ÀWỌN Ọ̀DỌ́
9: Ẹni Tó O Jẹ́
OHUN TÓ TÚMỌ̀ SÍ
Kì í ṣe orúkọ rẹ tàbí ìrísí rẹ la fi máa mọ irú ẹni tó o jẹ́. Ìwà tó ò ń hù, ohun tó o gbà gbọ́ àti bó o ṣe ń ronú ló máa sọ irú ẹni tó o jẹ́ gan-an.
ÌDÍ TÓ FI ṢE PÀTÀKÌ
Tó o bá mọ irú ẹni tó o jẹ́ ní ti gidi, wàá dúró lórí ohun tó o gbà gbọ́, àwọn ọ̀rẹ́ rẹ ò sì ní máa darí rẹ síbi tó wù wọ́n.
“Ọ̀pọ̀ èèyàn lónìí ló dà bíi bèbí tí wọ́n fi ń polówó aṣọ. Àwọn ẹlòmíì ló máa ń yan aṣọ tí wọ́n máa wọ̀.”—Adrian.
“Mo ti kọ́ bí mo ṣe lè máa ṣe ohun tó tọ́ kódà nígbà tí kò bá rọrùn láti ṣe. Mo mọ àwọn ọ̀rẹ́ tòótọ́ tí mo ní, bí wọ́n ṣe ń hùwà sí mi ló jẹ́ kí n mọ̀, ó sì ní bí èmi náà ṣe ń ṣe tí mo bá wà pẹ̀lú wọn.”—Courtney.
ÌLÀNÀ BÍBÉLÌ: ‘Ẹ jáwọ́ nínú dídáṣà ní àfarawé ètò àwọn nǹkan yìí, ṣùgbọ́n ẹ para dà nípa yíyí èrò inú yín padà.’—Róòmù 12:2.
OHUN TÓ O LÈ ṢE
Ìsinsìnyí ló yẹ kó o mọ irú ẹni tó o jẹ́ àti irú ẹni tó o fẹ́ dà. Bó o ṣe lè ṣe bẹ́ẹ̀ ni pé kó o mọ àwọn ibi tó o dáa sí, àwọn ibi tó ti yẹ kó o ṣàtúnṣe àti ohun tó jẹ́ kí ohun tó o gbà gbọ́ dá ẹ lójú. Tó o bá fẹ́ ṣe bẹ́ẹ̀, kọ́kọ́ dáhùn àwọn ìbéèrè yìí.
Ibi tó o dára sí: Àwọn nǹkan wo ni mo mọ̀ ọ́ń ṣe? Kí làwọn èèyàn mọ̀ nípa mi? (Bí àpẹẹrẹ: Ṣe mo máa ń fi nǹkan falẹ̀? Ṣé mo máa ń kó ara mi ní ìjánu? Ṣe mo máa ń ṣiṣẹ́ kára? Ṣé mo lawọ́?) Àwọn nǹkan dáadáa wo ni mo máa ń ṣe?
ÀBÁ: Tó bá ṣòro fún ẹ láti mọ àwọn nǹkan dáadáa tó o máa ń ṣe, ohun tó o lè ṣe rèé. Lọ bá àwọn òbí rẹ tàbí ọ̀rẹ́ rẹ tó o fọkàn tán, ní kí wọ́n sọ àwọn ibi tó o dára sí àti ìdí tí wọ́n fi sọ bẹ́ẹ̀.
ÌLÀNÀ BÍBÉLÌ: “Kí olúkúlùkù máa wádìí ohun tí iṣẹ́ tirẹ̀ jẹ́, nígbà náà ni yóò ní ìdí fún ayọ̀ ńláǹlà ní ti ara rẹ̀ nìkan, kì í sì í ṣe ní ìfiwéra pẹ̀lú ẹlòmíràn.” —Gálátíà 6:4.
Àwọn ibi tó o kù sí: Kí ló yẹ kí ń ṣàtúnṣe sí nínú ìwà mi? Àwọn ìgbà wo ló máa ń ṣe mí bíi pé kí n ṣe nǹkan tí kò dára? Àwọn apá ibo ló yẹ kí n ti túbọ̀ máa kó ara mi ní ìjánu?
ÌLÀNÀ BÍBÉLÌ: “Bí a bá sọ gbólóhùn náà pé: ‘Àwa kò ní ẹ̀ṣẹ̀ kankan,’ a ń ṣi ara wa lọ́nà ni.”—1 Jòhánù 1:8.
Ohun tó o gbà gbọ́: Àwọn ìlànà wo ni mò ń tẹ̀ lé, kí sì nìdí? Ṣé mo gbà pé Ọlọ́run wà? Àwọn ẹ̀rí wo ni mo rí ti mo fi gbà pé Ọlọ́run wà? Àwọn nǹkan wo ni mò ń rí tí mo kà sí ìwà ìrẹ́jẹ, kí sì nìdí? Àwọn nǹkan wo ni mo gbà pé ó máa ṣẹlẹ̀ lọ́jọ́ iwájú?
ÌLÀNÀ BÍBÉLÌ: “Agbára láti ronú yóò máa ṣọ́ ọ, ìfòyemọ̀ yóò máa fi ìṣọ́ ṣọ́ ọ.”—Òwe 2:11.
O Tún Lè Wo
ÌDÁHÙN ÀWỌN ÌBÉÈRÈ 10 TÁWỌN Ọ̀DỌ́ Ń BÉÈRÈ
Irú Èèyàn Wo Gan-an Ni Mo Jẹ́?
Tó o bá mọ àwọn ìwà tó dáa tó yẹ kó o máa hù, tó o mọ ibi tó o dáa sí, ibi tó o kù sí, tó o sì ní àfojúsùn, ó máa ràn ẹ́ lọ́wọ́ kó o lè ṣe ohun tó tọ́ táwọn èèyàn bá tiẹ̀ fẹ́ kó o ṣe ohun tí ò dáa.
ÀWỌN Ọ̀DỌ́ BÉÈRÈ PÉ
Báwo Ni Mo Ṣe Lè Rẹ́ni Tó Dáa Fi Ṣe Àwòkọ́ṣe?
Tó o bá rí ẹni tó dáa tó o lè tẹ̀lé àpẹẹrẹ rẹ̀, ìyẹn máa ràn ẹ́ lọ́wọ́ láti yẹra fún ìṣòro, ọwọ́ rẹ máa tẹ àwọn àfojúsùn rẹ, wà á sì ṣe àṣeyọrí. Àmọ́ àpẹẹrẹ tani kó o tẹ̀lé?
