Bíbélì fi hàn pé kí ohun tí Ọlọ́run ní lọ́kàn lè ṣẹ, àwọn ìgbà kan wà táwọn áńgẹ́lì ti dáàbò bo àwọn tó ń jọ́sìn Ọlọ́run tọkàntọkàn. (Sáàmù 34:7) Ẹ jẹ́ ká wo àwọn àpẹẹrẹ díẹ̀.

• Nígbà tí Jèhófà fẹ́ pa ìlú Sódómù àti Gòmórà run, àwọn áńgẹ́lì ran Lọ́ọ̀tì àti ìdílé rẹ̀ lọ́wọ́ kí wọ́n lè sá jáde.​—Jẹ́nẹ́sísì 19:​1, 15-26.

• Ní ìlú Bábílónì ayé ìgbàanì, wọ́n dájọ́ ikú fún àwọn ọ̀dọ́kùnrin mẹ́ta tí wọ́n jẹ́ Hébérù pé kí wọ́n sun wọ́n nínú iná ìléru, àmọ́ Ọlọ́run ‘rán áńgẹ́lì rẹ̀, ó sì gba àwọn ìránṣẹ́ rẹ̀ sílẹ̀.’​—Dáníẹ́lì 3:​19-28.

• Lẹ́yìn tí Dáníẹ́lì ọkùnrin olóòótọ́ ti wà nínú ihò kìnnìún láti òru mọ́jú, ó ṣàlàyé pé ohun tó jẹ́ kí òun bọ́ ni pé “Ọlọ́run mi rán áńgẹ́lì rẹ̀, ó sì dí ẹnu àwọn kìnnìún náà.”​— Dáníẹ́lì 6:​16, 22.

Àwọn ìgbà kan wà tí àwọn áńgẹ́lì Ọlọ́run ran ìjọ Kristẹni ìgbàanì lọ́wọ́ lẹ́nu iṣẹ́ òjíṣẹ́ wọn nígbà tó pọn dandan bẹ́ẹ̀, kí ohun tí Jèhófà ní lọ́kàn lè ṣẹ. Ẹ jẹ́ ká wo àpẹẹrẹ díẹ̀.

• Áńgẹ́lì kan ṣílẹ̀kùn ẹ̀wọ̀n, ó sì sọ fún àwọn àpọ́sítélì tí wọ́n fi sẹ́wọ̀n pé kí wọ́n máa wàásù lọ nínú tẹ́ńpìlì.​—Ìṣe 5:​17-21.

• Áńgẹ́lì kan sọ fún Fílípì ajíhìnrere pé kó lọ sí ọ̀nà aginjù, ìyẹn ọ̀nà tí wọ́n ń gbà lọ sí ìlú Gásà láti ìlú Jerúsálẹ́mù, kó lè wàásù fún ará Etiópíà kan tó lọ jọ́sìn ní Jerúsálẹ́mù.​—Ìṣe 8:​26-33.

• Nígbà tó tásìkò lójú Ọlọ́run pé kí àwọn tí kì í ṣe Júù di Kristẹni, áńgẹ́lì kan fara han Kọ̀nílíù tó jẹ́ ọmọ ogun Róòmù nínú ìran, ó sì sọ fún un pé kó pe àpọ́sítélì Pétérù wá sí ilé rẹ̀.​—Ìṣe 10:​3-5.

• Nígbà tí wọ́n fi àpọ́sítélì Pétérù sẹ́wọ̀n, áńgẹ́lì kan yọ sí i, ó sì mú un jáde kúrò lẹ́wọ̀n.​—Ìṣe 12:​1-11.

Kò sí ẹ̀rí kankan tó fi hàn pé Ọlọ́run ṣì ń lo àwọn áńgẹ́lì láti ran àwa èèyàn lọ́wọ́ lọ́nà ìyanu báyìí, bó ṣe wà lákọsílẹ̀ nínú Bíbélì. Ṣùgbọ́n, Jésù sọ nípa àkókò wa yìí pé: “A ó sì wàásù ìhìn rere ìjọba yìí ní gbogbo ilẹ̀ ayé tí a ń gbé, láti ṣe ẹ̀rí fún gbogbo àwọn orílẹ̀-èdè; nígbà náà ni òpin yóò sì dé.” (Mátíù 24:14) Ṣé o mọ̀ pé àwọn áńgẹ́lì ń darí àwọn ọmọlẹ́yìn Kristi bí wọ́n ṣe ń ṣiṣẹ́ ìwàásù yìí?

Ìwé Ìṣípayá fi hàn pé àwọn áńgẹ́lì á máa fẹ̀sọ̀ ran àwọn èèyàn lọ́wọ́ kárí ayé kí wọ́n lè kẹ́kọ̀ọ́ nípa Jèhófà Ọlọ́run àti ohun tó ní lọ́kàn láti ṣe fún aráyé. Àpọ́sítélì Jòhánù sọ pé: “Mo sì rí áńgẹ́lì mìíràn tí ń fò ní agbedeméjì ọ̀run, ó sì ní ìhìn rere àìnípẹ̀kun láti polongo gẹ́gẹ́ bí làbárè amúniyọ̀ṣẹ̀ṣẹ̀ fún àwọn tí ń gbé lórí ilẹ̀ ayé, àti fún gbogbo orílẹ̀-èdè àti ẹ̀yà àti ahọ́n àti ènìyàn, ó ń sọ ní ohùn rara pé: ‘Ẹ bẹ̀rù Ọlọ́run, kí ẹ sì fi ògo fún un, nítorí wákàtí ìdájọ́ láti ọwọ́ rẹ̀ ti dé, nítorí náà, ẹ jọ́sìn Ẹni tí ó dá ọ̀run àti ilẹ̀ ayé àti òkun àti àwọn ìsun omi.’” (Ìṣípayá 14:​6, 7) Àwọn ìrírí tá à ń ní lásìkò yìí jẹ́ ẹ̀rí pé àwọn áńgẹ́lì ń tì wá lẹ́yìn lẹ́nu iṣẹ́ ìwàásù Ìjọba Ọlọ́run tí à ń ṣe kárí ayé. Ká sòótọ́, tí ẹlẹ́ṣẹ̀ kan bá ronú pìwà dà tó sì wá sọ́dọ̀ Jèhófà, ńṣe ni ‘ìdùnnú máa ń sọ láàárín àwọn áńgẹ́lì Ọlọ́run.’​—Lúùkù 15:10.

Kí ló máa ṣẹlẹ̀ nígbà tí iṣẹ́ ìwàásù bá dópin? Nígbà yẹn, àwọn áńgẹ́lì tí wọ́n jẹ́ “ẹgbẹ́ ọmọ ogun tí ń bẹ ní ọ̀run” máa jẹ́ alátìlẹyìn Jésù Kristi, tó jẹ́ Ọba àwọn ọba, láti ja “ogun ọjọ́ ńlá Ọlọ́run Olódùmarè,” ìyẹn ogun Amágẹ́dọ́nì. (Ìṣípayá 16:​14-16; 19:​14-16) Àwọn áńgẹ́lì alágbára máa mú ìdájọ́ Ọlọ́run ṣẹ, bí Jésù Olúwa ṣe ń “mú ẹ̀san wá sórí àwọn . . . tí kò ṣègbọràn sí ìhìn rere nípa Jésù Olúwa wa.”​—2 Tẹsalóníkà 1:​7, 8.

Torí náà, jẹ́ kó dá ẹ lójú pé ọ̀rọ̀ rẹ jẹ àwọn áńgẹ́lì lọ́kàn gan-an. Wọ́n ń ronú nípa ohun tó máa ṣe àwọn tó ń fẹ́ sin Ọlọ́run láǹfààní. Jèhófà sì ti lò wọ́n lọ́pọ̀ ìgbà láti fún àwọn ìránṣẹ́ rẹ̀ orí ilẹ̀ ayé lókun àti láti dáàbò bò wọ́n.​—Hébérù 1:14.

Ẹnì kọ̀ọ̀kan wa la ní ìpinnu pàtàkì kan láti ṣe. Ṣé a máa tẹ́tí sí ìhìn rere tá à ń polongo kárí ayé, ká sì ṣègbọràn sí i? Inú àwọn Ẹlẹ́rìí Jèhófà tó wà lágbègbè rẹ máa dùn láti ràn ẹ́ lọ́wọ́ kó o lè jàǹfààní nínú ìrànlọ́wọ́ onífẹ̀ẹ́ tí àwọn áńgẹ́lì alágbára ń ṣe fáwọn èèyàn.