Zisonika Matai 14:1-36
14 Mu thangu beni, Elodi waba yadilanga kizunga, wuyuwa zitsangu matedi Yesu
2 ayi wukamba kuidi bisadi biandi: Awowo, widi Yoane Ḿbotiki. Nandi bevulubuka mu bafua, diawu kadi mu kuvangila mambu amomo ma kukuitukila.”
3 Mua thangu kumbusa, Elodi wubuila Yoane, wunkanga ayi wuntula mu buloku, mu kibila ki Helodia wuba nkazi wu Filipi khomb’andi.
4 Kibila Yoane waba kunkambanga: “Ngie wisi ko nsua wu kunkuela, muingi kaba nkazi’aku.”
5 Ayi, kheti waba tomba kumvonda, nandi wuba boma bu nkangu wu batu, kibila bawu baba tadilanga Yoane ḿbikudi.
6 Vayi mu kilumbu ki nkungi wu mbutukulu wu Elodi, muana nkietu wu Helodia wukina va ntuala batu katumisa ayi wuyangidika beni Elodi.
7 Ayi nandi wuvanga tsila mu kukanikisa kuvana kioso kua kiuma muana beni kankuiza ndinda.
8 Bosi, bo ngudi’andi kamvukumuna, diawu muana beni kakambila Elodi: “Phana ntu wu Yoane Ḿbotiki mu lulonga.”
9 Kheti ntinu wuba beni mu kiunda, vayi nandi wutuma muingi bamvana ntu wu Yoane Ḿbotiki, muingi kudukisa tsila kavanga ayi kukuangidika batu baba dia yandi.
10 Diawu katumina muingi bazenga ntu wu Yoane, muna buloku.
11 Batuala ntu beni mu lulonga ayi bavana wawu kuidi muana nkietu beni ayi nandi wunata wawu kuidi ngudi’andi.
12 Bosi minlandikini mi Yoane bayiza bonga nyitu’andi muingi kue zika, ayi bayekamba Yesu mambu mamonika.
13 Bo Yesu kayuwa mawu, nandi wunanguka mu dikumbi ayi wuyenda ku kibuangu ki kinanu muingi kuba va naveka. Vayi bo nkangu wu batu bazaba mawu, bananguka mu mavula mawu ayi banlandakana dimalu.
14 Bo kakuluka mu dikumbi, nandi wumona nkangu wu batu. Yesu wuba mona kiadi ayi wubelusa zimbevu banata.
15 Vayi bo buisi buaba kuila, minlandikini mi Yesu bafikama vo kaba ayi bankamba: “Kibuangu akiki kidi beni kinanu ayi buisi buenkuila. Diawu bika theti nkangu awowo wu batu benda mu mala, muingi besumba bidia.
16 Vayi Yesu wuba vutudila: “Vasintombulu ko bawu kukuenda, vayi wuba vananu kioso kiuma muingi badia.”
17 Bawu bamvutudila: “Tuisi ko bidia biwombo, vayi mapha matanu ayi zimfu wadi to zidi yitu.”
18 Nandi wuba kamba: “Tualanu biawu avava.”
19 Ayi wutuma nkangu wu batu wuba vana muingi bakala va nlumba. Bosi wubonga mapha matanu ayi zimfu beni ziwadi, ayi bo katala ku diyilu, wuvanga nsambu. Bosi wubukuna mapha beni, wuvana mawu kuidi minlandikini miandi ayi bawu bavana kuidi nkangu wu batu wuba vana.
20 Mu phila ayoyo, baboso badia ayi bayukuta, bosi bakongula bitini bisobila ayi biawu biwesa 12 di biphani.
21 Thalu yi batu badia mu kutala mu kumona yiba 5.000 di babakala, kubotula kuandi bakietu ayi bibabana.
22 Bosi mu nzaki, nandi wutuma minlandikini miandi bamaka mu dikumbi muingi batuama ku disimu dinkaka, vayi nandi waba kanina nkangu wu batu wuba vana.
23 Bo kamana kukanina nkangu wu batu wuba vana, nandi wutombuka ku mongo naveka muingi kue sambila. Wutatamana kuna nati buisi buyila.
24 Dikumbi diba beni ditatuka mu zimetro ziwombo na lukueku mu kibila ki mayo, kibila phemu yaba kuizila ku khonzu yinkaka.
25 Vayi, mu kilo kinna ki builu, nandi wuyenda kue babata mu dikumbi mu kudiata va mbata nlangu.
26 Bo bammona kudiata va mbata nlangu, minlandikini miandi basusuka ayi batuba: “Kio kisi ko kimona mesu?” Ayi bawu batenduka mu boma.
27 Vayi mu thinu Yesu wuba kamba: “Banu kibakala! Yidi minu, bikanu kumona boma.”
28 Petelo wumvutudila: “A Mfumu, boti ngiewu Yesu, buna thuma muingi minu mvama yidiatila va mbata nlangu, ayi yiza nati vo widi.”
29 Nandi wunkamba: “Yiza!” Bosi Petelo wukuluka mu dikumbi ayi wutona kudiata va mbata nlangu muingi kenda vaba Yesu.
30 Vayi bo katala kivuka, nandi wumona boma. Ayi bo katona kusinda, nandi wutenduka: “A Mfumu, phukisa!”
31 Mu thinu Yesu wunonuna koko, wunsimba ayi wunkamba: “Dibakala di kiminu kiluelu, kibila mbi bebela divuda?
32 Bo bamaka mu dikumbi, kivuka beni kimana.
33 Ayi baboso baba mu dikumbi bafukama va ntuala Yesu, ayi batuba: “A Mfumu, bukiedika ngie widi Muana Nzambi.”
34 Ayi bo bamana kusabuka bakuluka mu dikumbi ku ntoto Ngenezale.
35 Bo batu ku divula beni babakula ti nandi Yesu, batuma muingi balubula batu baba kalanga va kizunga kioso ayi bawu banata kuidi nandi baboso baba bela.
36 Ayi baba kundinda muingi basimba kheti mu ḿbilu wu bikhutu biandi ayi baboso baba simbanga wawu, baba belukanga.
