Ní December 16, 2020, Ilé Ẹjọ́ agbègbè Leninskiy tó wà ní ìlú Novosibirsk ní kí wọ́n fi Arákùnrin Yuriy Savelyev sí ẹ̀wọ̀n ọdún mẹ́fà. Àmọ́ ìyẹn ò bomi paná ìgbàgbọ́ Arákùnrin Yuriy wa ọ̀wọ́n. Ìdákẹ́kọ̀ọ́ tó ṣe nípa àwọn àsọtẹ́lẹ̀ Bíbélì mú kó túbọ̀ nígboyà.

Nígbà tí Arákùnrin Yuriy ń sọ̀rọ̀ ìparí nílé ẹjọ́ yẹn ní December 9, ó lo àǹfààní yẹn láti fìgboyà jẹ́rìí. Ó sọ fún gbogbo àwọn tó pésẹ̀ síbẹ̀ lọ́jọ́ náà pé: “Ọ̀kan lára àwọn àsọtẹ́lẹ̀ tí Jésù Kristi sọ ló ń ṣẹ báyìí níṣojú yín. Ó wà nínú Ìwé Mímọ́, ìyẹn Bíbélì, nínú Máàkù 13:​9, níbi tó ti sọ pé: ‘Ní tiyín, ẹ máa ṣọ́ra yín. Àwọn èèyàn máa fà yín lé àwọn ilé ẹjọ́ àdúgbò lọ́wọ́, wọ́n máa lù yín nínú àwọn sínágọ́gù, ẹ sì máa dúró níwájú àwọn gómìnà àti àwọn ọba nítorí mi, kó lè jẹ́ ẹ̀rí fún wọn.’”