Lọ́dún 2021, àwọn ẹgbẹ̀rún mọ́kàndínláàádọ́ta àti ogójì (49,040) ló wá sí Ìrántí Ikú Kristi lórílẹ̀-èdè Belgium. Ìrántí Ikú Kristi ni ìpàdé tó ṣe pàtàkì jù táwa Ẹlẹ́rìí Jèhófà máa ń ṣe lọ́dọọdún. Iye yìí ló tíì pọ̀ jù tá a bá fi wé iye àwọn tó ń wá sí Ìrántí Ikú Kristi ní Belgium látọdún 1995. Iye yẹn sì fẹ́rẹ̀ẹ́ tó ìlọ́po méjì iye àwọn Ẹlẹ́rìí Jèhófà tó wà lórílẹ̀-èdè náà.

Ohun tó mú kí èyí jọni lójú ni pé láwọn ọdún àìpẹ́ yìí, ọ̀pọ̀ èèyàn ní Belgium ni ò ṣe ẹ̀sìn kankan mọ́. Bí àpẹẹrẹ lọ́dún 1970, ohun tó ju ìdá mẹ́sàn-án nínú mẹ́wàá ló sọ pé Kristẹni làwọn. Tá a bá sì kó èèyàn ọgọ́rùn-ún (100) jọ, agbára káká la fi máa rí àwọn méje tó máa sọ pé àwọn ò ṣe ẹ̀sìn kankan. Àmọ́, ìròyìn ẹnu àìpẹ́ yìí fi hàn pé àwọn tó jẹ́ Kristẹni lórílẹ̀-èdè Belgium kò tó ìdá mẹ́fà nínú mẹ́wàá mọ́. Bákan náà, àwọn tí ò ṣe ẹ̀sìn kankan ti lé ní ìdá mẹ́rin nínú mẹ́wàá.

Láwọn ọdún àìpẹ́ yìí, àwọn oníròyìn ní Belgium ti sọ ọ̀pọ̀ ohun tí kì í ṣòótọ́ nípa àwa Ẹlẹ́rìí Jèhófà. Láìka àwọn ìròyìn tí kì í ṣòótọ́ yìí sí, ọ̀pọ̀ èèyàn lórílẹ̀-èdè náà túbọ̀ ń wá ìsọfúnni tó jóòótọ́ nípa àwa Ẹlẹ́rìí Jèhófà. Ọ̀pọ̀ àwọn èèyàn yìí ló ń fojú ara wọn rí ìfẹ́ tó wà láàárín àwa èèyàn Jèhófà, wọ́n sì tún ń rí bí àwọn ìlànà Bíbélì ṣe ń tún ayé wọn ṣe.​—Jòhánù 13:35.

Ní February 2021, ìròyìn tó wá láti ẹ̀ka ọ́fíìsì àwa Ẹlẹ́rìí Jèhófà ní Belgium fi hàn pé àwọn ẹgbẹ̀rún mọ́kànlá àti ọgọ́rùn-ún mẹ́jọ ó lé mẹ́rin (11,804) làwọn ará wa ń kọ́ lẹ́kọ̀ọ́ Bíbélì, ìyẹn sì fi ẹgbẹ̀rún kan (1,000) ju ìpíndọ́gba iye àwọn tá a kọ́ lẹ́kọ̀ọ́ Bíbélì lọ́dún iṣẹ́ ìsìn tó kọjá. Ní ìpíndọ́gba, láti ọdún márùn-ún sẹ́yìn, nǹkan bí ọgọ́rùn-ún mẹ́rin ó lé àádọ́ta (450) èèyàn ló ń ṣèrìbọmi lọ́dọọdún tí wọ́n sì ń di Ẹlẹ́rìí Jèhófà.

Àwọn ohun rere tó ń ṣẹlẹ̀ ní Belgium yìí jẹ́ àpẹẹrẹ díẹ̀ nípa bí àwa Ẹlẹ́rìí Jèhófà kárí ayé ṣe ń rí ìmúṣẹ àsọtẹ́lẹ̀ Bíbélì tó sọ pé: “Ẹni tó kéré máa di ẹgbẹ̀rún, ẹni kékeré sì máa di orílẹ̀-èdè alágbára.”​—Àìsáyà 60:22.