Inú wa dùn gan-an pé a ti láwọn ìwé tuntun tá a lè máa fi darí ìkẹ́kọ̀ọ́ Bíbélì! Àdúrà wa ni pé kí Jèhófà bù kún wa bá a ṣe ń ṣe gbogbo ohun tá a lè ṣe láti sọ ọ̀pọ̀ èèyàn di ọmọ ẹ̀yìn. (Mt 28:18-20; 1Kọ 3:6-9) Báwo la ṣe máa lo àwọn ìwé tuntun yìí?

Ọ̀nà tuntun làá máa gbà fi ìwé Gbádùn Ayé Rẹ Títí Láé! darí ìkẹ́kọ̀ọ́ Bíbélì. Torí náà, tẹ̀ lé àwọn àbá tó wà nísàlẹ̀ yìí nígbà tó o bá ń múra ìkẹ́kọ̀ọ́ ẹnì kan sílẹ̀ tàbí tó o bá ń darí ìkẹ́kọ̀ọ́ náà. *

• Ẹ ka ìpínrọ̀ kọ̀ọ̀kan, kẹ́ ẹ sì jíròrò ìbéèrè tó wà níbẹ̀

• Ka àwọn ẹsẹ Bíbélì tí wọ́n kọ “ka” sí, kó o sì ran akẹ́kọ̀ọ́ rẹ lọ́wọ́ láti mọ bó ṣe lè fi í sílò

• Ẹ wo àwọn fídíò tó wà ní ẹ̀kọ́ kọ̀ọ̀kan, kẹ́ ẹ sì fi àwọn ìbéèrè tó wà níbẹ̀ jíròrò ohun tẹ́ ẹ kọ́ nínú fídíò náà

• Ẹ gbìyànjú láti parí ẹ̀kọ́ kan ní ìjókòó kan

Tó o bá wà lẹ́nu iṣẹ́ ìwàásù, ìwé Gbádùn Ayé Rẹ Títí Láé!—Ìbẹ̀rẹ̀ Ẹ̀kọ́ Bíbélì ni kó o kọ́kọ́ fún onílé kó o lè mọ̀ bóyá ó nífẹ̀ẹ́ sọ́rọ̀ rẹ. (Wo àpótí náà “ Bó O Ṣe Lè Fi Ìwé Gbádùn Ayé Rẹ Títí Láé!—Ìbẹ̀rẹ̀ Ẹ̀kọ́ Bíbélì Bẹ̀rẹ̀ Ìjíròrò.”) Tẹ́ ẹ bá parí ẹ̀, tó o sì rí i pé ó wu onílé láti máa bá ìkẹ́kọ̀ọ́ rẹ̀ lọ, fún un ní ìwé Gbádùn Ayé Rẹ Títí Láé!—Ìjíròrò Látinú Bíbélì kẹ́ ẹ sì bẹ̀rẹ̀ láti ẹ̀kọ́ 04. Tó o bá ń fi ọ̀kan lára àwọn ìtẹ̀jáde wa darí ìkẹ́kọ̀ọ́ Bíbélì ẹnì kan tẹ́lẹ̀, ìwé Gbádùn Ayé Rẹ Títí Láé!—Ìjíròrò Látinú Bíbélì ni kó o máa lò báyìí, kó o sì pinnu ibi tẹ́ ẹ ti máa bẹ̀rẹ̀.

Ẹ WO FÍDÍÒ NÁÀ OHUN TÓ O MÁA GBÁDÙN NÍNÚ Ẹ̀KỌ́ BÍBÉLÌ RẸ, KẸ́ Ẹ SÌ DÁHÙN ÀWỌN ÌBÉÈRÈ YÌÍ:

• Àwọn nǹkan wo ni akẹ́kọ̀ọ́ máa kọ́ nínú ìwé tuntun yìí?

• Kí nìdí tó fi yẹ kó o fi fídíò yìí han ẹni tó o fẹ́ kọ́ lẹ́kọ̀ọ́?

• Àwọn nǹkan wo lo lè rọ akẹ́kọ̀ọ́ rẹ láti máa ṣe bẹ́ ẹ ṣe ń bá ìkẹ́kọ̀ọ́ náà lọ?​—Wo “ Ohun Tí Ẹ̀kọ́ Kọ̀ọ̀kan Dá Lé Àti Ohun Tó Yẹ Kí Akẹ́kọ̀ọ́ Ṣe”