Àwa Ẹlẹ́rìí Jèhófà mú Ìwé Mímọ́ Kristian Lédè Griki ní Ìtumọ̀ Ayé Titun jáde lédè Laotian níbi àpéjọ agbègbè tí a ṣe ní Nong Khai, lórílẹ̀-èdè Thailand, ní August 16, 2019. Arákùnrin Plakorn Pestanyee tó jẹ́ ọ̀kan lára Ìgbìmọ̀ Ẹ̀ka orílẹ̀-èdè Thailand, ló mú Bíbélì náà jáde lọ́jọ́ àkọ́kọ́ àpéjọ náà.

Ìgbìmọ̀ ẹlẹ́ni-mẹ́ta tó túmọ̀ Bíbélì náà lo ọdún kan ààbọ̀ lórí iṣẹ́ náà. Ọ̀kan lára àwọn atúmọ̀ èdè náà sọ pé: “Ní báyìí, a ti ní ìtumọ̀ Bíbélì kan tó ṣàlàyé àwọn ọ̀rọ̀ inú Bíbélì lọ́nà tí àwọn tó ń sọ èdè Laotian gbà ń sọ̀rọ̀, síbẹ̀ ó gbé ìtumọ̀ àwọn ọ̀rọ̀ jáde lọ́nà tó pé pérépéré, kí àwọn akẹ́kọ̀ọ́ Bíbélì lè lóye ‘àwọn ohun ìjìnlẹ̀ Ọlọ́run.’ ”​—Jóòbù 11:7.

Bíbélì tuntun yìí ní àwọn ohun èlò ìwádìí bí atọ́ka, tó máa ran àwọn tó ń kà á lọ́wọ́ láti tètè rí àwọn ẹsẹ Bíbélì àti àlàyé ọ̀rọ̀ tó ń ṣàlàyé àwọn ọ̀rọ̀ Bíbélì. Atúmọ̀ èdè míì tóun náà ṣe nínú iṣẹ́ ìtumọ̀ náà sọ pé: “Tá a bá fi Bíbélì yìí kọ́ àwọn èèyàn lẹ́kọ̀ọ́, àwọn akẹ́kọ̀ọ́ Bíbélì á lóye àwọn koko pàtàkì lọ́nà tó rọrùn ju ti tẹ́lẹ̀ lọ, á sì wọ̀ wọ́n lọ́kàn, èyí á sì jẹ́ kí wọ́n ní ìbátan tímọ́tímọ́ pẹ̀lú Jèhófà.”

Ó dá wa lójú pé Ìwé Mímọ́ Kristian Lédè Griki ní Ìtumọ̀ Ayé Titun yìí á ran àwọn arákùnrin àti arábìnrin wa tó ń sọ èdè Lao lọ́wọ́ láti kí wọ́n lè “kúnjú ìwọ̀n dáadáa, kí wọ́n sì gbára dì pátápátá fún gbogbo iṣẹ́ rere.”​—2 Tímótì 3:​16, 17.