Ọ̀rọ̀ Ọlọ́run ló wà nínú Bíbélì. Ńṣe ló dà bíi lẹ́tà tí bàbá onífẹ̀ẹ́ kan kọ sí àwọn ọmọ rẹ̀. (2 Tímótì 3:16) Nínú Bíbélì, Ọlọ́run ṣàlàyé bí a ṣe lè ṣe ìfẹ́ rẹ̀ àti ìdí tó fi fàyè gba ìwà ibi àti ohun tó máa ṣe fún aráyé lọ́jọ́ iwájú. Ṣùgbọ́n, àwọn tó ń kọ́ni lẹ́kọ̀ọ́ ìsìn ti lọ́ àwọn ẹ̀kọ́ Bíbélì lọ́rùn, èyí sì ti mú kí ọ̀pọ̀ rò pé àwọn kò lè lóye àwọn ẹ̀kọ́ Bíbélì láéláé.—Ìṣe 20:29, 30.

Jèhófà Ọlọ́run fẹ́ ká mọ ẹni tí òun jẹ́ gan-an. Ìdí nìyẹn tó fi fún wa ní ìwé kan tó rọrùn láti lóye.—Ka 1 Tímótì 2:3, 4.

Yàtọ̀ sí pé Jèhófà fún wa ní Bíbélì, ó tún ṣe ọ̀nà bí a ṣe máa lóye rẹ̀. Ó rán Jésù pé kó wá kọ́ wa. (Lúùkù 4:16-21) Bí Jésù ṣe máa ń ṣàlàyé Bíbélì lẹ́sẹẹsẹ mú kí àwọn tó n gbọ́ ọ̀rọ̀ rẹ̀ lóye Bíbélì dáadáa.—Ka Lúùkù 24:27, 32, 45.

Jésù dá ìjọ Kristẹni sílẹ̀, kí wọ́n lè máa bá iṣẹ́ tó bẹ̀rẹ̀ nìṣó. (Mátíù 28:19, 20) Lónìí, àwọn ojúlówó ọmọlẹ́yìn Jésù ń ran àwọn èèyàn lọ́wọ́ kí wọ́n lè lóye ohun tí Bíbélì fi kọ́ni nípa Ọlọ́run. Tí o bá fẹ́ lóye ohun tí Bíbélì sọ, inú àwa Ẹlẹ́rìí Jèhófà máa dùn láti ràn ẹ́ lọ́wọ́.—Ka Ìṣe 8:30, 31.