Mu Kibibila, muidi zitsangu Nzambi kantomba befu tuzaba. Tufueti longuka Kibibila, muingi kuzaba mutu wuvuidi kiawu. (Yoane 17:3; 2 Timoti 3:16) Mu Kibibila Yave Nzambi wuzabikisa lukanu luandi matedi batu ayi ntoto. —Ngenesi 3:15; Nzaikusu 21:3, 4.

Vasi ko buku yinkaka yinluta tuadisanga ndandu mu luzingu lu batu kena Kibibila. Kiawu kitukindisanga kulandakana zikhadulu zi Yave, dedi luzolo, kumonisa kiadi ayi nlemvu. Kituvananga kivuvu, ayi kinsadisanga batu kukindama mu zioso kua ziphasi bamviokila. Mvandi kitusadisanga kuzaba zikhadulu zimbi zi nza ayiyi zikhambulu nguizani na luzolo lu Nzambi. —Minkunga 119:105; Ebeleo 4:12; 1 Yoane 2:15-17.

Basonikina Kibibila mu mbembu yi Kiebeleo, Alamaiku ayi Kingeleko. Ayi bamana sekula kiakioso voti mu bitini, kuvioka 3.000 di zimbembu. Yawu buku banluta sekulanga ayi banluta kabulanga mu nza yimvimba. Tuisinkuituka ko kumona mambu amomo, kibila yawu yidi buku yi Nzambi. Mbikudulu yimueka yi Kibibila yintuba: “Ayi zitsangu azizi zimboti zi Kintinu, (zitsangu zimfunu zidi mu Kibibila) ziala samunu mu ntoto wumvimba, muingi kuvana kimbangi kuidi batu ba mimvila mioso, bosi tsukulu yala kuiza.”—Matai 24:14.

Mu kuzaba nkinza wu zitsangu zidi mu Kibibila, makani mitu madi kuvanga tsekudulu yi lufiatu yidi nguizani na Masonoko matheti, yimvisuka ayi yikhambulu phasi mu kutanga. Mu Apêndice A, muidi mintu mi mambu: “Zithuadusulu muingi kusekula Kibibila,” “Mambu Madi mu tsekudulu Ayiyi,” ayi “Buidi Kibibila Kitukila kuidi Befu” minsudikisa mua mambu tulandakana ayi mambu mankaka madi mu tsekudulu ayiyi.

Batu banzolanga ayi bansadilanga Yave, bantombanga tsekudulu yi Diambu di Nzambi yilufiatu ayi yikhambulu phasi mu kuvisa. (1 Timoti 2:4) Akiokio, kiawu kibila ki tuvengi kuvanga tsekudulu ayiyi mu Ibinda. Mvandi makani mitu ma kubuela yawu mu zimbembu zinkaka boti kuba, ayi tuntomba muingi ngiewu ntangi, wubaka ndandu mu tsekudulu ayiyi yi Masonoko manlongo, ayi ‘wuvanga mangolo ma kutomba Nzambi ayi wumbakula’. (Mavanga 17:27)