Àpẹẹrẹ inú Bíbélì:

• Mt 16:13-17—Àpọ́sítélì Pétérù mọ̀ pé Ọmọ Ọlọ́run ni Jésù àti pé òun ni Kristi tí Ọlọ́run ṣèlérí

• Mt 17:1-9—Mẹ́ta lára àwọn àpọ́sítélì Jésù rí Jésù nígbà tí Jèhófà yí i pa dà di ológo, wọ́n sì tún gbọ́ tí Jèhófà pè é ní Ọmọ Òun

Àpẹẹrẹ inú Bíbélì:

• Mt 21:1-9—Jésù gun kẹ́tẹ́kẹ́tẹ́ wọ Jerúsálẹ́mù, ìyẹn sì mú kí àsọtẹ́lẹ̀ nípa Mèsáyà Ọba tí Ọlọ́run ṣèlérí ṣẹ

• Heb 7:26-28—Àpọ́sítélì Pọ́ọ̀lù ṣàlàyé bí ipò Jésù gẹ́gẹ́ bí Àlùfáà Àgbà tó ga jù lọ ṣe mú kó yàtọ̀ sí gbogbo àwọn àlùfáà tó kù

Àpẹẹrẹ inú Bíbélì:

• Mt 4:23, 24—Jésù ṣe ohun tó fi hàn pé òun lágbára ju àwọn ẹ̀mí èṣù lọ àti pé kò sí irú àìsàn tóun ò lè wò sàn

• Mt 14:15-21—Lọ́nà ìyanu, Jésù fi búrẹ́dì márùn-ún àti ẹja méjì bọ́ ẹgbẹẹgbẹ̀rún àwọn èèyàn tébi ń pa

• Mt 17:24-27—Jésù ṣe iṣẹ́ ìyanu kan kó lè rí owó táá fi ṣètìlẹyìn fún ìjọsìn Jèhófà, kó má bàa mú àwọn èèyàn kọsẹ̀

• Mk 1:40, 41—Nígbà tí Jésù rí adẹ́tẹ̀ kan, àánú ẹ̀ ṣe é torí náà ó wo adẹ́tẹ̀ náà sàn. Èyí jẹ́ ká rí i pé ó wu Jésù láti wo àwọn aláìsàn sàn

• Mk 4:36-41—Jésù mú kí ìjì líle kan rọlẹ̀, èyí sì fi hàn pé Bàbá rẹ̀ tí fún un láṣẹ lórí ìjì àtàwọn nǹkan míì tó lè fa àjálù

• Jo 11:11-15, 31-45—Jésù sunkún nígbà tí Lásárù ọ̀rẹ́ rẹ̀ kú. Lẹ́yìn ìyẹn, ó jí Lásárù dìde, èyí sì fi hàn pé ó kórìíra ikú àti ìbànújẹ́ tó máa ń fà fáwọn téèyàn wọn kú

Àpẹẹrẹ inú Bíbélì:

• Sm 45:2-7, 16, 17—Sáàmù yìí jẹ́ ká rí i pé Ọlọ́run ti yan Ọba kan tó máa ṣẹ́gun àwọn ọ̀tá, tó sì máa ṣàkóso pẹ̀lú òtítọ́, ìrẹ̀lẹ̀ àti òdodo

• Ais 11:1-10—Nígbà tí Jésù bá ń ṣàkóso ayé, ó máa sọ ayé di Párádísè, àlàáfíà sì máa wà níbi gbogbo