Ó máa ń wu àwọn tó ṣẹ̀ṣẹ̀ ṣègbéyàwó pé kí ayọ̀ tí wọ́n ní lọ́jọ́ ìgbéyàwó wọn bá wọn kalẹ́. Ó sì lè rí bẹ́ẹ̀. Àwọn tọkọtaya Kristẹni tí wọ́n ti ṣègbéyàwó fún ọ̀pọ̀ ọdún, tí wọ́n sì ń gbìyànjú láti máa tẹ̀ lé ohun tí Bíbélì sọ mọ̀ pé ó lè rí bẹ́ẹ̀ lóòótọ́.

1. Ìmọ̀ràn wo ni Bíbélì fún àwọn ọkọ?

Jèhófà ti fi ọkùnrin ṣe olórí ìdílé. (Ka Éfésù 5:23.) Ó sì retí pé kí ọkùnrin máa ṣe àwọn ìpinnu táá ṣe ìdílé ẹ̀ láǹfààní. Bíbélì sọ fáwọn ọkọ pé: “Ẹ máa nífẹ̀ẹ́ àwọn aya yín.” (Éfésù 5:25) Kí nìyẹn túmọ̀ sí? Ọkọ tó bá nífẹ̀ẹ́ ìyàwó ẹ̀ á máa ṣìkẹ́ ẹ̀ nígbà tí wọ́n bá wà nínú ilé àti nígbà tí wọ́n bá wà pẹ̀lú àwọn míì. Á máa dáàbò bo ìyàwó ẹ̀, á máa múnú ẹ̀ dùn, á sì máa pèsè ohun tó nílò. (1 Tímótì 5:8) Ohun tó ṣe pàtàkì jù ni pé kó ran ìyàwó ẹ̀ lọ́wọ́ láti túbọ̀ sún mọ́ Jèhófà. (Mátíù 4:4) Bí àpẹẹrẹ, á máa gbàdúrà pẹ̀lú ìyàwó ẹ̀, wọ́n á sì jọ máa ka Bíbélì pa pọ̀. Tí ọkọ kan bá ń ṣìkẹ́ ìyàwó ẹ̀, tó sì nífẹ̀ẹ́ rẹ̀, inú Jèhófà á dùn sí i.​—Ka 1 Pétérù 3:7.

2. Ìmọ̀ràn wo ni Bíbélì fún àwọn aya?

Bíbélì sọ pé kí aya “ní ọ̀wọ̀ tó jinlẹ̀ fún ọkọ rẹ̀.” (Éfésù 5:33) Báwo ló ṣe lè ṣe bẹ́ẹ̀? Ó lè ṣe bẹ́ẹ̀ tó bá ń ronú nípa àwọn ìwà dáadáa tí ọkọ ẹ̀ ní àti gbogbo ohun tí ọkọ ẹ̀ ń ṣe kó lè máa bójú tó òun àtàwọn ọmọ wọn. Ó tún máa fi hàn pé òun bọ̀wọ̀ fún ọkọ òun tó bá ń gbìyànjú láti kọ́wọ́ ti àwọn ìpinnu tí ọkọ ẹ̀ ń ṣe, tó ń fi ohùn jẹ́jẹ́ bá ọkọ ẹ̀ sọ̀rọ̀, tó sì ń sọ ohun tó dáa nípa ẹ̀, kódà tí ọkọ náà ò bá tiẹ̀ sin Jèhófà.

3. Báwo ni tọkọtaya ṣe lè mú kí ìfẹ́ àárín wọn jinlẹ̀ sí i?

Ohun tí Bíbélì sọ nípa àwọn tó ṣègbéyàwó ni pé: “Àwọn méjèèjì á sì di ara kan.” (Mátíù 19:5) Èyí túmọ̀ sí pé wọn ò gbọ́dọ̀ gbà kí ohunkóhun mú kí ìfẹ́ tó wà láàárín wọn tutù. Ìyẹn máa ṣeé ṣe tí wọ́n bá ń wáyè láti wà pa pọ̀ déédéé, tí wọ́n ń sọ bí nǹkan ṣe rí lára wọn, tí wọ́n ń fi ohùn jẹ́jẹ́ bára wọn sọ̀rọ̀, tí wọn ò sì fi nǹkan kan pa mọ́ fúnra wọn. Wọn ò ní jẹ́ kí ohunkóhun tàbí ẹnikẹ́ni ṣe pàtàkì sí wọn ju ẹnì kejì wọn lọ, wọ́n sì máa fi ìjọsìn Jèhófà sípò àkọ́kọ́. Bákan náà, wọn ò ní máa lo àkókò tó pọ̀ jù pẹ̀lú ẹni tí kì í ṣe ọkọ tàbí aya wọn.

 KẸ́KỌ̀Ọ́ JINLẸ̀

4. Ó yẹ káwọn ọkọ máa nífẹ̀ẹ́ ìyàwó wọn, kí wọ́n sì máa ṣìkẹ́ wọn

5. Ó yẹ káwọn aya nífẹ̀ẹ́ ọkọ wọn, kí wọ́n sì máa bọ̀wọ̀ fún wọn

Bíbélì sọ pé ó yẹ kí àwọn aya máa bọ̀wọ̀ fún ọkọ wọn, kódà tí ọkọ náà ò bá tiẹ̀ sin Jèhófà. Ka 1 Pétérù 3:1, 2, lẹ́yìn náà kó o dáhùn àwọn ìbéèrè yìí:

• Tí ọkọ ẹ kò bá sin Jèhófà, ó dájú pé wàá fẹ́ kó bẹ̀rẹ̀ sí í sin Jèhófà. Kí lo rò pé ó máa dáa jù pé kó o ṣe? Ṣé kó o máa wàásù fún un ní gbogbo ìgbà ni, àbí kó o máa hùwà tó dáa, kó o sì máa bọ̀wọ̀ fún un? Kí nìdí tó o fi sọ bẹ́ẹ̀?

Tí tọkọtaya bá fọwọ́ sowọ́ pọ̀, wọ́n máa lè ṣèpinnu tó dáa. Àmọ́ nígbà míì, ìyàwó lè má fara mọ́  ìpinnu tọ́kọ ẹ̀ ṣe. Ó lè sọ èrò ẹ̀ lórí ọ̀rọ̀ náà lọ́nà tó máa fi hàn pé ó bọ̀wọ̀ fún ọkọ ẹ̀, àmọ́ ó gbọ́dọ̀ fi sọ́kàn pé ọkọ òun ni Jèhófà retí pé kó máa pinnu ohun tó máa ṣe ìdílé wọn láǹfààní. Torí náà, ó yẹ kí ìyàwó máa kọ́wọ́ ti ìpinnu tí ọkọ ẹ̀ bá ṣe. Tó bá ń ṣe bẹ́ẹ̀, ìdílé wọn á láyọ̀. Ka 1 Pétérù 3:3-5, lẹ́yìn náà kó o dáhùn ìbéèrè yìí:

• Báwo ló ṣe máa ń rí lára Jèhófà tí aya kan bá ń bọ̀wọ̀ fún ọkọ rẹ̀?

6. O lè borí ìṣòro nínú ìdílé rẹ

 KÓKÓ PÀTÀKÌ

Tọkọtaya máa láyọ̀ tí wọ́n bá nífẹ̀ẹ́ ara wọn, tí wọ́n ń bọ̀wọ̀ fúnra wọn, tí wọ́n sì ń fi ìlànà Bíbélì sílò.

Kí lo rí kọ́?

• Àwọn nǹkan wo ni ọkọ kan lè ṣe kí ìdílé ẹ̀ lè láyọ̀?

• Àwọn nǹkan wo ni aya kan lè ṣe kí ìdílé ẹ̀ lè láyọ̀?

• Tó o bá ti ní ọkọ tàbí aya, àwọn ìlànà Bíbélì wo ló lè ràn yín lọ́wọ́ kí ìdílé yín lè túbọ̀ láyọ̀?