Ní Saturday, October 6, 2018, ìmìtìtì ilẹ̀ kan tó lágbára wáyé ní agbègbè àríwá ilẹ̀ Haiti, ó pa èèyàn mẹ́tàdínlógún (17), ó sì ju ọgọ́rùn-ún mẹ́ta (300) tó fara pa.

Ìròyìn tá a gbọ́ fi hàn pé kò sí ìkankan lára àwọn ará wa tó kú; àmọ́ àwọn méjì ṣèṣe. Ìròyìn tá a kọ́kọ́ gbọ́ látọ̀dọ̀ àwọn alábòójútó àyíká fi hàn pé ilé mẹ́rìnlélógójì (44) àti Gbọ̀ngàn Ìjọba mẹ́rin ló bà jẹ́. Ní ìlú Port-de-Paix, nǹkan bí àádọ́ta (50) àwọn ará àti ìdílé wọn ló ní láti kúrò níbi tí wọ́n ń gbé torí àwọn ilé náà lè wó nígbàkigbà. Àwọn ará inú ìjọ tó wà lágbègbè náà ló ń tójú àwọn ìdílé yìí. Ọ̀kan lára Ìgbìmọ̀ Ẹ̀ka nílẹ̀ Haiti pẹ̀lú arákùnrin méjì tó ń ṣiṣẹ́ ní Ẹ̀ka Tó Ń Yàwòrán Ilé Tó sì Ń Kọ́ Ọ lọ sáwọn ibi tí àjálù náà ti ṣẹlẹ̀ kí wọ́n lè mọ bó ṣe tó, kí wọ́n sì fún àwọn ara níṣìírí. Ìgbìmọ̀ Tó Ń Ṣètò Ìrànwọ́ Nígbà Àjálù ti bẹ̀rẹ̀ iṣẹ́ níbẹ̀ láti pèsè àwọn nǹkan tó ṣe pàtàkì.

Ọkàn wa wà lọ́dọ̀ àwọn ará wa ní Haiti, a sì ń gbàdúrà fún wọn. A dúpẹ́ pé Baba wa ọ̀run ti ṣèlérí pé ìfẹ́ òun tí kìí yẹ̀ máa tu àwọn olóòótọ́ ìránṣẹ́ òun nínú.—Sáàmù 119:76.