Tí ọmọdé kan bá sọ pé ká wọlé, ó yẹ ká bi í bóyá àwọn òbí ẹ̀ wà nílé. Èyí fi hàn pé a bọ̀wọ̀ fún wọn, a sì gbà pé wọ́n láṣẹ lórí àwọn ọmọ wọn. (Owe 6:20) A ò gbọ́dọ̀ wọlé táwọn òbí ọmọ náà kò bá sí nílé, kódà bí ọmọ náà bá sọ pé ká wọlé. Tí àwọn òbí ò bá sí nílé, ńṣe ni ká pa dà bẹ̀ wọ́n wò nígbà míì.

Tó bá jẹ́ pé ọmọ tó ti dàgbà díẹ̀ ni, bóyá tó wà láàárín ọdún mẹ́ẹ̀ẹ́dógún sí mọ́kàndínlógún, ó ṣì máa dáa ká béèrè àwọn òbí rẹ̀. Tí wọn ò bá sí nílé, a lè béèrè pé ṣé àwọn òbí rẹ̀ máa gbà kó ka ìwé tá a fẹ́ fún un? Tó bá dáhùn pé bẹ́ẹ̀ ni, a lè fún un ní ìwé, a sì tún lè ní kó lọ sórí ìkànnì jw.org.

Tí a bá fẹ́ ṣe ìpadàbẹ̀wò sọ́dọ̀ ọ̀dọ́ tó nífẹ̀ẹ́ sí ọ̀rọ̀ wa yìí, ó yẹ ká rí àwọn òbí rẹ̀. Èyí á jẹ́ ká lè ṣàlàyé ìdí tá a fi ń wá sọ́dọ̀ ọmọ wọn, a sì tún máa fi ìmọ̀ràn tí gbogbo ìdílé lè gbára lé hàn wọ́n látinú Bíbélì. (Sm 119:86, 138) Tá a bá ń bọ̀wọ̀ fún àwọn òbí, tá a sì ń kà wọ́n sí, èyí lè jẹ́ kí wọ́n rí i pé ọmọlúwàbí ni wá, ó sì tún lè jẹ́ ká láǹfààní láti wàásù ìhìn rere fún ìdílé náà.—1Pe 2:12.