Ẹ MÁA ṢỌ́NÀ!
2022: Ọdún Wàhálà àti Ìdàrúdàpọ̀—Kí Ni Bíbélì Sọ?
Lọ́dún 2022, àwọn ìròyìn tó dá lórí ogun, ipò ọrọ̀ ajé tó ń dẹnu kọlẹ̀ àtàwọn àjálù tó ń ṣẹlẹ̀ ló gbalẹ̀ gbòde. Bíbélì nìkan ló ṣàlàyé ohun táwọn ìṣẹ̀lẹ̀ yìí ń jẹ́ ká mọ̀.
Ohun táwọn ìṣẹ̀lẹ̀ ọdún 2022 ń jẹ́ ká mọ̀
Àwọn ohun tó ṣẹlẹ̀ lọ́dún 2022 jẹ́ kó túbọ̀ hàn gbangba pé àkókò tí Bíbélì pè ní “àwọn ọjọ́ ìkẹyìn” la wà báyìí. (2 Tímótì 3:1) Àkókò yẹn sì bẹ̀rẹ̀ lọ́dún 1914. Kíyè sí bí àwọn ohun tó ṣẹlẹ̀ lẹ́nu àìpẹ́ yìí ṣe bá ohun tí Bíbélì sọ nípa àkókò wa mu:
“Ogun.”—Mátíù 24:6.
“2022 Ni Ọdún Tí Ogun Bẹ̀rẹ̀ Pa Dà Nílẹ̀ Yúróòpù.” a
Wo àpilẹ̀kọ náà “Orílẹ̀-èdè Rọ́ṣíà Gbógun Wọ Orílẹ̀-èdè Ukraine.”
“Àìtó oúnjẹ.”—Mátíù 24:7.
“Ebi Àpafẹ́ẹ̀kú Pa Àwọn Èèyàn Lọ́dún 2022.” b
Wo àpilẹ̀kọ náà “Ogun Tó Ń Jà Ní Ukraine Ti Dá Kún Ìṣòro Àìtó Oúnjẹ.”
“Àjàkálẹ̀ àrùn.”—Lúùkù 21:11.
“Bí àrùn monkeypox àti Kòrónà ṣe ń ṣọṣẹ́, bẹ́ẹ̀ ni àrùn rọpárọsẹ̀ tá a mọ̀ sí Polio tún bẹ̀rẹ̀ sí í han àwọn èèyàn léèmọ̀. Ṣe là ń tinú àìsàn kan bọ́ sínú òmíì.” c
Wo àpilẹ̀kọ náà “Àrùn Kòrónà Ti Pa Mílíọ̀nù Mẹ́fà Èèyàn.”
“Àwọn ohun tó ń bani lẹ́rù.”—Lúùkù 21:11.
“Ojú ọjọ́ ò fara rọ rárá ní ìgbà ẹ̀ẹ̀rùn ọdún 2022. Kárí ayé làwọn nǹkan bí ooru gbígbóná, ọ̀gbẹlẹ̀, igbó tó ń jó àti omíyalé ti ṣọṣẹ́ gan-an. Ọ̀pọ̀ nǹkan ni ojú ọjọ́ tí ò fara rọ yìí bà jẹ́, kódà ẹgbẹẹgbẹ̀rún àwọn èèyàn lẹ̀mí wọn lọ sí i, ó sì sọ ọ̀pọ̀ mílíọ̀nù èèyàn kárí ayé di aláìnílé mọ́.” d
Wo àpilẹ̀kọ náà “Kí Ni Bíbélì Sọ Nípa Bí Ooru Ṣe Ń Mú Gan-an Kárí Ayé?”
“Rògbòdìyàn [tàbí, “rúkèrúdò; ìdàrúdàpọ̀,” àlàyé ìsàlẹ̀ ìwé].”—Lúùkù 21:9.
“Torí pé inú ń bí ọ̀pọ̀ èèyàn nítorí ọrọ̀ ajé tó ń dẹnu kọlẹ̀ àti bí nǹkan ṣe túbọ̀ ń gbówó lórí, ọ̀pọ̀ ìgbà làwọn èèyàn wọ́de lọ́dún 2022 láti fi ẹ̀hónú hàn sí ìjọba.” e
Wo àpilẹ̀kọ náà “Kí Ni Bíbélì Sọ Nípa Bí Nǹkan Ṣe Túbọ̀ Ń Gbówó Lórí Kárí Ayé?”
Báwo ni nǹkan ṣe máa rí lọ́dún tó ń bọ̀?
Kò sẹ́ni tó lè sọ ní pàtó pé báyìí ni nǹkan ṣe máa rí lọ́dún 2023. Àmọ́ ohun kan tá a mọ̀ ni pé, láìpẹ́ Ìjọba Ọlọ́run máa tún ayé ṣe. (Dáníẹ́lì 2:44) Ìjọba yẹn máa fòpin sí gbogbo ohun tó ń fa ìyà fáwa èèyàn, á sì jẹ́ kí ohun tí Ọlọ́run ní lọ́kàn fún ayé yìí ṣẹ.—Mátíù 6:9, 10.
A rọ̀ ẹ́ pé kó o fi ìmọ̀ràn Jésù Kristi sọ́kàn pé ká “máa ṣọ́nà,” ká sì máa kíyè sí bí àwọn ohun tó ń ṣẹlẹ̀ láyè ṣe ń fi hàn pé àwọn àsọtẹ́lẹ̀ Bíbélì ń ṣẹ. (Máàkù 13:37) Tó o bá fẹ́ mọ̀ sí i nípa bí Bíbélì ṣe lè ràn ẹ́ lọ́wọ́ nísinsìnyí àti bó ṣe lè jẹ́ kí ọkàn ìwọ àti ìdílé rẹ balẹ̀ pé ọ̀la ń bọ̀ wá dáa, jọ̀wọ́ kàn sí àwa Ẹlẹ́rìí Jèhófà.
a AP News, “2022 Ni Ọdún Tí Ogun Bẹ̀rẹ̀ Pa Dà Nílẹ̀ Yúróòpù,” látọwọ́ Jill Lawless, December 8, 2022.
b “Ìṣòro Àìtó Oúnjẹ Kárí Ayé” látọ̀dọ̀ World Food Programme.
c JAMA Health Forum, “Àjàkálẹ̀ Àrùn Gbalẹ̀ Gbòde, Látorí Kòrónà Dórí Monkeypox, Polio Àtàwọn Àrùn Míì,” látọwọ́ Lawrence O. Gostin, JD, September 22, 2022.
d Earth.Org, “Kí Ló Fà Á Tí Ojú Ọjọ́ Ò Fi Bára Dé Nígbà Ẹ̀ẹ̀rùn Ọdún 2022?” látọwọ́ Martina Igini, October 24, 2022.
e Carnegie Endowment for International Peace, “Ipò Ọrọ̀ Ajé Tó Dẹnu Kọlẹ̀ Mú Káwọn Èèyàn Wọ́de Gan-an Lọ́dún 2022,” látọwọ́ Thomas Carothers àti Benjamin Feldman, December 8, 2022.
O Tún Lè Wo
OHUN TÍ BÍBÉLÌ SỌ
Àwọn Àmì Wo Ló Fi Hàn Pé A Ti Wà Ní “Àwọn Ọjọ́ Ìkẹyìn,” Tàbí “Òpin Ayé”?
Ọ̀pọ̀ àsọtẹ́lẹ̀ ni Bíbélì sọ tó jẹ́ ká mọ̀ pé a ti wà láwọn ọjọ́ ìkẹyìn.
ILÉ ÌṢỌ́
Ọlọ́run Máa Tó Mú Gbogbo Ìyà Kúrò
Báwo la ṣe lè mọ̀ pé Ọlọ́run ò ní pẹ́ fòpin sí ìyà àti ìrẹ́jẹ?
ÀWỌN Ẹ̀KỌ́ PÀTÀKÌ INÚ BÍBÉLÌ
Kí Ni Ìjọba Ọlọ́run?
Nígbà tí Jésù wà láyé, ẹ̀kọ́ nípa Ìjọba Ọlọ́run ló kọ́ àwọn èèyàn jù lọ. Ọjọ́ pẹ́ táwọn ọmọlẹ́yìn rẹ̀ ti ń gbàdúrà pé kí Ìjọba yẹn dé.
ÀWỌN Ẹ̀KỌ́ PÀTÀKÌ INÚ BÍBÉLÌ
Ọdún 1914 Ni Ìjọba Ọlọ́run Bẹ̀rẹ̀ Sí Í Ṣàkóso
Ní ohun tó lé ní ẹgbẹ̀rún méjì àti ọgọ́rùn-ún mẹ́fà [2,600] ọdún sẹ́yìn, Ọlọ́run mú kí ọba kan tó jẹ́ alágbára lá àlá kan. Àlá náà jẹ́ àsọtẹ́lẹ̀, ó sì ti ń ṣẹ báyìí..
ÀKÓJỌ ÀPILẸ̀KỌ ÀTI FÍDÍÒ
Ìdí Tó Fi Dá Wa Lójú Pé Ọ̀la Máa Dáa
Kí nìdí táwọn ìlérí tó wà nínú Bíbélì fi yàtọ̀ sáwọn ìlérí táwọn èèyàn máa ń ṣe?
