Ẹ MÁA ṢỌ́NÀ!
Àwọn Onímọ̀ Sáyẹ́ǹsì Sọ Pé Àwa Èèyàn Ò Ní Pẹ́ Fọwọ́ Ara Wa Pa Ayé Yìí Run—Kí Ni Bíbélì Sọ?
Ní January 24, 2023, àwọn onímọ̀ sáyẹ́ǹsì yí ọwọ́ aago kan tí wọ́n ń pè ní Doomsday Clock a síwájú, ohun tí wọ́n ń fi èyí ṣàpẹẹrẹ ni pé ayé yìí ò ní pẹ́ pa run.
“Aago tí wọ́n ń pè ní ‘Doomsday Clock’ yìí ń ṣàpẹẹrẹ ìgbà tí àwọn èèyàn máa fọwọ́ ara wọn pa ayé yìí run. Lọ́jọ́ Tuesday, wọ́n yí aago yìí kó lè sún mọ́ ìgbà tó máa dún. Ohun tó sì fà á ni ogun tó ń jà ní Ukraine, títí kan bí àwọn orílẹ̀-èdè ṣe ń fi bọ́ǹbù átọ́míìkì halẹ̀ mọ́ra wọn àti bí ojú ọjọ́ ṣe ń burú sí i.”—AFP International Text Wire.
“Àwọn onímọ̀ sáyẹ́ǹsì sọ lọ́jọ́ Tuesday pé wọ́n ti sún aago ‘Doomsday Clock’ yìí tó fi jẹ́ pé ìṣẹ́jú kan ààbọ̀ ló kù tó fi máa dún. Èyí fi hàn pé àwa èèyàn ti sún mọ́ amágẹ́dọ́nì gan-an.”—ABC News.
“Àwùjọ àwọn onímọ̀ sáyẹ́ǹsì kan kárí ayé kìlọ̀ pé tí nǹkan bá ń bá a lọ báyìí, àwa èèyàn ò ní pẹ́ fọwọ́ ara wa pa ayé yìí run.”—The Guardian.
Ṣé lóòótọ́ ni pé ayé yìí àti gbogbo àwa tá a wà nínú ẹ̀ máa tó pa run? Ṣé ó yẹ ká máa bẹ̀rù ohun tó máa ṣẹlẹ̀ lọ́jọ́ iwájú? Kí ni Bíbélì sọ?
Ohun tó máa ṣẹlẹ̀ lọ́jọ́ iwájú
Bíbélì sọ pé, ‘ayé máa wà títí láé’ àti pé àwọn èèyàn á “máa gbé inú rẹ̀ títí láé.” (Oníwàásù 1:4; Sáàmù 37:29) Torí náà, àwọn èèyàn ò ní pa ayé yìí run tàbí kí wọ́n sọ ọ́ di ibi tí kò ní ṣeé gbé mọ́.
Àmọ́ ṣá o, Bíbélì sọ̀rọ̀ nípa ìparun kan tó ń bọ̀. Bí àpẹẹrẹ, ó sọ pé “ayé ń kọjá lọ.”—1 Jòhánù 2:17.
Tó o bá fẹ́ mọ ohun tó túmọ̀ sí tí Bíbélì bá sọ̀rọ̀ nípa òpin ayé, ka àpilẹ̀kọ náà “Ṣé Ayé Ò Ní Pẹ́ Pa Run? Kí Ni Àpókálíìsì?”
Tó o bá fẹ́ mọ ìgbà tí Bíbélì sọ pé òpin máa dé, ka àpilẹ̀kọ náà “Ìgbà Wo Ni Òpin Ayé Máa Dé?”
Ohun tó máa fi ẹ́ lọ́kàn balẹ̀
Láìka àwọn ìṣòro tá à ń bá yí nínú ayé yìí, Bíbélì lè fi wá lọ́kàn balẹ̀. Lọ́nà wo?
Bíbélì fún wa láwọn ìmọ̀ràn tó wúlò gan-an. (2 Tímótì 3:16, 17) Bí àpẹẹrẹ, tó o bá fẹ́ mọ bí Bíbélì ṣe lè fi ẹ́ lọ́kàn balẹ̀ láìka àwọn ìṣòro ayé yìí sí, ka àpilẹ̀kọ náà “Bó O Ṣe Lè Borí Àníyàn.”
Bíbélì fi wá lọ́kàn balẹ̀ pé ọ̀la máa dáa. (Róòmù 15:4) Ó ṣe kúlẹ̀kúlẹ̀ àlàyé nípa ohun tó ń ṣẹlẹ̀ nísinsìnyí àti ohun tó máa ṣẹlẹ̀ lọ́jọ́ iwájú. Àwọn nǹkan yìí sì máa ń fi wá lọ́kàn balẹ̀ bó tiẹ̀ jẹ́ pé ayé túbọ̀ ń dojú rú.
Tó o bá fẹ́ túbọ̀ lóye àwọn ohun tó wà nínú Bíbélì, a rọ̀ ẹ́ pé kó o jẹ́ kí ọ̀kan lára àwa Ẹlẹ́rìí Jèhófà máa kọ́ ẹ lẹ́kọ̀ọ́.
a “Àwọn onímọ̀ sáyẹ́ǹsì ló ṣe aago tí wọ́n ń pè ní Doomsday Clock. Aago yìí ni wọ́n fi ń mọ bí ìparun ayé yìí ṣe sún mọ́ tó àti bí àwọn ẹ̀rọ ìgbàlódé tá à ń fi ọwọ́ ara wa ṣe ṣe máa fa ìparun náà. Ohun kan ni pé àfiwé lásán ni aago yìí, ó kàn ń jẹ́ ká mọ àwọn ìṣòro tá a gbọ́dọ̀ yanjú káwa èèyàn má bàa fọwọ́ ara wa pa ayé yìí run.”—Ìwé ìròyìn Bulletin of the Atomic Scientists.
O Tún Lè Wo
OHUN TÍ BÍBÉLÌ SỌ
Kí Ni Ogun Amágẹ́dọ́nì?
Ẹ̀ẹ̀kan péré ni ọ̀rọ̀ náà Amágẹ́dọ́nì fara hàn nínú Bíbélì, àmọ́ Ìwé Mímọ́ sọ̀rọ̀ gan-an nípa ogun tí ọ̀rọ̀ náà tọ́ka sí.
ÀWỌN Ẹ̀KỌ́ PÀTÀKÌ INÚ BÍBÉLÌ
Kí Nìdí Tí Ọlọ́run Fi Gbà Pé Ká Máa Jìyà?
Ọ̀pọ̀ èèyàn ló máa ń béèrè pé kí ló fà á tí ìkórìíra àti ìyà fi pọ̀ láyé. Bíbélì dáhùn ìbéèrè yìí lọ́nà tó tẹ́ni lọ́rùn tó sì tuni nínú.
JÍ!
Ẹ̀kọ́ Tó Ń Fini Lọ́kàn Balẹ̀ Pé Ọ̀la Ń Bọ̀ Wá Dáa
Wo díẹ̀ lára àwọn ohun rere tí Ọlọ́run sọ pé ó máa jẹ́ kí ọjọ́ ọ̀la wa dáa.
ÀLÀYÉ ÀWỌN ẸSẸ BÍBÉLÌ
Àlàyé Ìfihàn 21:1—“Ọ̀run Tuntun Kan àti Ayé Tuntun Kan”
Kí ni Bíbélì sọ tó jẹ́ ká mọ ohun tí ẹsẹ yìí túmọ̀ sí?
ÀWỌN Ẹ̀KỌ́ PÀTÀKÌ INÚ BÍBÉLÌ
Kí Ni Ìdí Tí Ọlọ́run Fi Dá Ayé?
Ayé yìí rẹwà gan-an ni. Kò sún mọ́ oòrùn jù, kò sì jìnnà sí i jù, ibi tó yẹ gẹ́lẹ́ ló rọra dagun sí, ńṣe ló sì ń yípo ní ìwọ̀n tó yẹ gẹ́lẹ́. Kí nìdí tí Ọlọ́run fi dá ayé lọ́nà tó dára tó bẹ́ẹ̀ tó sì tún ṣe ọ̀pọ̀ nǹkan ribiribi sínú rẹ̀?
