Ẹ MÁA ṢỌ́NÀ!
Ṣé Ogun Àgbáyé Tún Máa Jà?—Kí Ni Bíbélì Sọ?
Láti nǹkan bí ọgbọ̀n (30) ọdún sẹ́yìn lọ̀pọ̀ èèyàn ti ń ronú pé àlàáfíà máa tó kárí ayé. Àmọ́ àwọn nǹkan tó ń ṣẹlẹ̀ lẹ́nu àìpẹ́ yìí ti yí èrò yẹn pa dà.
“Ogun tó ń jà ní Gaza ti mú káwọn ọmọ ogun orílẹ̀-èd Israel àti ẹgbẹ́ Hezbollah máa jà ní ààlà orílẹ̀-èdè Lebanon. Ẹ̀rù sì ń ba àwọn èèyàn pé àwọn orílẹ̀-èdè míì máa fẹ́ dá sí ogun tó ń jà ní Gaza.”—Reuters, January 6, 2024.
“Àwọn ẹgbẹ́ tó ń ṣiṣẹ́ fún orílẹ̀-èdè Iran ń fa wàhálà káàkiri àwọn agbègbè kan. Bákan náà, orílẹ̀-èdè náà ti ń ṣe àwọn bọ́ǹbù átọ́míìkì tó lè runlérùnnà. Kò tán síbẹ̀ o, orílẹ̀-èdè Rọ́ṣíà àti Ṣáínà ń fọwọ́ sowọ́ pọ̀ pẹ̀lú wọn. Gbogbo èyí ń jẹ́ kẹ́rù máa ba àwọn tó ń gbé ní Amẹ́ríkà àti Yúróòpù.”—The New York Times, January 7, 2024.
“Àwọn bọ́ǹbù tí Rọ́ṣíà ń jù túbọ̀ ń ba ọ̀pọ̀ nǹkan jẹ́ lórílẹ̀-èdè Ukraine.”—UN News, January 11, 2024.
“Orílẹ̀-èdè Ṣáínà túbọ̀ ń kó àwọn ohun ìjà jọ, ọrọ̀ ajé wọn sì ń gbé pẹ́ẹ́lí sí i. Orílẹ̀-èdè Taiwan náà ń gbé ìfẹ́ orílẹ̀-èdè wọn lárugẹ. Kò mọ síbẹ̀ o, ata àti ojú lọ̀rọ̀ orílẹ̀-èdè Ṣáínà àti Amẹ́ríkà báyìí. Bóyá ni ogun ò ní pa dà ṣẹlẹ̀ láàárín wọn.”—The Japan Times, January 9, 2024.
Kí ni Bíbélì sọ nípa rògbòdìyàn tó ń ṣẹlẹ̀ káàkiri ayé lónìí? Ṣé gbogbo rògbòdìyàn yìí ò pa dà já sí ogún àgbáyé?
Ohun tí Bíbélì sọ tẹ́lẹ̀ nípa àkókò wa
Bíbélì ò sọ tẹ́lẹ̀ nípa èyíkéyìí nínú àwọn ogun pàtó tó ń jà báyìí. Bó ti wù kó rí, ó sọ tẹ́lẹ̀ pé ogun á máa jà káàkiri lónìí, ìyẹn á sì “mú àlàáfíà kúrò ní ayé.”—Ìfihàn 6:4.
Ìwé Dáníẹ́lì sọ tẹ́lẹ̀ pé “ní àkókò òpin,” àwọn orílẹ̀-èdè alágbára á ‘máa kọ lu’ ara wọn tàbí bá ara wọn fà á kí wọ́n lè mọ ẹni táá jẹ́ ọ̀gá. Nípa bẹ́ẹ̀, ọ̀pọ̀lọpọ̀ “ìṣúra” tàbí òbítíbitì owó ní wọ́n á máa ná lórí ohun ìjà, wọ́n á sì máa fi ohun ìjà tí wọ́n kó jọ tahùn sí ara wọn.—Dáníẹ́lì 11:40, 42, 43.
Ogun tó ń bọ̀
Bíbélì jẹ́ ká mọ̀ pé ipò ayé yìí máa burú sí i kó tó di pé nǹkan dáa. Jésù sọ tẹ́lẹ̀ pé “ìpọ́njú ńlá máa wà nígbà náà, irú èyí tí kò tíì ṣẹlẹ̀ rí láti ìbẹ̀rẹ̀ ayé.” (Mátíù 24:21) “Ìpọ́njú’ńlá” yìí ló máa fa ogun Amágẹ́dọ́nì tí Bíbélì pè ní “ogun ọjọ́ ńlá Ọlọ́run Olódùmarè.”—Ìfihàn 16:14, 16.
Àmọ́ ṣá o, ogun Amágẹ́dọ́nì kò ní pa ayé run, dípò bẹ́ẹ̀ ṣe ló máa gba aráyé là. Ọlọ́run máa lo ogun yẹn láti fòpin sí ìjọba èèyàn tó ti fa ọ̀pọ̀ ogun tó ba nǹkan jẹ́ gan-an. Tó o bá fẹ́ mọ bí ogun Amágẹ́dọ́nì ṣe máa mú kí àlàáfíà jọba láyé, ka àwọn àpilẹ̀kọ yìí:
O Tún Lè Wo
OHUN TÍ BÍBÉLÌ SỌ
Kí Ni Ìpọ́njú Ńlá?
Ohun táwọn èèyàn ń pè ní ‘àsọtẹ́lẹ̀ àkókò òpin’ jẹ́ ká mọ nípa ìgbà tí nǹkan máa nira jù lọ fún aráyé. Kí la retí pé ó máa ṣẹlẹ̀?
ÀWỌN Ẹ̀KỌ́ PÀTÀKÌ INÚ BÍBÉLÌ
Kí Ni Ìdí Tí Ọlọ́run Fi Dá Ayé?
Ayé yìí rẹwà gan-an ni. Kò sún mọ́ oòrùn jù, kò sì jìnnà sí i jù, ibi tó yẹ gẹ́lẹ́ ló rọra dagun sí, ńṣe ló sì ń yípo ní ìwọ̀n tó yẹ gẹ́lẹ́. Kí nìdí tí Ọlọ́run fi dá ayé lọ́nà tó dára tó bẹ́ẹ̀ tó sì tún ṣe ọ̀pọ̀ nǹkan ribiribi sínú rẹ̀?
ÀKÓJỌ ÀPILẸ̀KỌ ÀTI FÍDÍÒ
Ìdí Tó Fi Dá Wa Lójú Pé Ọ̀la Máa Dáa
Kí nìdí táwọn ìlérí tó wà nínú Bíbélì fi yàtọ̀ sáwọn ìlérí táwọn èèyàn máa ń ṣe?
OHUN TÍ BÍBÉLÌ SỌ
Ṣé Mo Lè Rí Àwọn Ọ̀rọ̀ Tó Máa Tù Mí Nínú Nínú Bíbélì?
Àwọn ẹsẹ Bíbélì tó ti tu àwọn tó ní ìṣòro àti ẹ̀dùn ọkàn nínú.
