Ìyọlẹ́gbẹ́ máa ń dáàbò bo ìjọ, ó tún jẹ́ ìbáwí fún ẹni tí kò ronú pìwà dà. (1Kọ 5:​6, 11) Tá a bá sì fara mọ́ ìbáwí yìí látọ̀dọ̀ Jèhófà, ṣe là ń fìfẹ́ hàn. Àmọ́ ṣé a gbà pé bẹ́ẹ̀ lọ̀rọ̀ rí lóòótọ́, torí kì í rọrùn tí wọ́n bá yọ èèyàn wa kan lẹ́gbẹ́. Ó máa ń fa ẹ̀dùn ọkàn fún gbogbo àwọn tọ́rọ̀ kàn, títí kan àwọn mọ̀lẹ́bí ẹni yẹn àtàwọn tó wà nínú ìgbìmọ̀ tó bójú tó ọ̀rọ̀ náà?

Ohun àkọ́kọ́ ni pé tá a bá fara mọ́ ìbáwí Jèhófà, ṣe là ń fi hàn pé a nífẹ̀ẹ́ rè, a sì bọ̀wọ̀ fún ìlànà rẹ̀ lórí ìwà mímọ́. (1Pe 1:​14-16) Ìyẹn á sì fi hàn pé a nífẹ̀ẹ́ ẹni tí wọ́n yọ lẹ́gbẹ́ náà. Ìbáwí kì í ṣe ohun ayọ̀, àmọ́ ó máa ń “so èso àlàáfíà ti òdodo.” (Heb 12:​5, 6, 11) Tá a bá ṣì ń ní nǹkan kan ṣe pẹ̀lú ẹni tí wọ́n ti yọ lẹ́gbẹ́ tàbí ẹni tó mú ara ẹ̀ kúrò lẹ́gbẹ́, a ò fi hàn pé a fara mọ́ ìbáwí Jèhófà. Ká má gbàgbé pé Jèhófà kì í bá àwa èèyàn rẹ̀ wí “kọjá ààlà.” (Jer 30:11) Tá a bá fara mọ́ ìbáwí Jèhófà, tá a sì gbájú mọ́ nǹkan tẹ̀mí, ìyẹn máa fi wá lọ́kàn balẹ̀ pé ẹni náà máa pa dà sọ́dọ̀ Jèhófà Baba wa aláàánú.​—Ais 1:​16-18; 55:7.

WO FÍDÍÒ NÁÀ JẸ́ ADÚRÓṢINṢIN BÓ O ṢE Ń FI ỌKÀN KAN SIN JÈHÓFÀ, KÓ O SÌ DÁHÙN ÀWỌN ÌBÉÈRÈ YÌÍ:

• Báwo ló ṣe máa ń rí lára àwọn òbí tí ọmọ wọn bá fi Jèhófà sílẹ̀?

• Báwo làwọn ará ìjọ ṣe lè ran àwọn tó wà nínú ìdílé náà lọ́wọ́?

• Àpẹẹrẹ wo la rí látinú Bíbélì tó jẹ́ ká mọ bó ṣe ṣe pàtàkì tó pé kí ìfẹ́ tá a ní sí Jèhófà pọ̀ ju ti àwọn mọ̀lẹ́bí wa lọ?

• Báwo la ṣe lè fi hàn pé Jèhófà la jẹ́ adúróṣinṣin sí dípò àwọn mọ̀lẹ́bí wa?