Nínú ìwádìí kan tí wọ́n ṣe lọ́dún 2014, ìdá mẹ́ta nínú márùn-ún àwọn ọ̀dọ́ tọ́jọ́ orí wọn wà láàárín ọdún méjìdínlógún [18] sí mẹ́ẹ̀ẹ́dọ́gbọ̀n [25] gbà pé kí àwọn tí kò tíì ṣègbéyàwó máa bá ara wọn sùn “kì í ṣe nǹkan bàbàrà mọ́ nílẹ̀ Íńdíà.” Dókítà kan tó ń ṣiṣẹ́ ní ìpínlẹ̀ Mumbai sọ nínú ìwé ìròyìn Hindustan Times pé lójú òun, “ọ̀pọ̀ ọ̀dọ́ tó ń fẹ́ ara wọn sọ́nà kò ní in lọ́kàn rárá láti bá ara wọn ṣe ìgbéyàwó. Wọ́n kàn ń wá ẹni tí wọ́n á jọ máa gbé ara wọn sùn ni. Wọn ò gbà pé ó pọn dandan káwọn fẹ́ ara wọn níṣu-lọ́kà.”

OHUN TÓ YẸ KÓ O RONÚ LÉ: Àwọn wo ló sábà máa ń kó àrùn ìbálòpọ̀, tó sì máa ń ní ẹ̀dùn ọkàn torí ìbálòpọ̀, ṣé àwọn tó ti ṣègbéyàwó ni àbí àwọn tí kò ṣègbéyàwó tó kàn ń bá ara wọn sùn?—1 Kọ́ríńtì 6:18.

Téèyàn bá ń jiyàn lóòrèkóòrè pẹ̀lú àwọn mẹ́ńbà ìdílé rẹ̀, ó lè ṣàkóbá fún ìlera rẹ̀, ìyẹn sì lè fa ikú àìtọ́jọ́. Àwọn olùṣèwádìí ní yunifásítì Copenhagen fi ọdún mọ́kànlá ṣọ́ àwọn èèyàn tí o tó ẹgbẹ̀rún mẹ́wàá [10,000] tí ọjọ́ orí wọn wà láàárín ọdún márùndínlógójì [35] sí àádọ́ta [50] ọdún. Ìwádìí náà fi hàn pé àwọn tó sábà máa ń ṣawuyewuye pẹ̀lú àwọn tó sún mọ́ wọn ṣeé ṣe kó kú láìtọ́jọ́ ju àwọn tí kì í sábà ṣawuyewuye. Ẹni tó jẹ́ olùdarí ìwádìí náà wá sọ pé lára ohun tó lè mú kéèyàn pẹ́ láyé ni kéèyàn má ṣe gbé àníyàn sọ́kàn, kó sì máa ń ṣàkóso ara rẹ̀ tí awuyewuye bá ṣẹlẹ̀.

BÍBÉLÌ SỌ PÉ: “Ẹnikẹ́ni tí ó bá fawọ́ àwọn àsọjáde rẹ̀ sẹ́yìn kún fún ìmọ̀, ènìyàn tí ó ní ìfòyemọ̀ sì tutù ní ẹ̀mí.”—Òwe 17:27.

Wọ́n ṣe ìwádìí kan ní ìpínlẹ̀ Louisiana. Ìwádìí náà dá lórí àwọn ẹ̀ẹ́dẹ́gbẹ̀ta ó lé mẹ́rìnlélọ́gọ́ta [564] tọkọtaya tó ṣẹ̀ṣẹ̀ ṣègbéyàwó. Ìwádìí náà fi hàn pé tí àwọn tó ń fẹ́ ara wọn sọ́nà bá fi ara wọn sílẹ̀, tí wọ́n sì tún fẹ́ ara wọn pa dà, ó ṣeé ṣe kí wọ́n pínyà láàárín ọdún márùn-ún lẹ́yìn ìgbéyàwó wọn. Wọ́n tún lè máa bá ara wọn jà lọ́pọ̀ ìgbà, kí ìgbéyàwó wọn má sì tẹ́ wọn lọ́rùn.

OHUN TÍ BÍBÉLÌ SỌ: “Ohun tí Ọlọ́run ti so pọ̀ [nínú ìgbéyàwó], kí ènìyàn kankan má ṣe yà á sọ́tọ̀.”—Mátíù 19:6.