouô mvhô é ké zètè mbou filiale Brésil nguè pô too étsoo léjheu a mbou épô mémia pi é Angola. Filiale wouô a lé tchhi-nèt ntsa’ étsoo léjheu tsi pô lé nông ngô too, mbô méshheu mi pô lè ngô lôk too, mbing nzoo étsoo léjheu té sapté, mbôkô létseungté nkap. Poup tè, apaa zi éwuè meung-mô lè a lé nông ngô wè, a lè 22 dollars, nzèt ajouô mékilo 20, mbing ngwè étsoo pa’ lèssi pô mékoo ngheu mévèt mi mè lôkô ndaa étsoo. Té ngueô ntshiè aya’a, pô too mépaa étsoo léjheu tè é ghô 33 544, a lôkô ngô 654 tonnes. Mè lé ku’né mépaa mouô mèt anè étsoo léjheu tsi épô mémia Angola pô méngnwèt é lé tchou’té, ndôk mbou nkuité épô mémia té ntôkô 50 000!

 Épô mémia pimpè é lé jou’ ngô lèkô éfœu’ zi mè lé kuitè wôp-é? Alexandre éyi a nang-a tè nguia sia a Angola, a lé leu nguè: “Joovah a kwa’ ngwuè gha a taa nteu yi, meung mbing té meung ngnwèt-è. Meung nteue-nzwing a mbou atchou’té Joovah!” Mariza éyi a kô’té wônkheu pi yi ngnwèt, a lé zeung ndeuè zi nguè: “Joovah a ké jiô ntshi neuk za. Meung-a pou siaknè yi tè’, nzeung siaknè atchou’té zi!”

 Éfœu’è aloo zi a ké pou mbat ntsia a Zimbabwe. A kè anè ngou’ 2020, aloo a pou mbat té ntsia a Zimbabwe, mbing ngheu tè ndzi é pou nzang épouô té ngô mémillion. Ménjheuè-njiô Joovah pi é zôp éwou té ntôk ntsa’ é lè té nông mpfèè azou mbông-ô.

 Nnô wô tshiè athouô mvhô é lé tshi ménnô mèntaa éwou a lélôk nkuité épô mémia. Épô mémia té ntôk nkhœu é lé kuité a léneung étsoo léjheu a nteu mépaa, ntoo nguia a mbou épô mémia mbing nzeung ngô mmô’ éfœu’, ndôk mémètoua môp ntsu’. * Ngou’ 2020 é lé ping ngué mmak mbô mè lôk médollar tè é ghô 691 561, ndôk nzoo étsoo léjheu mbing ngapté a mbou épô mémia té ntôkô 22 700!

 A lè anè émô’ méji’, mè ghé lôk étsoo léjheu éshi’é, mbô étsoo léjheu épô mémia é nda’ mbou mmak. Étsoo é lè mbing-è shi’è, épô mémia pimpè é pou siaknè Joovah, épimô’ é ping nzeung nzôp mézôp mékou’ a mbou yi.

 A lè amô’ aji’, émô’ épô mémia pimpè mémpia épi é mépfôk wôngwi, é gheuô amô’ atchou’té zi épouô ala’ é lé gheu, ndôk shoung-nè anè étsoo léjheu tsi mmô’ ntsi nnô’ éyi mè tông lè ONG, é lé nông ngô ya nguè mè ghapté. Pô lé koo éwou, mè pou ndôk politik nkouô wôp, tè pô té zeung mveung nguè nkuitè wôp-ô. Pô lé ping fhou éwou té nông ngueô, épouô pou ngwii wôp tè ndeu nguè, “Ndè’ pè gheu pa’a té shi’ nzètè weuk étsoo légheu!” Méngap mèmbia é lé ping ndè nguè tôk, épô mémia pimpè pou ndôk étsoo léjheu shi’, a ping nda’ nzeung nang, tè ONG mèt a lôk étsoo shi’ a nteu ala’!

 Lékuité épô mémia a Zimbabwe a lé zeung ntshouné épouô a lé yè mékou’ a mbou Joovah. Mpè pè éfœu’ Prisca, éyi a nang-a nteu mmô’ meung-è gha’ ala’ éwou. Tè mbô pa’ aloo a lé lôk ménguengue éshi’, Prisca a lé tshou yi té gheuô mbheu nkeu Lefô a wônèssidè pô fradè pa’ a ghôô gheu poup, tè mbô éfœu’è léji’ ngông. Épouô ala’ é lè ngwi yi, énông ndeu nguè : “Pheu nkeu mbông-ô, pè a atseung-è nguia jou shi’ kwheu ndzi.” Prisca a ping ntsô’ nguè: “Joovah a laa neung-è alé’é, ésakné méghang-afa’ pi.” Meung-è gha’ éfœu’ a lé ping ndè nguè tôk, atchou’té ngông swhi a too étsoo léjheu a ala’ mèt. A lé pou nkœu’né émô’ méghang nkô’ô mbaa pi kœu’né, tè pô leu a mbou Prisca nguè: “Mpeuk jiô léghè Ndem a laa neung-è ala’a ngwa’ wou, poup tè mpeuk si ntsaa weuk a lézhè Ndem mèt.” Té fhô éfœu’ mèt, épouô saambia anè méghang nkô’ô mbaa pi, é tsetsông-ô, énông nzu’tè métchou’té mimpè afœu’ zi é si ntôkô anè radio.

 Njheu é nông ku’nè gheuô mé mvhô, méndœuè-nou é zeung nku’né ngô assi. (Matthieu 24:​3, 7) Mpeukè si mbou siaknè ajoumi pè tsia anè méshheu mi mè ghiité a nteu donate.pr418.com, nguia ndôk ntôôtè afa’ Lefô. A yè éshheu a lélôk nkuité épô mémia pimpè anè kwa’ njheu mbông.