Ẹ̀kọ́ 10
Bí O Ṣe Lè Rí Ẹ̀sìn Tòótọ́
Bí o bá fẹ́ jẹ́ ọ̀rẹ́ Ọlọ́run, o gbọ́dọ̀ máa ṣe ẹ̀sìn tí Ọlọ́run tẹ́wọ́ gbà. Jésù wí pé “àwọn olùjọsìn tòótọ́” yóò sin Ọlọ́run ní ìbámu pẹ̀lú “òtítọ́.” (Jòhánù 4:23, 24) Ọ̀nà kan ṣoṣo tó tọ̀nà ló wà láti sin Ọlọ́run. (Éfésù 4:4-6) Ẹ̀sìn tòótọ́ ń sinni lọ sí ìyè àìnípẹ̀kun, ẹ̀sìn èké sì ń sinni lọ sí ìparun.—Mátíù 7:13, 14.
O lè mọ ẹ̀sìn tòótọ́ nípa kíkíyè sí àwọn èèyàn tó ń ṣe é. Níwọ̀n bí Jèhófà ti jẹ́ ẹni rere, àwọn olùjọsìn rẹ̀ tòótọ́ gbọ́dọ̀ jẹ́ ẹni rere. Gẹ́gẹ́ bí igi ọsàn rere ṣe máa ń so ọsàn àtàtà, bẹ́ẹ̀ náà ni ẹ̀sìn tòótọ́ ṣe máa ń mú àwọn èèyàn àtàtà jáde.—Mátíù 7:15-20.
Àwọn ọ̀rẹ́ Jèhófà máa ń bọ̀wọ̀ jíjinlẹ̀ fún Bíbélì. Wọ́n mọ̀ pé ọ̀dọ̀ Ọlọ́run ni Bíbélì ti wá. Wọ́n máa ń jẹ́ kí ohun tó sọ ṣamọ̀nà wọn, kí ó bá wọn yanjú ìṣòro, kí ó sì ràn wọ́n lọ́wọ́ láti kẹ́kọ̀ọ́ nípa Ọlọ́run. (2 Tímótì 3:16) Wọ́n máa ń sapá láti fi ohun tí wọ́n ń wàásù rẹ̀ ṣèwà hù.
Àwọn ọ̀rẹ́ Jèhófà máa ń nífẹ̀ẹ́ ara wọn. Jésù fi ìfẹ́ hàn sí àwọn èèyàn nípa kíkọ́ wọn nípa Ọlọ́run, àti nípa mímú àwọn tí ń ṣàìsàn lára dá. Àwọn tí ń ṣe ẹ̀sìn tòótọ́ tún máa ń fẹ́ràn àwọn ẹlòmíràn. Gẹ́gẹ́ bíi ti Jésù, wọn kì í fojú tẹ́ńbẹ́lú àwọn tálákà tàbí àwọn tó wá láti ẹ̀yà mìíràn. Jésù sọ pé ìfẹ́ tí àwọn ọmọ ẹ̀yìn òun ń fi hàn sí ara wọn làwọn èèyàn yóò fi mọ̀ wọ́n.—Jòhánù 13:35.
Àwọn ọ̀rẹ́ Ọlọ́run máa ń bọlá fún orúkọ Ọlọ́run, ìyẹn ni Jèhófà. Bí ẹnì kan bá kọ̀ láti lo orúkọ rẹ, ṣé ẹni yẹn lè jẹ́ ọ̀rẹ́ rẹ tímọ́tímọ́? Rárá o! Bí a bá ní ọ̀rẹ́ kan, a máa ń pe orúkọ rẹ̀, a sì máa ń sọ ohun tó dáa nípa ọ̀rẹ́ wa yẹn fún àwọn ẹlòmíràn. Nítorí náà, àwọn tó bá ń fẹ́ láti jẹ́ ọ̀rẹ́ Ọlọ́run gbọ́dọ̀ máa lo orúkọ rẹ̀, kí wọ́n sì máa sọ nípa Ọlọ́run fún àwọn ẹlòmíràn. Jèhófà fẹ́ kí a máa ṣe bẹ́ẹ̀.—Mátíù 6:9; Róòmù 10:13, 14.
Bíi ti Jésù, àwọn ọ̀rẹ́ Ọlọ́run máa ń kọ́ àwọn èèyàn nípa Ìjọba Ọlọ́run. Ìjọba Ọlọ́run jẹ́ ìṣàkóso lókè ọ̀run, tí yóò sọ ilẹ̀ ayé di párádísè. Àwọn ọ̀rẹ́ Ọlọ́run máa ń sọ ìhìn rere nípa Ìjọba Ọlọ́run fún àwọn ẹlòmíràn.—Mátíù 24:14.
Àwọn Ẹlẹ́rìí Jèhófà ń ṣe gbogbo ohun tí wọ́n lè ṣe láti jẹ́ ọ̀rẹ́ Ọlọ́run. Wọ́n máa ń bọ̀wọ̀ fún Bíbélì, wọ́n sì fẹ́ràn ara wọn. Wọ́n tún máa ń lo orúkọ Ọlọ́run, wọ́n ń bọ̀wọ̀ fún un, wọ́n sì máa ń kọ́ àwọn ẹlòmíràn nípa Ìjọba Ọlọ́run. Àwọn Ẹlẹ́rìí Jèhófà ló ń ṣe ẹ̀sìn tòótọ́ lórí ilẹ̀ ayé lónìí.
O Tún Lè Wo
ÀWỌN Ẹ̀KỌ́ PÀTÀKÌ INÚ BÍBÉLÌ
Ṣé Ọlọ́run ní Orúkọ?
Ọlọ́run ní ọ̀pọ̀ orúkọ oyè, lára rẹ̀ ni Olódùmarè, Ẹlẹ́dàá, àti Olúwa. Fídíò yìí sọ orúkọ Ọlọ́run gangan èyí tó fara hàn ní ibi tó lé ni ẹgbẹ̀rún méje [7,000] nínú Bíbélì.
ÀWỌN Ẹ̀KỌ́ PÀTÀKÌ INÚ BÍBÉLÌ
Ta Ni Òǹṣèwé Bíbélì?
Tó bá jẹ́ pé èèyàn ló kọ ọ́, ṣé a wá lè pè é ní Ọ̀rọ̀ Ọlọ́run? Èrò ta ló wà nínú Bíbélì?
ÀWỌN Ẹ̀KỌ́ PÀTÀKÌ INÚ BÍBÉLÌ
Ṣe Òótọ́ Ni Ọ̀rọ̀ Inú Bíbélì?
Tó bá jẹ́ pé Ọlọ́run ló ni Bíbélì, á jẹ́ pé kò sí ìwé míì tá a lè fi í wé.
