Sáàmù 41:1-13
Sí olùdarí. Orin Dáfídì.
41 Aláyọ̀ ni ẹni tó bá ń ro ti àwọn aláìní;+Jèhófà yóò gbà á sílẹ̀ ní ọjọ́ àjálù.
2 Jèhófà yóò dáàbò bò ó, yóò sì pa á mọ́.
A ó pè é ní aláyọ̀ ní ayé;+O kò sì ní jẹ́ kí èrò* àwọn ọ̀tá rẹ̀ ṣẹ lé e lórí.+
3 Jèhófà yóò fún un lókun lórí ibùsùn àìsàn rẹ̀;+Ìwọ yóò pààrọ̀ ibùsùn rẹ̀ nígbà tó ń ṣàìsàn.
4 Mo sọ pé: “Jèhófà, ṣojú rere sí mi.+
Wò mí* sàn,+ torí mo ti ṣẹ̀ sí ọ.”+
5 Àmọ́ àwọn ọ̀tá mi ń sọ ọ̀rọ̀ burúkú nípa mi pé:
“Ìgbà wo ló máa kú, tí orúkọ rẹ̀ á sì pa rẹ́?”
6 Tí ọ̀kan nínú wọn bá wá rí mi, irọ́ tó wà lọ́kàn rẹ̀ lá máa pa.
Ọ̀rọ̀ tó ń dunni lá máa kó jọ;Lẹ́yìn náà, á jáde lọ, á sì máa sọ ọ́ kiri.
7 Gbogbo àwọn tó kórìíra mi ń bára wọn sọ̀rọ̀ wúyẹ́wúyẹ́;Wọ́n ń gbèrò ibi sí mi pé:
8 “Ohun tó ń bani lẹ́rù ti dé bá a;Ní báyìí tó ti ṣubú lulẹ̀, kò ní dìde mọ́.”+
9 Kódà, ẹni tó wà ní àlàáfíà pẹ̀lú mi, tí mo fọkàn tán,+Ẹni tí a jọ ń jẹun, ti jìn mí lẹ́sẹ̀.*+
10 Àmọ́, Jèhófà, ṣojú rere sí mi, kí o sì gbé mi dìde,Kí n lè san án pa dà fún wọn.
11 Ohun tí màá fi mọ̀ pé inú rẹ dùn sí mi nìyí:
Kí àwọn ọ̀tá mi má lè kígbe ìṣẹ́gun lé mi lórí.+
12 Ní tèmi, o ti dì mí mú nítorí ìwà títọ́ mi;+Wàá fi mí sí iwájú rẹ títí láé.+
13 Ìyìn ni fún Jèhófà Ọlọ́run Ísírẹ́lì
Títí láé àti láéláé.*+
Àmín àti Àmín.
Àlàyé Ìsàlẹ̀ Ìwé
^ Tàbí “ìfẹ́ ọkàn.” Wo Àlàyé Ọ̀rọ̀.
^ Tàbí “ọkàn mi.”
^ Tàbí “yíjú pa dà sí mi.”
^ Tàbí “Láti ayérayé dé ayérayé.”
