Zisonika Matai 12:1-50
12 Kiba kilumbu ki kisabala, ayi Yesu waba viokila mu tsola yiba mbongo*. Minlandikini miandi bo baba mona nzala, batona kutitika minsesi* miba mbongo yiyela muingi badia.
2 Bo bafalisi bamona mawu, batuba: “Tala! Minlandikini miaku badi mu kuvanga mambu bakhambulu nsua wu kuvanga mu kilumbu ki kisabala.”
3 Yesu wuba vutudila: “Benu lusa tanga ko mambu Davidi kavanga bo naveka ayi masodi mandi baba mu nzala?
4 Lusa tanga ko ti nandi ayi babakala baba yandi bakota ku nzo Nzambi ayi batona kudia mapha ma nkhailu mo bakhambu ba nsua wu kudia kuba kuandi naveka ayi batu baba yandi, vayi zinganga Nzambi to?
5 Voti lusa tanga ko mu Minsiku ti mu kilumbu ki kisabala, zinganga Nzambi bantatamananga kusala ku tempelu, vayi kheti bobo babanga ko fotu mu mawu?
6 Vayi bukiedika yiku lukamba ti mutu widi yinu avava, wulutidi nkinza kena tempelu.
7 Diawu, boti benu luvisa mbi binsundula: ‘Yitidi mumonisa kiadi kubika kuandi kuvana minkhailu,’ khanu musa fundisa ko batu bakhambulu kibila.
8 Kibila Muana Mutu, nandi Mfumu wu kilumbu ki kisabala*.”
9 Bo kabotuka va kibuangu beni, nandi wukota ku nzo lukutukunu,
10 ayi vaba dibakala dimueka diba koko kusioka*, diawu muingi babaka bu kumvunina mambu, bawu banyuvula: “Bukiedika kuandi ti vadi nsua wu kubelusa mutu mu kilumbu ki kisabala?”
11 Nandi wuba vutudila: “Boti wumueka mu benu widi dimemi, ayi diawu dibe doduka mu dibulu mu kilumbu ki kisabala, bukiedika ti kasinkuiza dithapula ko muna?
12 Bukiedika, mutu lutidi nkinza kena dimemi. Diawu, vadi nsua wu kuvanga diambu dimboti mu kilumbu ki kisabala.”
13 Bosi wukamba dibakala beni: “Nonuna koko.” Nandi wunonuna kuawu ayi koko beni kubeluka. Bosi kuyiza ba dedi mueka na koko kunkaka.
14 Vayi bafalisi babasika ayi batona kubaka makani matedi nandi muingi kumvonda.
15 Bo kazaba mawu, Yesu wubotuka vana. Mvandi bawombo banlandakana ayi nandi wuba belusa,
16 vayi wuba vana nsua muingi babika kamba bankaka matedi nani nandi kaba,
17 muingi mambu ḿbikudi Yesaya kasonika masalama, mantuba:
18 “Talanu! Kisadi kiama no minu yisola, no yinzolanga beni ayi no widi lunungu va mesu mami! Yala mvana phevi’ami ayi nandi wala sudikisa mimvila mambu masonga.
19 Nandi kalasa sombula ko, kalasa tenduka ko ayi ni mutu wala kuwa mbembu’andi mu zinzila zinneni.
20 Kalasa manisa ko kukelula ntsenga widi nduelu* ayi kalasa zimisa ko nsivu wu muinda wukhidi basika muisi, nati kala tuala busonga.
21 Bukiedika, batu ba zitsi zioso bala tula kivuvu mu dizina diandi.”
22 Bosi bantuadila dibakala dimueka wuba phovo ayi waba khambu kolukanga. Dibakala beni wuba mu thuadusulu yi ziphevi zimbi, vayi Yesu wumbelusa. Mu phila ayoyo, nandi wubue vutuka kumona ayi kukoluka.
23 Diawu, nkangu woso wu batu wuba vana, bayituka ayi batona kutuba: “Ḿba awowo nandi muana Davidi ve?”
24 Bo bafalisi bayuwa mawu, batuba: “Dibakala adiodio, wunkukisilanga ziphevi zimbi mu lusadusu lu Belizebu, mfumu ziphevi zimbi.”
25 Bo Yesu kazaba mayindu mawu, diawu kaba kambila: “Loso kua luyalu lukhambulu kithuadi, luawu luntulukanga ayi dioso kua divula voti dikanda didi kithatu mu baveka, dibanga ko nsika.
26 Bobuawu mvandi, boti Satana widi mu kukukisa Satana, buna nandi widi wukabuka naveka. Ayi boti buawu, bukiedika kuandi ti kintinu kiandi kiala tatamana kitelama?
27 Mvandi boti minu yidi mu kukukisila ziphevi zimbi mu lusadusu lu Belizebu, buna mu lusadusu lunani bana binu bamvangilanga mawu? Diawu bawu bala ku mufundisila.
28 Vayi boti mu phevi yi Nzambi yidi mu kukukisila ziphevi zimbi, buna Kintinu ki Nzambi kima vionyuka mu mioko minu.
29 Ove, vadi mutu wulenda kota ku nzo yi dibakala didi mangolo mawombo ayi kubonga biuma biandi mukhambu kanga theti dibakala beni? Na kuvanga mawu, buawu to kankuiza nungina kukuiba ku nzo beni.
30 Woso mutu wukhambulu ku khonzu’ama, buna widi mbeni’ama, ayi woso wummanga khupika yama va kimueka, buna kutiamuna kadi mu kutiamuna.
31 “Diawu yimu kambila ti, mintindu mioso mi masumu ayi bifingu batu bamfinga, Nzambi wala kuba lemvukila, vayi ba kufinga phevi yinlongo, Nzambi kalasa balemvukila ko.
32 Dedi, woso wuntubila bubi Muana Mutu, Nzambi wala kunlemvukila, vayi woso wuntubila bubi phevi yinlongo, Nzambi kalasa kunlemvukila ko, ni mu nza ayiyi, ni mu nza yinkuiza.
33 “Benu kuvata nti wumboti, makundi mandi mvandi mala ba mamboti. Vayi boti nti lube vata widi wumbi, makundi mandi mvandi mala ba mambi. Kibila banzabilanga nti wumboti mu makundi mandi.
34 Nkuna wu nyoka, buidi benu mulenda tubila mambu mamboti boti luidi bankua mambi? Kibila munu wuntubanga mambu mo mawedi mu ntima.
35 Mutu wumboti, wunkolukanga mambu mamboti, kibila widi mambu mamboti mu ntim’andi. Vayi nkua mambi wunkolukanga mambu mambi, kibila mawu mawedi mu ntim’andi.
36 Yiku lukamba mu bukiedika ti, mu kilumbu ki lufundusu, Nzambi wala fundisa batu mu mambu moso makhambulu tsundu bantubanga,
37 kibila mu mambu wuntuba, muawu wala fundusulu ti widi mutu wusonga ayi mawu mvandi bala kuzengila nkanu.”
38 Mu phila ayoyo, bankaka mu ziescriba ayi bafalisi bankamba: “A Nlongisi, tutidi wu tumonisa kioso kua kidimbu.”
39 Vayi nandi wuba vutudila: “Mbandu yimbi ayi yi kitsuza yintatamana kutomba kidimbu, vayi ni kidimbu kimueka luisinkuiza mona ko, kubotula kuandi kidimbu ki ḿbikudi Yona.
40 Kibila dedi bo Yona kakadila bilumbu bitatu mu kivumu ki mfu yinneni, buawu mvandi Muana Mutu kala kadila bilumbu bitatu ku tsi ntoto.
41 Mu kilumbu ki lufundusu, basi Ninive bala vulubuka ayi bala fundusu va kimueka na mbandu ayiyi ayi bawu bala monisa ti, mbandu ayiyi yidi fotu. Kibila bawu babalula mavanga bo Yona kaba samuna. Vayi minu yiku lukamba ti, mutu widi yinu avava, wulutidi nkinza kena Yona.
42 Mvandi mfumu yi nkietu wuba ku sude, wala vulubuka mu kilumbu ki lufundusu ayi nandi wala fundusu va kimueka na mbandu ayiyi. Nandi wala monisa ti mbandu ayiyi yidi fotu, kibila nandi wufumina ku kinanu muingi kiza yuwa luzabu lu ntinu Salomo. Vayi minu yiku lukamba ti, mutu widi yinu avava, wulutidi nkinza kena ntinu Salomo.
43 “Mu thangu phevi yimbi yimbasika mu mutu, yawu yinkuendanga mu bibuangu biyuma mu kue tombanga kibuangu ki kuvundila; ayi na manga kubaka kiawu,
44 yawu wuntubanga: ‘Yemvutuka ku nzo’ama yiba’. Bo yawu yimvutuka kuna, na kubata ti nzo beni bakombula yawu, yikubuku buboti ayi muisi ko ni mutu,
45 yawu yimvutukanga ayi yikue landanga sambuadi di ziphevi zimbi zilutidi makhema kena phevi beni ayi bo zinkota, zinkalanga kuna. Mawu, mamvanganga mutu awowo kuluta ba makhema kena bo kabela va thonono. Buawu mvandi buala bela mbandu ayiyi yimbi.”
46 Mu thangu kaba koluka na nkangu wu batu wuba vana, mam’andi ayi zikhomba ziandi baba batelama ku nganda ayi baba tomba kukoluka yandi.
47 Diawu wumueka mu batu baba vana wunkamba: “Tala! Mam’aku ayi zikhomba ziaku badi ku nganda ayi bantomba kukoluka yaku.”
48 Yesu wuvana mvutu kuidi mutu beni mu kunkamba: “Nani mam’ami ayi zikhomba ziama?”
49 Ayi bo kanonuna koko ku khonzu yiba minlandikini miandi, wutuba: “Ngudi’ami ayi zikhomba ziama bawu ababa!
50 Kibila woso wumvanga luzolo lu Tat’ami widi ku diyilu, nandi khomb’ama wu dibakala, khomb’ama wunkietu ayi mam’ami.”
Footnotes
^ yawu yiba trigo voti ble, zitheti bamvangilanga falini yi mapha
^ Voti: “bisafu.”
^ Kilumbu ki kuvunda.
^ Voti: “kubela.”
^ Voti: “disuka.”
