Ilé Ẹjọ́ Agbègbè Oktyabrsky tó wà ní Kirov ti pinnu láti kéde ìdájọ́ lórí ẹjọ́ Arákùnrin Anatoliy Tokarev ní October 23, 2020. * Ó ṣeé ṣe kí wọ́n fi Arákùnrin Anatoliy sẹ́wọ̀n ọdún mẹ́ta àtààbọ̀.

Anatoliy Tokarev

• Wọ́n Bíi Ní: 1958 (ní Baranovskaya, lágbègbè Kirov)

• Ìtàn Ìgbésí Ayé: Ìyá ẹ̀ nìkan ló tọ́ ọ dàgbà. Onímọ̀ nípa ètò orí kọ̀ǹpútà ni, àmọ́ ó ti fẹ̀yìn tì. Ó fẹ́ràn kó máa fi kámẹ́rà yàwòrán, kó máa ta ayò chess, kó sì máa lo ohun èlò ìkọrin tí wọ́n ń pè ní accordion. Ó fẹ́ Margarita lọ́dún 1979, wọ́n sì bí ọmọ méjì

• Àwọn nǹkan tó kọ́ nípa ìmọ̀ sáyẹ́ǹsì mú kó rò pé kò sí Ọlọ́run. Ó bẹ̀rẹ̀ sí í kẹ́kọ̀ọ́ Bíbélì pẹ̀lú àwa Ẹlẹ́rìí Jèhófà nígbà tó pé ẹni ọdún mẹ́tàdínlọ́gbọ̀n (27), ó sì rí i pé ẹ̀kọ́ Bíbélì ò ta ko ìmọ̀ sáyẹ́ǹsì

Ní May 24, 2019, àwọn agbófinró láti àjọ Center for Countering Extremism ya wọ ilé Arákùnrin Tokarev. Wọ́n sì bẹ̀rẹ̀ sí í da ìbéèrè bò ó. Wọ́n láwọn máa fìyà jẹ Arákùnrin Tokarev àti ìdílé ẹ̀ tí ò bá gbà pé “agbawèrèmẹ́sìn” lòun. Ẹ̀yìn ìyẹn ni wọ́n mú un lọ sí ẹ̀ka tí wọ́n ti ń fọ̀rọ̀ wá àwọn ọ̀daràn lẹ́nu wò.

Ní nǹkan bí oṣù márùn-ún lẹ́yìn náà, wọ́n dẹ́bi fún Arákùnrin Tokarev, wọ́n sì sọ pé ó ṣẹ̀ sí ohun tó wà ní àpilẹ̀kọ méjì nínú ìwé Òfin Ìwà Ọ̀daràn Orílẹ̀-èdè Rọ́ṣíà. Wọ́n fẹ̀sùn kàn án pé ó ń fowó ṣètìlẹyìn fáwọn “agbawèrèmẹ́sìn.” Ṣáájú ìgbà yẹn làwọn alátakò ti ń dọ́gbọ́n fi ẹ̀rọ tó ń gba ohùn sílẹ̀ ṣọ́ gbogbo bí nǹkan ṣe ń lọ nílé Arákùnrin Tokarev. Ohùn tí wọ́n gbà sílẹ̀ yẹn ni wọ́n fi jẹ́rìí lòdì sí Arákùnrin Tokarev, wọ́n ní ó ń kó àwọn èèyàn jọ láti ka àwọn ìwé tí ìjọba kà sí ẹrù àwọn “agbawèrèmẹ́sìn.”

Gbogbo ìgbà là ń rántí Arákùnrin Tokarev àti ìdílé ẹ̀ nínú àdúrà wa. “Adúróṣinṣin” ni Jèhófà, torí náà ó dá wa lójú pé ó máa dúró tì wọ́n.​—Sáàmù 18:25.