Ní November 24, 2020, Ilé Ẹjọ́ Ìlú Petropavlovsk-Kamchatskiy tó wà lágbègbè Kamchatka dá ẹjọ́ Arákùnrin Sergey Ledenyov. Wọ́n ní kó lo ọdún méjì tó yẹ kó lò lẹ́wọ̀n nílé, káwọn agbófinró ṣì tún máa ṣọ́ ọ fún ọdún kan lẹ́yìn ìyẹn. Torí náà, kò ní sídìí fún un láti lọ sẹ́wọ̀n.

Lọ́jọ́ tí wọ́n gbọ́ ẹjọ́ Arákùnrin Sergey kẹ́yìn, ó fìgboyà ṣàlàyé ohun tó túmọ̀ sí láti jẹ́ Ẹlẹ́rìí Jèhófà. Ó ní: “Jèhófà kì í ṣe orúkọ àwọn èèyàn kan, ètò kan tàbí ẹ̀sìn kan. Orúkọ Ọlọ́run ni Jèhófà. Nínú Bíbélì, Jèhófà pe àwọn ìránṣẹ́ rẹ̀ olóòótọ́ ní ‘ẹlẹ́rìí mi.’ Torí náà, níbi àpéjọ kan tá a ṣe lọ́dún 1931, a bẹ̀rẹ̀ sí jẹ́ orúkọ náà, ‘Ẹlẹ́rìí Jèhófà.’ Orúkọ yẹn sọ iṣẹ́ tá à ń ṣe, pé à ń jẹ́rìí nípa Ọlọ́run tó jẹ́ Ẹlẹ́dàá, Olùgbàlà àti Ọba Aláṣẹ Ayé Àtọ̀run, a sì ń jẹ́ káwọn èèyàn mọ àwọn nǹkan rere tí Ọlọ́run fẹ́ ṣe fún aráyé. Àǹfààní ńlá nìyẹn sì jẹ́ fún èmi àtàwọn ará mi tó kù.”​—Àìsáyà 43:10.

Arákùnrin Sergey fi ìdánilójú sọ fún ilé ẹjọ́ pé: “Kò sídìí fún mi láti máa tijú, bíi pé mo ti ṣe ohun tó lòdì sófin. Mo ní ẹ̀rí ọkàn tó mọ́ níwájú Ọlọ́run àti èèyàn.”