Ní December 21, 2020, Ilé Ẹjọ́ Agbègbè Leninskiy ní Rostov-on-Don sọ pé Arákùnrin Semyon Baybak jẹ̀bi, wọ́n sì ní kó lọ lo ọdún mẹ́ta àtààbọ̀ nílé. Kò ní lọ sẹ́wọ̀n àmọ́ àwọn agbófinró á máa ṣọ́ ọ.

Nígbà tí Semyon ń sọ̀rọ̀ ní ilé ẹjọ́ náà, ní ọjọ́ mélòó kan ṣáájú ìgbà yẹn, ó fa ọ̀rọ̀ gbajúgbajà kan tó máa ń jà fún ẹ̀tọ́ ọmọnìyàn nílẹ̀ Rọ́ṣíà yọ pé: “Wọ́n ní wọ́n ń ṣe inúnibíni sáwọn [Ẹlẹ́rìí Jèhófà], àmọ́ ẹ̀rín múṣẹ́ kì í wọ́n lẹ́nu wọn.” Semyon tún sọ pé: “Mi ò rẹ̀wẹ̀sì, kò sì ṣe mí bíi pé wọ́n kórìíra mi.” Ó wá ka 2 Kọ́ríńtì 4:​8, 9, pé ó ń ṣẹ sí òun lára, àtàwọn Ẹlẹ́rìí yòókù ní Rọ́ṣíà, ó ní: “Wọ́n há wa gádígádí ní gbogbo ọ̀nà, àmọ́ kò le débi tí a ò fi lè yíra; ọkàn wa dà rú, àmọ́ kì í ṣe láìsí ọ̀nà àbáyọ rárá; wọ́n ṣe inúnibíni sí wa, àmọ́ a ò pa wá tì; wọ́n gbé wa ṣánlẹ̀, àmọ́ a ò pa run.”