Batu bankaka banyindulanga ti kusekula Kibibila mu kulandakana kikuma na kikuma, mankuiza luta sadisa ntangi kuvisa mambu maba masonama mu masonoko matheti. Vayi ayoyo, yisi ko phila yimboti yi kusekudila. Mona kibila mbi:

• Vasi ko zimbembu wadi zidi zidedakana mu phisulu ayi mu tsonokono. Nlongisi mueka wu mbembu yi Kiebeleo bantedilanga S. R. Driver, wusonika ti: “Zimbembu zidi disuasana kubika to mu tsonokono ayi mu bikhulu, vayi mvandi mu phila bamviokisila mayindu bo bansonika.” Phila yi kuyindudila yidi disuasana mu kadika mbembu. Nlongisi beni wubue tuba: “Diawu phila yi kuviokisila diyindu mu kadika mbembu yidi disuasana.”

• Bubu vasi ko mbembu yidi yidedakana mu phisulu ayi mu tsonokono na zimbembu zi Kiebeleo, Alamaiku ayi Kingeleko, zio basonikina Kibibila. Diawu, kusekula Kibibila mu kulandakana kikuma na kikuma, malenda vanga batu kumona phasi kuvisa ayi mvandi malenda vanga kuba phisulu yikhambu fuana.

• Khumbu zinkaka tsundu yi kikuma yilenda ba disuasana mu matangu mankaka.

Bukiedika, khumbu zinkaka nsekudi kalenda sekula mu kulandakana phila basonikina masonoko matheti, vayi kafueti ba beni keba keba.

 Tala bifuani bimmonisa buidi kusekula mu kulandakana kikuma na kikuma, kulenda viokisila tsundu yikhambu fuana:

• Masonoko mansadilanga kikuma “kulala” ayi “kulala tolo” muingi kutubila tolo to tunlalanga ayi tolo tu lufua. (Matai 28:13; Mavanga 7:60) Bo bansadila bikuma abiobio mu matangu mantubila matedi lufua, minsekudi mi Kibibila balenda sadila bikuma dedi “kulala mu lufua,” mawu mansadisanga ntangi kabika ba divuda.—1 Kolintu 7:39; 1 Tesalonika 4:13; 2 Petelo 3:4.

• Mu buku yi Efeso 4:14 mvuala Polo wusadila kikuma baba sadilanga mu thangu yikhulu. Befu kusekula kiawu mu kutadila phila kisonimina, kilenda ba “em a jogada de dados de homens.” Kikuma akiokio kintubila matedi kifu ki kuvunanga bo banta bisavu bi mamanya. Nduka zimbembu zioso bubu ba kusekudila kikuma akiokio mu phila beni masinkuiza ba ko tsundu. Diawu phila yimboti tulenda sekudila muingi kusadisa batu kuvisa diyindu dikiedika yidi “diela di batu.”

• Mu Loma 12:11, basadila kikuma ki Kingeleko kinsundula “bika phevi yifusuka.” Kusekudila mu phila ayoyo, kisinkuiza ba ko tsundu mu Ibinda, diawu mu tsekudulu ayiyi basadila kikuma “bika phevi yinlongo yilukindisa.”

• Mu dilongi Yesu kavanga va Mbata Mongo, nandi wusadila kikuma kio khumbu ziwombo bansekudilanga abubu “Biphumbulu mu kiphevi badi ndandu.” (Matai 5:3, Almeida, revista e corrigida) Vayi mu zimbembu ziwombo kusekudila kikuma akiokio mu phila basonikina, kuisi ko tsundu. Khumbu zinkaka kusekudila kikuma akiokio mu phila beni kulenda vanga batu kuyindula ti “biphumbulu mu kiphevi” badi batu balebakana, bakhambulu nsika mu mayindu ayi bakhambulu mangolo. Vayi mu dilongi beni, Yesu waba longa ti muingi batu babaka mayangi makiedika vasintombulu ko to kudukisa zitsatu zi kinsuni, vayi bafueti kikinina ti bantombulu thuadusulu yi Nzambi. (Luka 6:20) Diawu kusekudila mu phila ayiyi “mayangi kuidi batu badi phuila yi mambu ma Nzambi” voti “batu bazebi ti bantombulu Nzambi mu luzingu luawu” yawu tsekudulu yimmonisa tsundu yifuana yi bikuma abiobio.—Matai 5:3; Bíblia Fácil de Ler.

Mu matangu mawombo kikuma ki Kiebeleo basekudila “kiphala” kilutidi zabakana mu mbembu yi Ibinda, kiawu kidi, kudasuka mu  kibila ki kukhambu ku lukuikumunu lu mutu voti kumona nsoki bankaka mu biuma badi. (Zingana 6:34; Yesaya 11:13) Vayi kikuma akiokio mu Kiebeleo mvandi kidi tsundu yimboti. Dedi, kiawu kilenda sundula “kifuza” voti kumona phuila yi lukiebu lo Yave kamvananga kuidi bisadi biandi. Mvandi kilenda sundula “kubuongimina to Nzambi.” (Esodu 34:14; 2 Mintinu 19:31; Yezehekeli 5:13; Zakalia 8:2) Mvandi balenda sadila kiawu muingi kutubila kifuza kio bisadi bi Nzambi badi mu nandi ayi mu mbuongimini’andi voti kuba bakuikama mu kubika kikinina batu bambayisa minsiku miandi.—Minkunga 69:9; 119:139; Zintalu 25:11.

Kikuma ki Kiebeleo bansadilanga muingi kutubila koko ku mutu, kilenda ba zitsundu ziwombo. Mu kutadila kadika matangu, kikuma akiokio kilenda sekudulu buka “luyalu” “kukaba” voti “mangolo.” (2 Samueli 8:3; 1 Mintinu 10:13; Zingana 18:21) Kikuma akiokio, basekula kiawu kuvioka 40 di ziphila mu Tsekudulu yi Nza Yimona yi Kibibila mu Ibinda.

Mu kutadila mambu amomo, muingi kusekula Kibibila vasintombulu ko to kusekula mu yoyawu phila basonikina mu masonoko matheti. Nsekudi kafueti ba mayindu mafuana bo kansola bikuma mu mbembu kankolukanga, bio binkuiza sadisa batu kuba phisulu yifuana buka yo yidi mu masonoko matheti. Kubotula kuandi amomo, mvandi vantombulu kusonikina bikuma mu phila bankolukilanga mu mbembu’inu muingi mambu wunsekula mabika ba phasi mu kuvisa ayi kutanga.

Mvandi nsekudi kafueti ba keba keba muingi kabika sabisa bo kansadila bikuma bikhambulu phasi. Boti nsekudi wunsadila bikuma bikhambulu phasi mu kutadila phila kanyindudila, kalenda sekudila mu phila yilenda tiukisa tsunsu. Mu phila mbi? Ḿba nsekudi kalenda tula mayindu mandi mu phila kammuena ti yawu tsundu yidi mu masonoko matheti, voti kubotula mayindu mamfunu madi mu matangu. Mu phila ayoyo, kheti tsekudulu beni yisi ko phasi mu kutanga, vayi khumbu zinkaka phila bansekudila, yilenda tula nkaku ntangi kuvisa tsangu yimfunu yiba mu masonoko matheti.

Malongi ma binganga mvandi malenda vukumuna kisalu ki nsekudi. Dedi, Matai 7:13 yintuba: “Nzila yinneni yawu yinnatanga ku mbungulu.” Minsekudi minkaka bambikanga malongi ma binganga biawu maba vukumuna. Bawombo mu bawu basadila mu lutangu alolo kikuma “bulungi” kubika kuandi “mbungulu.” Mbungulu yawu tsundu yifuana yi kikuma akiokio mu Kingeleko.

Nsekudi wu Kibibila mvandi, kafueti tebuka moyo ti Kibibila kisonimina mu phila batu bakhambu longuka beni baba kolukilanga lumbu ka lumbu, dedi mimvati, minsungi mi mamemi ayi minlobi. (Nehemia 8:8, 12; Mavanga 4:13) Diawu, tsekudulu yimboti yi Kibibila yinsadisanga batu badi mintima bikubama bavisa tsangu yidi muawu,  boso kua kabela. Diawu sadila bikuma bimvisuka ayi bikhambulu phasi, kubika kuandi bikuma bio batu bakhambu longuka beni bakhambu sadilanga.

Minsekudi miwombo mi Kibibila babaka makani mukhambu kibila ma kubotula dizina di Nzambi Yave mu zitsekudulu ziawu kheti dizina beni didi mu masonoko makhulu. (Tala Apendice A5.) Zitsekudulu ziwombo zi Kibibila bamvingisanga dizina di Nzambi mu thangununu dedi “Mfumu.” Ayi phila bansekudilanga mu zitsekudulu zinkaka, yidi buka ti Nzambi kasi ko dizina. Dedi, mu zitsekudulu zinkaka basekudila nsambu Yesu kavanga mu Yoane 17:26 mu phila ayiyi: “Minu yiba sadisa ba kuzaba,” ayi mu Yoane 17:6, “Minu yikuzabikisa kuidi batu bo ngie wuphana.” Vayi tsekudulu yi lufiatu yi mambu madi mu nsambu wu Yesu yidi: “Minu yiba zabikisa dizina diaku,” ayi “Yima zabikisa dizina diaku kuidi batu wuphana mu nza.”

Va tsielu yi thonono mu tsekudulu yitheti yi Tsekudulu yi Nza Yimona mu inglês muidi mambu amama: “Tusa vingisa ko bikuma binkaka muingi kusekula Masonoko. Ayi tuvanga mangolo muingi kusekudila mu yoyawu phila basonikina boti tuidi luaku lu kuvanga mawu mu inglês ayi boti kusekudila mu phila beni kuisimbalula ko tsundu yi mambu madi mu masonoko matheti.” Diawu dingumba divanga Tsekudulu yi Nza Yimona yi Kibibila, divanga mangolo muingi kusadila bikuma bimmonisa mayindu madi mu masonoko matheti ayi mu yoyawu thangu kubika sadila bikuma bilenda balula phisulu voti kuzimbisa diyindu. Mu kibila akiokio, bubu batu balenda tanga Kibibila mu phila yikhambulu phasi mu kuvisa ayi kuba lufiatu ti badi mu kutanga yoyawu tsangu yiba mu masonoko matheti.—1 Tesalonika 2:13.