Ìgbà Wo La Máa Bọ́ Lọ́wọ́ Àwọn Afẹ̀míṣòfò?
Táwọn afẹ̀míṣòfò bá ṣọṣẹ́, ó ṣeé ṣe kó o máa ṣe kàyéfì pé: ‘Ṣé Ọlọ́run tiẹ̀ rí gbogbo ohun tó ń ṣẹlẹ̀ yìí? Kí ló dé tírú àwọn nǹkan báyìí fi ń ṣẹlẹ̀? Ìgbà wo la máa bọ́ lọ́wọ́ àwọn afẹ̀míṣòfo a? Kí lá jẹ́ kọ́kàn mi balẹ̀ láìka gbogbo ohun tó ń ṣẹlẹ̀ yìí sí?’ Bíbélì dáhùn àwọn ìbéèrè yìí lọ́nà tó ń fini lọ́kàn balẹ̀.
Ṣé inú Ọlọ́run ń dùn sáwọn tó ń fẹ̀mí ṣòfò?
Ọlọ́run kórìíra ìwà ipá àti fífi ẹ̀mí èèyàn ṣòfò. (Sáàmù 11:5; Òwe 6:16, 17) Jésù tí Ọlọ́run rán wá sáyé náà bá àwọn ọmọlẹ́yìn ẹ̀ wí nígbà tí wọ́n fa idà yọ láti gbèjà Jésù. (Mátíù 26:50-52) Bó tilẹ̀ jẹ́ pé àwọn kan máa ń sọ pé Ọlọ́run fọwọ́ sí báwọn ṣe ń pààyàn, àmọ́ Ọlọ́run ò fọwọ́ sí irú nǹkan bẹ́ẹ̀. Kódà, Ọlọ́run kì í tẹ́tí sí àdúrà wọn.—Àìsáyà 1:15.
Ó máa ń dun Ọlọ́run tó bá rí àwọn tó ń jìyà, títí kan àwọn táwọn afẹ̀míṣòfò ṣe lọ́ṣẹ́. (Sáàmù 31:7; 1 Pétérù 5:7) Bíbélì tún jẹ́ ká mọ̀ pé Ọlọ́run máa tó fòpin sí ìwà ipá.—Àìsáyà 60:18.
Ohun tó fà á táwọn kan fi máa ń fẹ̀mí àwọn èèyàn ṣòfò
Bíbélì sọ ohun tó fa ìwà burúkú yìí, ó ní: “Èèyàn ti jọba lórí èèyàn sí ìpalára rẹ̀.” (Oníwàásù 8:9) Ọjọ́ pẹ́ táwọn tó wà nípò àṣẹ ti máa ń lo ọwọ́ agbára àti ìwà ipá láti tẹ àwọn èèyàn lórí ba. Bójọ́ ṣe ń gorí ọjọ́, àwọn tí wọ́n ń jẹ gàba lé lórí lè yarí, wọ́n sì lè bẹ̀rẹ̀ sí í pa àwọn èèyàn kí wọ́n lè fi ìhónú hàn.—Oníwàásù 7:7.
Ìgbà tá a máa bọ́ lọ́wọ́ àwọn afẹ̀míṣòfò
Ọlọ́run ṣèlérí pé òun máa fòpin sí ìwà ipá àti ìbẹ̀rù, òun á sì mú kí àlàáfíà jọba kárí ayé. (Àìsáyà 32:18; Míkà 4:3, 4) Lára ohun tó máa ṣe ni pé:
Ó máa fòpin sí ohun tó ń mú káwọn èèyàn hùwà ipá. Ọlọ́run máa fi ìjọba ẹ̀ rọ́pò ìjọba èèyàn. Jésù Kristi tó jẹ́ Ọba Ìjọba náà ò ní ṣojúsàájú tàbí kó gbè sẹ́yìn ẹnì kan, á sì fòpin sí ìnilára àti ìwà ipá. (Sáàmù 72:2, 14) Tó bá dìgbà yẹn, kò sẹ́ni táá máa hùwà ipá mọ́. Bíbélì sọ pé: “Inú [àwọn èèyàn] yóò sì máa dùn jọjọ nínú ọ̀pọ̀lọpọ̀ àlàáfíà.”—Sáàmù 37:10, 11.
Ó máa mú gbogbo ohun tí ìwà ipá ti fà kúrò. Gbogbo àwọn táwọn afẹ̀míṣòfò ti ṣe léṣe ni Ọlọ́run máa mú lára dá, á sì pẹ̀tù sọ́kàn àwọn tí wọ́n ti kó ẹ̀dùn ọkàn bá. (Àìsáyà 65:17; Ìfihàn 21:3, 4) Ó tún ṣèlérí pé òun máa jí àwọn tó ti kú díde, wọ́n á sì gbádùn àlàáfíà lórí ilẹ̀ ayé.—Jòhánù 5:28, 29.
Bíbélì jẹ́ ká mọ̀ pé kò ní pẹ́ mọ́ tí Ọlọ́run á fi ṣe àwọn nǹkan yìí. Àmọ́ o lè máa ronú pé, ‘Kí ló dé tí Ọlọ́run fi ń dúró kó tó fòpin sí ìwà burúkú yìí?’ Kó o lè rí ìdáhùn sí ìbéèrè ẹ, wo fídíò náà Kí Nìdí Tí Ọlọ́run Fi Gbà Pé Ká Máa Jìyà?
a “Àwọn afẹ̀míṣòfò” làwọn tó máa ń hùwà ipá sáwọn èèyàn, tí wọ́n sì máa ń kó ìpayà bá àwọn aráàlú, torí pé wọ́n fẹ́ kí ìyípadà wáyé lórí ọ̀rọ̀ òṣèlú, ìsìn tàbí àwọn nǹkan míì láwùjọ. Àmọ́, táwọn kan bá hùwà ipá, ẹnu àwọn èèyàn kì í kò lórí bóyá afẹ̀míṣòfò ni wọ́n tàbí bẹ́ẹ̀ kọ́.
O Tún Lè Wo
ÀKÓJỌ ÀPILẸ̀KỌ ÀTI FÍDÍÒ
Bó O Ṣe Lè Borí Àníyàn
Àwọn ìmọ̀ràn àtàwọn ẹsẹ Bíbélì wo ló lè ràn ẹ́ lọ́wọ́ láti borí àníyàn?
ÀKÓJỌ ÀPILẸ̀KỌ ÀTI FÍDÍÒ
Ìdí Tó Fi Dá Wa Lójú Pé Ọ̀la Máa Dáa
Kí nìdí táwọn ìlérí tó wà nínú Bíbélì fi yàtọ̀ sáwọn ìlérí táwọn èèyàn máa ń ṣe?
OHUN TÍ BÍBÉLÌ SỌ
Kí Ni Ìjọba Ọlọ́run?
Ṣàgbéyẹ̀wò ìdí tí ìjọba Ọlọ́run fi dára ju gbogbo ìjọba yòókù lọ.
ILÉ ÌṢỌ́
Kí Ni Ìjọba Ọlọ́run Máa Ṣe?
Jésù mọ̀ pé Ìjọba Ọlọ́run nìkan ló lè yanjú ìṣòro ayé yìí. Kí ni Ìjọba yẹn ti ṣe tó jẹ́ ká gbà bẹ́ẹ̀?
ÀKÓJỌ ÀPILẸ̀KỌ ÀTI FÍDÍÒ
Ṣé Ìdájọ́ Òdodo Máa Wà?
Bíbélì jẹ́ ká mọ̀ pé ọ̀dọ̀ Ọlọ́run, tí ẹ̀mí gbogbo èèyàn jọ lójú, ni ìdájọ́ òdodo á ti wá.
ÀWỌN Ẹ̀KỌ́ PÀTÀKÌ INÚ BÍBÉLÌ
Kí Nìdí Tí Ọlọ́run Fi Gbà Pé Ká Máa Jìyà?
Ọ̀pọ̀ èèyàn ló máa ń béèrè pé kí ló fà á tí ìkórìíra àti ìyà fi pọ̀ láyé. Bíbélì dáhùn ìbéèrè yìí lọ́nà tó tẹ́ni lọ́rùn tó sì tuni nínú.
