Ẹ MÁA ṢỌ́NÀ!
Kí Ni Bíbélì Sọ Nípa Bí Ooru Ṣe Ń Mú Gan-an Kárí Ayé?
Ní July 2022, ìròyìn tó jáde kárí ayé fi hàn pé oṣù yẹn ni ooru tíì mú jù lọ:
“Lẹ́ẹ̀kejì lóṣù yìí, àwọn aláṣẹ orílẹ̀-èdè Ṣáínà kìlọ̀ pé ooru máa mú gan-an láwọn ìlú tó tó nǹkan bí àádọ́rin (70) lórílẹ̀-èdè náà.”—July 25, 2022, CNN Wire Service.
“Iná ńlá ń sọ láwọn igbó tó wà láwọn orílẹ̀-èdè kan nílẹ̀ Yúróòpù torí ojú ọjọ́ tó móoru gan-an.”—July 17, 2022, The Guardian.
“Lọ́jọ́ Sunday, ọ̀pọ̀ ìlú tó wà lórílẹ̀-èdè Amẹ́ríkà ni ojú ọjọ́ ti gbóná ju ti àtẹ̀yìnwá lọ, ìyẹn sì jẹ́ kí ooru mú gan-an káàkiri apá gúúsù àti àárín ìwọ̀ oòrùn títí dé etíkun tó wà ní ìlà oòrùn orílẹ̀-èdè náà.”—July 24, 2022, The New York Times.
Kí láwọn ohun tó ń ṣẹlẹ̀ yìí túmọ̀ sí? Ṣé ìgbà kan ń bọ̀ tí ayé yìí ò ní ṣeé gbé mọ́? Kí ni Bíbélì sọ?
Ṣé Bíbélì sọ tẹ́lẹ̀ pé ìgbà kan ń bọ̀ tí ojú ọjọ́ á máa móoru gan-an?
Bẹ́ẹ̀ ni. Bí ojú ọjọ́ ṣe ń móoru bá àsọtẹ́lẹ̀ tí Bíbélì sọ nípa àkókò wa yìí mu. Bí àpẹẹrẹ, Jésù sọ tẹ́lẹ̀ pé a máa rí “àwọn ohun tó ń bani lẹ́rù” tàbí “ohun ẹ̀rù.” (Lúùkù 21:11; Bíbélì Mímọ́) Ojú ọjọ́ tó ń móoru yìí ti mú káwọn kan máa bẹ̀rù pé tó bá yá àwa èèyàn máa ba ayé yìí jẹ́ débi pé kò ní ṣeé gbé mọ́.
Ṣé ìgbà kan ń bọ̀ tí ayé yìí ò ní ṣeé gbé mọ́?
Rárá o. Ọlọ́run dá ayé yìí káwa èèyàn lè máa gbé inú ẹ̀ títí láé. (Sáàmù 115:16; Oníwàásù 1:4) Kò ní jẹ́ káwọn èèyàn ba ayé yìí jẹ́, dípò bẹ́ẹ̀ ó ṣèlérí pé òun máa “run àwọn tó ń run ayé.”—Ìfihàn 11:18.
Ẹ jẹ́ ká wo àsọtẹ́lẹ̀ méjì tó jẹ́ ká mọ àwọn nǹkan míì tí Ọlọ́run ṣèlérí pé òun máa ṣe:
“Aginjù àti ilẹ̀ tí kò lómi máa yọ̀, aṣálẹ̀ tó tẹ́jú máa yọ̀ ṣẹ̀ṣẹ̀, ó sì máa yọ ìtànná bíi sáfúrónì.” (Àìsáyà 35:1) Ọlọ́run ò ní jẹ́ kí ayé yìí di aṣálẹ̀ tí ò ṣeé gbé, kàkà bẹ́ẹ̀, ó máa tún gbogbo ibi tó ti bà jẹ́ ṣe.
“Ò ń bójú tó ayé, o mú kí ó ní ọ̀pọ̀ rẹpẹtẹ èso, kí ilẹ̀ rẹ̀ sì lọ́ràá dáadáa.” (Sáàmù 65:9) Lọ́lá ìbùkún Ọlọ́run, gbogbo ayé máa di Párádísè.
Tó o bá fẹ́ mọ̀ sí i nípa bí ojú ọjọ́ tó ń yí pa dà ṣe bá àsọtẹ́lẹ̀ Bíbélì mu, ka àpilẹ̀kọ náà “Ohun Tí Bíbélì Sọ Nípa Ojú Ọjọ́ Tó Ń Yí Pa Dà àti Ọjọ́ Ọ̀la Wa.”
Tó o bá fẹ́ mọ ohun tí Bíbélì sọ nípa bá a ṣe máa tún ayé yìí ṣe, ka àpilẹ̀kọ náà “Ta Ló Máa Tún Ayé Yìí Ṣe?”
O Tún Lè Wo
ÀKÓJỌ ÀPILẸ̀KỌ ÀTI FÍDÍÒ
Ṣé Bíbélì Lè Ràn Ẹ́ Lọ́wọ́ Láti Fara Da Àjálù Tí Ojú Ọjọ́ Máa Ń Fà?
Bíbélì lè ràn ẹ́ lọ́wọ́ láti mọ ohun tó o máa ṣe kí àjálù tí ojú ọjọ́ máa ń fà tó ṣẹlẹ̀, tó bá ń ṣẹlẹ̀ lọ́wọ́ àti lẹ́yìn tó bá ṣẹlẹ̀.
OHUN TÍ BÍBÉLÌ SỌ
Àwọn Àmì Wo Ló Fi Hàn Pé A Ti Wà Ní “Àwọn Ọjọ́ Ìkẹyìn,” Tàbí “Òpin Ayé”?
Ọ̀pọ̀ àsọtẹ́lẹ̀ ni Bíbélì sọ tó jẹ́ ká mọ̀ pé a ti wà láwọn ọjọ́ ìkẹyìn.
ÀWỌN Ẹ̀KỌ́ PÀTÀKÌ INÚ BÍBÉLÌ
Kí Ni Ìdí Tí Ọlọ́run Fi Dá Ayé?
Ayé yìí rẹwà gan-an ni. Kò sún mọ́ oòrùn jù, kò sì jìnnà sí i jù, ibi tó yẹ gẹ́lẹ́ ló rọra dagun sí, ńṣe ló sì ń yípo ní ìwọ̀n tó yẹ gẹ́lẹ́. Kí nìdí tí Ọlọ́run fi dá ayé lọ́nà tó dára tó bẹ́ẹ̀ tó sì tún ṣe ọ̀pọ̀ nǹkan ribiribi sínú rẹ̀?
ÀKÓJỌ ÀPILẸ̀KỌ ÀTI FÍDÍÒ
Ohun Tí Bíbélì Sọ Nípa Ojú Ọjọ́ Tó Ń Yí Pa Dà àti Ọjọ́ Ọ̀la Wa
Ṣé Ẹlẹ́dàá wa bìkítà nípa ayé àtàwọn tó ń gbébẹ̀?
