Bíi tàwọn ìpàdé tó kù, ẹ̀bùn látọ̀dọ̀ Jèhófà ni ìpàdé iṣẹ́ ìsìn pápá, torí ó máa ń fún wa níṣìírí láti ní ìfẹ́ àti láti ṣe àwọn iṣẹ́ rere. (Heb 10:24, 25) Kò yẹ kí ìpàdé iṣẹ́ ìsìn pápá ju ìṣẹ́jú márùn-ún sí méje lọ, àárín àkókò yìí ni wọ́n máa pín àwọn ará, tí wọ́n á sọ ibi tí wọ́n ti máa ṣiṣẹ́, tí wọ́n á sì gbàdúrà. (Kódà a lè má jẹ́ kó tó bẹ́ẹ̀ tó bá jẹ́ pé ẹ̀yìn típàdé parí la fẹ́ ṣe ìpàdé yìí.) Ó yẹ kẹ́ni tó fẹ́ darí ìpàdé náà sọ ohun tó máa ṣe àwọn ará láǹfààní lẹ́nu iṣẹ́ ìwàásù lọ́jọ́ yẹn. Bí àpẹẹrẹ, èyí tó pọ̀ jù lára àwọn tó máa ń wá sípàdé iṣẹ́ ìsìn pápá lọ́jọ́ Saturday ni ò kì í ráyè jáde láàárín ọ̀sẹ̀, torí náà á dáa kẹ́ni tó fẹ́ darí ìpàdé iṣẹ́ ìsìn pápá lọ́jọ́ yẹn jíròrò bá a ṣe lè gbọ́rọ̀ kalẹ̀ lẹ́nu iṣẹ́ ìwàásù. Àwọn nǹkan míì wo lẹni tó ń darí ìpàdé iṣẹ́ ìsìn pápá lè jíròrò?

• Ohun tá a lè bá àwọn èèyàn sọ látinú Ìwé Ìpàdé Ìgbésí Ayé àti Iṣẹ́ Òjíṣẹ́ Kristẹni

• Bá a ṣe lè fi ohun tá a gbọ́ nínú ìròyìn àtàwọn nǹkan tó ń ṣẹlẹ̀ láyìíká bẹ̀rẹ̀ ìjíròrò

• Ohun tá a lè sọ tẹ́nì kan bá sọ pé òun ò fẹ́ gbọ́rọ̀ wa

• Ohun tá a lè sọ tẹ́nì kan bá sọ pé òun ò gba Ọlọ́run gbọ́, tẹ́nì kan bá gbà pé kò sí Ọlọ́run, tẹ́nì kan bá ń sọ èdè míì tàbí tẹ́nì kan bá ń ṣe ẹ̀sìn tí ò fi bẹ́ẹ̀ wọ́pọ̀ ládùúgbò yín

• Bá a ṣe lè lo àwọn nǹkan tó wà lórí ìkànnì jw.org, JW Library^® tàbí Bíbélì

• Bá a ṣe lè lo àwọn ìtẹ̀jáde tó wà nínú Àpótí Ìkọ́nilẹ́kọ̀ọ́

• Bá a ṣe lè lo àwọn ọ̀nà míì láti wàásù, irú bíi ká fi tẹlifóònù wàásù, ká kọ lẹ́tà, ká wàásù níbi térò pọ̀ sí, ká ṣe ìpadàbẹ̀wò tàbí ìkẹ́kọ̀ọ́ Bíbélì

• Àwọn ìránnilétí nípa ọ̀rọ̀ ààbò, bá a ṣe lè yíwọ́ pa dà, bá a ṣe lè máa hùwà tó bójú mu lẹ́nu iṣẹ́ ìwàásù, bá a ṣe lè ní èrò tó dáa nípa àwọn tá à ń wàásù fún tàbí àwọn nǹkan míì tá ṣe àwọn ará láǹfààní

• Ẹ̀kọ́ tàbí fídíò látinú ìwé Tẹra Mọ́ Kíkàwé àti Kíkọ́ni

• Bá a ṣe lè ṣèrànwọ́ fún ẹni tá a jọ ń ṣiṣẹ́ lóde ẹ̀rí àti bá a ṣe lè fún un níṣìírí

• Ẹsẹ Bíbélì tá a lè lò lẹ́nu iṣẹ́ ìwàásù tàbí ìrírí kan tó máa fún àwọn ará níṣìírí