Ẹwà Inú Lọ́hùn-ún Kì í Ṣá
Ẹwà Inú Lọ́hùn-ún Kì í Ṣá
KRISTẸNI ÀGBÀLAGBÀ KAN TÓ JẸ́ OLÙṢÒTÍTỌ́ SỌ PÉ: “Ọ̀DỌ́MỌKÙNRIN KAN PE ẸWÀ ÀTI ÌWÀ RERE NÍ NǸKAN KAN NÁÀ.”
Bó ti máa ń rí nìyẹn, ó pẹ́ téèyàn tí máa ń pọ́n ẹwà lé lápọ̀n-ọ́n jù, ọ̀pọ̀ ìgbà sì ni èyí máa ń mú kéèyàn ní èrò tí kò tọ́ nípa àwọn ànímọ́ ti inú lọ́hùn-ún. Àmọ́ o, láìka bó ti wù ká rí lóde ara sí, ohun tí a jẹ́ nínú lọ́hùn-ún ni Ẹlẹ́dàá wa ń wò. Nípa báyìí, ó fi àpẹẹrẹ tó dára jù lọ lélẹ̀ nínú ṣíṣe ìpinnu tó mọ́yán lórí. Níbàámu pẹ̀lú ohun tó wà nínú Bíbélì, Ọlọ́run fúnra rẹ̀ sọ níbẹ̀ pé: “Nítorí kì í ṣe ọ̀nà tí ènìyàn gbà ń wo nǹkan ni Ọlọ́run gbà ń wo nǹkan, nítorí pé ènìyàn lásán-làsàn ń wo ohun tí ó fara hàn sí ojú; ṣùgbọ́n ní ti Jèhófà, ó ń wo ohun tí ọkàn-àyà jẹ́.”—1 Sámúẹ́lì 16:7.
Ọlọ́run ni Orísun ẹwà tòótọ́ tí ẹ̀dá ènìyàn ní, Ọ̀rọ̀ rẹ̀ sì ṣí i payá fún wa pé, àwọn ànímọ́ tẹ̀mí ló ṣe pàtàkì jù lọ báa bá fẹ́ mọ irú ẹni téèyàn kan jẹ́ ní ti gidi. Bíbélì sọ pé: “Òòfà ẹwà lè jẹ́ èké, ẹwà ojú sì lè jẹ́ asán; ṣùgbọ́n obìnrin tí ó bẹ̀rù Jèhófà ni ẹni tí ó gba ìyìn fún ara rẹ̀.” (Òwe 31:30) Ká sòótọ́, ẹwà ara tó fa èèyàn mọ́ra lè ṣíji bo àbùkù ti inú lọ́hùn-ún. (Ẹ́sítérì 1:10-12; Òwe 11:22) Bó tilẹ̀ jẹ́ pé ẹwà òde ara lè ṣá bí ọjọ́ ti ń gorí ọjọ́, ẹwà tinú lọ́hùn-ún—ìyẹn àwọn ànímọ́ ti ọkàn àyà—lè dàgbà tí kò sì ní ṣá.
Ẹ ò ri pé ó bọ́gbọ́n mu nígbà náà pé ká ní àwọn ànímọ́ bí ìfẹ́, ìdùnnú, àlàáfíà, ìpamọ́ra, inú rere, ìwà rere, ìgbàgbọ́, ìwà tútù, àti ìkóra-ẹni-níjàánu! (Gálátíà 5:22, 23) Á wá ṣeé ṣe fún wa láti ní ẹwà ti inú lọ́hùn-ún, èyí tí ìníyelórí rẹ̀ kì í ṣá.—1 Pétérù 3:3, 4.