Ẹgbẹẹgbẹ̀rún àwa Ẹlẹ́rìí Jèhófà kárí ayé, títí kan àwọn tó nífẹ̀ẹ́ sí ẹ̀kọ́ òtítọ́ tá a fi ń kọ́ni máa kóra jọ lọ́jọ́ Tuesday, April 7, 2020, láti ṣe ìpàdé tó ṣe pàtàkì jù lọ́dún, ìyẹn Ìrántí Ikú Kristi. Àmọ́, ọ̀nà tá a máa gbà ṣe ìpàdé tọdún yìí á yàtọ̀ sí bá a ti máa ń ṣe é látẹ̀yìn wá nítorí àrùn Corona (COVID-19) tó gbòde kan. Nípa bẹ́ẹ̀, dípò kí wọ́n kóra jọ láwọn ibi ìjọsìn wa, ẹ̀rọ ayélujára làwọn èèyàn Jèhófà lọ́pọ̀ ibi láyé máa lò. Torí pé ẹ̀rọ yìí ní kámẹ́rà, á ṣeé ṣe fún wọn láti rójú ara wọn bí ẹni pé wọ́n wà pa pọ̀.

Ní ọ̀pọ̀ ilẹ̀, àrùn Corona yìí ti mú kí ìjọba ṣòfin pé àwọn èèyàn ò gbọ́dọ̀ kóra jọ níbikíbi. Torí náà, ọ̀pọ̀ ìjọ àwa Ẹlẹ́rìí Jèhófà kárí ayé ti bẹ̀rẹ̀ sí í lo ẹ̀rọ ayélujára téèyàn ti lè máa rójú àwọn tí wọ́n jọ ń sọ̀rọ̀. Èyí mú kí wọ́n lè máa ṣe àwọn ìpàdé wọn lọ́sọ̀ọ̀sẹ̀, òun náà sì ni wọ́n máa lo láti ṣe Ìrántí Ikú Kristi. Kó lè rọrùn fáwọn tí kì í ṣe Ẹlẹ́rìí Jèhófà láti gbádùn àsọyé tá a máa ń gbọ́ nígbà Ìrántí Ikú Kristi, a ti gbé àsọyé náà sorí ìkànnì wa, ìyẹn jw.org.

Àwọn èèyàn tó lé ní ogún (20) mílíọ̀nù ló kóra jọ fún Ìrántí Ikú Kristi lọ́dún tó kọjá. A nírètí pé ọ̀pọ̀ mílíọ̀nù èèyàn tí kì í ṣe Ẹlẹ́rìí Jèhófà ló máa dara pọ̀ mọ́ wa láti ṣe Ìrántí Ikú Kristi ti ọdún yìí, yálà nípasẹ̀ ẹ̀rọ ayélujára tàbí lórí tẹlifóònù, wọ́n sì lè wo èyí tá a gbé sórí ìkànnì jw.org.

Láwọn ilẹ̀ kan, ṣe ni àrùn yìí túbọ̀ ń gbèèràn. Nítorí náà, àwọn ará wa ń fi àwọn ìkìlọ̀ àtàwọn ìránnilétí ìjọba sílò, wọ́n túbọ̀ ń wà lójúfò, wọ́n sì ń ṣọ́ra kí àrùn náà má bá ràn wọ́n. Bó ti wù kó rí, ó dá wa lójú pé Jèhófà máa tì wá lẹ́yìn láti pa àṣẹ Jésù mọ́ tó sọ pé “Ẹ máa ṣe èyí ní ìrántí mi.”​—Lúùkù 22:19.