LẸ́YÌN tí Jèróbóámù Ọba kú, gbogbo ọba yòókù tó jẹ lórí ẹ̀yà mẹ́wàá tó wà ní àríwá ló burú. Áhábù Ọba ló burú jù nínú gbogbo àwọn ọba yẹn. Ǹjẹ́ o mọ ìdí rẹ̀? Ìdí pàtàkì kan ni ti ìyàwó rẹ̀, Jésíbẹ́lì Ayaba búburú.

Jésíbẹ́lì kì í ṣe ọmọ Ísírẹ́lì. Ọmọbìnrin ọba Sídónì ni. Báálì, ọlọ́run èké, ló ń sìn, ó sì mú kí Áhábù àti ọ̀pọ̀ àwọn ọmọ Ísírẹ́lì máa sin Báálì pẹ̀lú. Jésíbẹ́lì kórìíra Jèhófà ó sì pa púpọ̀ nínú àwọn wòlíì rẹ̀. Ṣe làwọn mìíràn ní láti sá pa mọ́ sínú ihò òkúta kó má bàa pa wọ́n. Bí Jésíbẹ́lì bá ń fẹ́ ohun kan, ó tiẹ̀ lè pa èèyàn kó bàa lè rí ohun náà.

Lọjọ́ kan, inú Áhábù bà jẹ́ gan-an. Nítorí náà, Jésíbẹ́lì béèrè lọ́wọ́ rẹ̀ pé: ‘Kí ló dé tí inú rẹ fi bà jẹ́ lónìí?’

Áhábù dáhùn pé: ‘Nítorí ohun tí Nábótì sọ fún mi ni. Mo fẹ́ ra ọgbà àjàrà rẹ̀. Ṣùgbọ́n ó sọ pé òun kò lè tà á fún mi.’

Jésíbẹ́lì fèsì pé: ‘Má dààmú ara rẹ. Màá gbà á fún ẹ.’

Nítorí náà, Jésíbẹ́lì kọ̀wé sí àwọn ìjòyè kan ní ìlú ibi tí ọkùnrin tó ń jẹ́ Nábótì yẹn ń gbé. Ó sọ fún wọn pé: ‘Ẹ mú kí àwọn èèyàn lásán kan wí pé Nábótì ti bú Ọlọ́run àti ọba. Lẹ́yìn náà, kẹ́ ẹ mú Nábótì kúrò ní ìlú kẹ́ ẹ sì sọ ọ́ lókùúta pa.’

Kété tí Jésíbẹ́lì gbọ́ pé Nábótì ti kú, ó sọ fún Áhábù pé: ‘Nísinsìnyí lọ gba ọgbà àjàrà rẹ̀.’ Ṣé o kò gbà pé ó yẹ kí Jésíbẹ́lì jẹ ìyà fún ṣíṣe irú ohun tó burú bẹ́ẹ̀?

Nítorí náà, nígbà tó yá, Jèhófà rán ọkùnrin kan tó ń jẹ́ Jéhù láti jẹ ẹ́ ní ìyà. Nígbà tí Jésíbẹ́lì gbọ́ pé Jéhù ń bọ̀, ó kun ojú rẹ̀, ó sì gbìyànjú láti ṣe ara lọ́ṣọ̀ọ́. Ṣùgbọ́n nígbà tí Jéhù dé tó sì rí Jésíbẹ́lì ní ojú fèrèsé, ó ké sí àwọn ọkùnrin tó wà ní ààfin pé: ‘Ẹ jù ú sí ìsàlẹ̀!’ Àwọn èèyàn náà ṣe bẹ́ẹ̀, gẹ́gẹ́ bó o ti ń wò ó nínú àwòrán yìí. Wọ́n jù ú sí ìsàlẹ̀, ó sì kú. Ìgbẹ̀yìn ayé Jésíbẹ́lì Ayaba búburú nìyẹn o.