Ọjọ́ náà rèé bí àná, tó o gbé ọmọ rẹ jòjòló lọ́wọ́. Ọmọ náà sì ti ń dàgbà. Òótọ́ ni pé ó ṣì kéré, àmọ́ ní báyìí, ó ti fẹ́rẹ̀ẹ́ bàlágà.

Lásìkò tí ọmọ bá ń bàlágà, nǹkan máa ń tojú sú u, torí pé àsìkò yẹn ni ẹ̀yà ìbímọ rẹ̀ máa bẹ̀rẹ̀ sí í tóbi. Báwo lo ṣe lè ran ọmọ rẹ lọ́wọ́ nírú àsìkò yìí?

Àsìkò tí ọmọ máa ń bàlágà. Ọmọ lè bẹ̀rẹ̀ sí í bàlágà láti nǹkan bí ọmọ ọdún mẹ́jọ, àwọn ọmọ míì sì lè tó ọmọ ọdún mẹ́rìndínlógún [16] kí wọ́n tó bàlágà. Ìwé Letting Go With Love and Confidence sọ pé: “Àkókò tí àwọn ọmọ máa ń bàlágà máa ń yàtọ̀ síra.”

Ojú máa ń ti ọmọ tó ṣẹ̀ṣẹ̀ ń bàlágà. Àwọn ọmọ tó ṣẹ̀ṣẹ̀ ń bàlágà máa ń ronú lórí ojú tí àwọn èèyàn fi ń wò wọ́n. Ọ̀dọ́kùnrin kan tó ń jẹ́ Jared * sọ pé: “Mo máa ń kíyè sí ìrísí mi gan-an mo sì máa ń ṣọ́ra ṣe. Tí mo bá wà láàárín àwọn èèyàn, ó máa ń ṣe mí bíi pé ńṣe ni mo dá yàtọ̀ láàárín wọn.” Ìtìjú wọn tún máa ń pọ̀ sí i tí ifo tàbí irorẹ́ bá yọ sí wọn lójú. Kellie, ọmọ ọdún mẹ́tàdínlógún [17] sọ pé: “Ó ń ṣe mí bíi pé ojú mi ti fẹ́ bà jẹ́. Mo rántí pé mo máa ń sunkún, mo sì máa ń pe ara mi ní ọ̀bọ.”

Àwọn tó bá tètè bàlágà máa ń kan ìṣòro. Pàápàá àwọn ọmọbìnrin. Wọ́n lè máa fi wọ́n ṣe yẹ̀yẹ́ tí wọ́n bá ti bẹ̀rẹ̀ sí í gúnyàn. Ìwé kan tó ń jẹ́ A Parent’s Guide to the Teen Years sọ pé: “Èyí lè mú kí wọ́n wà nínú ewu torí pé ojú àwọn ọkùnrin oníṣekúṣe lè bẹ̀rẹ̀ sí í wà lára wọn.”

Ti pé ọmọ bàlágà kò túmọ̀ sí pé ó ti gbọ́n. Òwe 22:15 sọ pé: “Ọkàn-àyà ọmọdékùnrin ni ìwà òmùgọ̀ dì sí.” Ti pé ọmọ kan bàlágà kò túmọ̀ sí pé ó ti gbọ́n. Ìwé You and Your Adolescent sọ pé, ìrísí ọmọ kan lè jọ ti ẹni tó ti dàgbà, àmọ́ “ìyẹn ò túmọ̀ sí pé ó máa lè ṣe ìpinnu tó mọ́gbọ́n dání tàbí kó hùwà ọgbọ́n. Bákan náà, ìyẹn ò sọ pé ó máa lè kó ara rẹ̀ ní ìjánu tàbí kó hùwà àgbà láwọn ọ̀nà míì.”

Kí ọmọ rẹ tó bàlágà ni kó o ti ṣàlàyé fún un. Jẹ́ kí ọmọ rẹ mọ àwọn àmì tó máa rí tó bá ti ń bàlágà. Sọ nípa àwọn àyípadà tó máa ń wáyé lójijì tó sì lè mú kí nǹkan tojú sú u. Bí àpẹẹrẹ, sọ fún ọmọbìnrin rẹ nípa ṣíṣe nǹkan oṣù, kó o sì sọ fún ọmọkùnrin rẹ pé lẹ́ẹ̀kọ̀ọ̀kan á máa da àtọ̀ tó bá sùn. Èyí yàtọ̀ sí àwọn àyípadà míì tó máa ń ṣẹlẹ̀ díẹ̀díẹ̀. Tó o bá ń sọ̀rọ̀ nípa àwọn ìyípadà yìí, má ṣe sọ ọ́ bíi pé nǹkan burúkú ló ń ṣẹlẹ̀ sí i. Kàkà bẹ́ẹ̀, ńṣe ni kó o jẹ́ kó mọ̀ pé àwọn ìyípadà yẹn máa jẹ́ kó kúrò lọ́mọdé.—Ìlànà Bíbélì: Sáàmù 139:14.

Má ṣe pẹ́ ọ̀rọ̀ sọ. Ọ̀dọ́kùnrin kan tó ń jẹ́ John sọ pé: “Ńṣe làwọn òbí mi ń pẹ́ ọ̀rọ̀ sọ nígbà tí wọ́n ń ṣàlàyé àwọn ìyípadà náà fún mi. Ì bá dáa ká ní wọ́n sojú abẹ níkòó.” Irú èrò yìí ni ọ̀dọ́bìnrin ẹni ọdún mẹ́tàdínlógún [17] tórúkọ rẹ ń jẹ́ Alana náà ní. Ó sọ pé: “Màmá mi ṣàlàyé àwọn àyípadà tó dé bá ara mi, àmọ́ ì bá dáa ká ní wọ́n tún ṣàlàyé bí mo ṣe lè kojú àwọn àyípadà náà.” Kí ni èyí kọ́ wa? Bó tilẹ̀ jẹ́ pé ọ̀rọ̀ náà kì í rọrùn láti sọ, ohun tó dáa jù ni pé kó o ṣàlàyé gbogbo ohun tó jẹ mọ́ bíbàlágà fún ọmọ rẹ.—Ìlànà Bíbélì: Ìṣe 20:20.

Béèrè ìbéèrè tó máa jẹ́ kí ọmọ rẹ sọ tọkàn rẹ̀. Kí ọmọ rẹ lè sọ tinú ẹ̀, o lè sọ ohun tójú àwọn míì rí nígbà tí wọ́n ń bàlágà. Bí àpẹẹrẹ, o lè bi ọmọbìnrin rẹ pé, “Ṣé ẹnikẹ́ni ní kíláàsì rẹ ti ń sọ̀rọ̀ nípa ṣíṣe nǹkan oṣù?” “Ṣé wọ́n máa ń fi ọmọbìnrin tó bá tètè bàlágà ṣe yẹ̀yẹ́?” O lè bi ọmọkùnrin rẹ pé, “Ṣé wọ́n máa ń fi àwọn tí kò bá tètè bàlágà ṣe yẹ̀yẹ́?” Táwọn ọmọ bá ń sọ ohun tójú àwọn míì ń rí nígbà tí wọ́n bàlágà, ó máa rọrùn fún wọn láti sọ bí àwọn àyípadà náà ṣe rí lára wọn àti ohun tójú wọn ń rí. Nígbà tí wọ́n bá ń sọ tinú wọn, tẹ̀ lé ìmọ̀ràn Bíbélì tó sọ pé: “Yára nípa ọ̀rọ̀ gbígbọ́, lọ́ra nípa ọ̀rọ̀ sísọ.”—Jákọ́bù 1:19.

Ran ọmọ rẹ lọ́wọ́ kó lè ní “ọgbọ́n tí ó gbéṣẹ́ àti agbára láti ronú.” (Òwe 3:21) Kì í ṣe àwọn àyípadà ara nìkan ló ń fi hàn pé ọmọ kan ń bàlágà. Àsìkò yìí làwọn ọmọ máa ń kọ́ ọgbọ́n tó máa jẹ́ kí wọ́n lè máa ṣe ìpinnu tó mọ́gbọ́n dání tí wọ́n bá dàgbà. Lo àsìkò yìí láti kọ́ ọmọ rẹ ní ìwà rere.—Ìlànà Bíbélì: Hébérù 5:14.

Má ṣe jẹ́ kó sú ẹ. Ọ̀pọ̀ àwọn ọmọ kì í fẹ́ sọ fáwọn òbí wọn nípa àwọn ìyípadà tó ń ṣẹlẹ̀ sí wọn bí wọ́n ṣe ń bàlágà, àmọ́ má ṣe jẹ́ kí èyí mú ẹ rẹ̀wẹ̀sì. Ìwé kan tó ń jẹ́ You and Your Adolescent sọ pé: “Àwọn ọmọ tó máa ń tijú tàbí tí kì í fẹ́ sọ̀rọ̀ lè máa há gbogbo ohun tí ò ń sọ sórí.”